ژن دناڤبەرا هەبوون و بکارئینانێ دا

دوهی ل جوانكاریەكێ ڕوونشتی بووم، كچەكا جوان و ڕێك و پێك ل هنداڤی سەرێ من بوو، و پرچا من بویاغ دكر. د هەڕ ناڤبەینەكێ دا تێلەفونەك بۆ دهات یان وێ دكر. جار دایكا وێ یا نەخوش ل مال دگەل دئاخفت، و جار ژی دگەل هندەك جهێن فرۆتنا شرینی و كارگەهێن درۆستكرنا كادان دئاخفت و داخواز ژێدكر هندەك شرینیێن جەژنێ بۆ بهێلن هەتا ڕۆژا پاشتر كریا خوە یا كاری كو بزۆڕی دشێت پێ كارێن خۆ ڕێكبێخت وەرگرت، دا بشێت بچت بۆ مال هندەك ژ وان تشتان ببەت. من ژی ژ دانۆستاندنا دگەل وێ زانی كۆ ئەو بتنێ دمالێدا كار دكەت، و مالێ و دایكا خۆ یا نەخوش بڕێڤە دبەت. و یا بارێ وێ گرانتر دكر ئەو بوو، كو مام و نیاسێن وێ پێ نەخوەشبوو ئەو كار بكەت. ژبەركۆ ئەو ژ بۆهایێ خۆ یێ جڤاكی و ناڤۆدەنگیا خۆ دترسیان.

ئەڤ سەرهاتیا ئەز دبێژم؛ نە یا كچەكێ بتنێ یە دڤی سەردەمی دا، و بتایبەت د جڤاكێن وەكۆ جڤاكێن مە یێن محافزكار دا. بەلكۆ یا بسەدان ژن و كچێن دی یە یێن وەكی ڤێ كچێ و دڕەوشێن جودا جودا دا.

لڤێرە من نەڤێت ئەز بێژم كو "هەموو ژنێن كار دكەن، نە ژنێن خراب و دەهمەنپیسن" ژبەركۆ، ئەڤ بابەتە بخوە تێرا خۆ یێ ئالۆزە ژ بۆ جڤاكەكێ ژ نوی دەمەكە چاڤێن وی ل جیهانێ ڤەبووین، و هێژ یێ شەپرزەیە دناڤبەرا بیرۆباوەر و هزرێن رەجعی، و بیرۆباوەرێن نوی كو دپاكیتێن ئامادە دا وەرگرتین. لێ یا من دڤێت ئەز باس لێ بكەم؛ ئەرێ نها ژن چاوا د ڕوومەت و هەبوونا خوە بگەهن دناڤبەرا؛ "پاراستنا بۆهایێن جڤاكی" ب هەلگرتنا شەڕەف و نامووسا کۆمێ دجڤاكەكێ محافزكار دا ژلایەكی ڤە، **و دسەردەمەکێ نوو دا کو گۆتارا بەربەڵاڤ تێدا "ئازادی و مافێ ژنان دكاركرنێ دا" یە، د بن سیبەرا سیستەمێ سەرمایەدار یێ كۆ مرۆڤ د هەمی ڕەهەندێن وی دا داگیركری و كریە تشتەك "شمەكەك" ؟!.**

"لڤێرە، ژن دكەڤتە دناڤبەرا دوو چەپەران دا كو دوو ڕوویێن ژێك جودا هەنە لێ دخالا خۆ یا گەوهەری دا هەردوو وەك ئێكن، و ژنێ وەك پرۆژەیەكێ مان و گەشەسەندنا خۆ دبینن."

د جڤاكێن محافزكار دا دەركەفتن و كاركرنا ژنێ قەدەغەیە، ژبەركۆ؛ جڤاك وەك گەف ل سەر دامەزراوەیا خێزانی و جڤاكی دبینن، و د جڤاكێن بەرخوەر یێن سەردەم دا بەرەڤاژی ئەم دبینن كو خواستەكا زێدە ل سەر كاركرنا ژنان و دەركەفتنا وان هەیە، ژبەركۆ؛ بتنێ هەبوونا ڕۆخسار و ڕووخوەشیا وان د جهێ كاری دا بۆهایێ خوە یێ بازاڕگەری یێ تایبەت هەیە.

نەخوە ئەڤ پرسگرێكە نەیا تایبەتە بتنێ ب "ژنان" ڤە، ژبەركۆ وەسا دیارە كو بگشتی مرۆڤ دناڤ ڤان سیستەمان دا لگۆڕەی مان و گەشەسەندنا وان دا دئێنە بكارئینان چ ژن یان زەلام، لێ پتر ژن; ژبەركۆ بدرێژاهیا دیرۆكا كەلتوورێن جڤاكی یێن جودا بۆهایێ ژنان بوێ چەندێ هاتیە پیڤان كا تا چ ڕادە ئەو ڕۆلێ ژێ داخوازكری بدروستی دگێرن، نە ب گرنگیا هەبوون و شیان و هزر و دیتنێن وێ وەك مرۆڤ.

دەرئەنجام؛ دیارە ئێك ژ دەردەسەریێن ژنان دجڤاكێن مەدا ئیرۆ ئەوە كو دبنە قوربانیێن دوو گۆتارێن جودا: گۆتارەك كو ژ هەبوونا وێ دتڕسن و ڕەت دكەن، و گۆتارەك كو هەبوونا وێ دخوازن، لێ بمەرجەكی كو دشیاندابت وەبەرهێنان تیدا بئێتەكرن.

ژخوە ئێدی لڤێرە پرسیار دئێتە گۆهڕین: ئەرێ ل هەر جهێ ژن لێ بت، چ دمالدا یا دەرڤەی مال بڕاستی “ژن” د هەبوونا خۆ دا وەك مرۆڤەك خودان ماف و بەرپرسیارێتی یان كارێكتەرەكێ كرێگرتی یە؟! و ئەرێ ژن ژ دەرڤەی ڤان سیستەمان ئانكۆ چ؟!