Kurd Diaspora
ڕامانا دروست یا پارتێن سیاسی ئەوە کو ڕێکخراوێن فەرمینە ژ کۆمەکا هاووڵاتیان پێکدێن، ئەڤێن بۆچوون، بەرژەوەندی و ئارمانجێن سیاسی، ئابووری و کۆمەڵایەتیێن وان ل سەر بنەمایەکێ هەڤپشک یان بەرنامەیەکێ ئێکگرتی بەرهەڤبووین. ئارمانجا سەرەکی یا ڤان ڕێکخراوان ب دەستڤەئینانا دەستهەڵاتا سیاسییە ب ڕێیا هەڵبژارتنان یان هەر ڕێیەکا یاسایی، ژ پێخەمەت جێبەجێکرنا بەرنامەیێن خۆ، بەشدارییکرن د دروستکرنا بڕیارێن گشتیدا، نوێنەرایەتیکرنا دەنگدەران و ئاراستەکرنا ڕایا گشتیدا، دا کو خزمەتا سەقامگیریا وڵاتی و جڤاکی بکەن ل دووڤ دەستووری.
د مەیدانا سیاسی یا هەر وەڵاتەکێدا، چەندین پارتێن سیاسی ب هزر و بیرێن جودا د پێشبڕکێ و کارکرنێدانە ژ پێخەمەت پێشئێخستن و پاراستنا سەقامگیریێ. هەرێما کوردستانێ ژی ژ ئەڤێ چەندێ بێبەش نەبوویە، چەندین پارتێن سیاسی یێن جیاواز هەنە کو ب هزر و بیرێن جودا کار دکەن. یا دیار ئەوە کو هەر لایەک ب هەمی هوشیاری و ڕاستی، و د هەمان دەمدا ب کەمتەرخەمی و خەلەتیێن خۆڤە، خۆ ب خەمخۆرێ نەتەوە و وەڵاتی ددانن.
د ڤێ قۆناغێدا، جڤاکێ کوردی دابەش بوویە بۆ سەر دوو ڕایێن جیاواز سەبارەت ب ڤان پارتان:
لایەنێ ئێکێ: ئەو بەشەنە کو لایەنگریا کورە و بێسنوور هەڵبژارتینە. ئەڤ لایەنە د هەر بارودۆخەکیدا، ب چاڤگرتی ئامادەیی و دڵسۆزییا خۆ بۆ پارتا خۆ دیار دکەن و ئامادە نینن ڕەخنەیێ ل کێماسیان بگرن. ئەڤ دڵسۆزییا بێسنوور دبیتە ئەگەر کو ڤیانا نەتەوەیی د قالبەکێ بچووکێ پارتایەتیێدا بهێتە زیندانکرن، کو ئەنجامێ وێ بتنێ دابەشبوون و پڕبوونا مەیدانێیە ب گرووپگەریێ.
لایەنێ دووێ: ئەو لایەنەنە کو خۆ ب نەڕازی دیار دکەن. ئەڤ بەشە پارتێن سیاسی و جەماوەرێ وان ب بەرهەمێ کەمتەرخەمی و ئاڕاستەیەکێ نەدروست ددانن، و ژ بەر هندێ خۆ ژ هەر چالاکیەکا مەدەنی یان پارتایەتی لاداینە و خۆ ب تمامی جودا کریە. بەلێ بێدەنگیا تەمام یان ب تنێ گۆتن و گازندەیێن بێ مفا ب بێ هەوڵدان بۆ دیتنا چارەسەریێ، نەڕازیبوونەکا ب نەزانین و کورەیە کو چ جاران نابیتە هەوڵەکا دروست بۆ ئاڤاکرنا وەڵاتی.
ئاڤاکرنا نەتەوەیان نە ب لایەنگریا کورە چێدبیت و نە ب گازندەیێن ڤاڵا، بەلکو ب هزر و بیر و هەستا نەتەوەیی یا ب هێز و دروست دهێتە ئەنجامدان. هەمی پارتەکا سیاسی ژ کۆمەکا تاکێن ڤی جڤاکی پێکهاتییە، ب هەمی ڕاستی و خەلەتیێن خۆڤە. چ جاران دڵسۆزییا پارتایەتی ناگەهیتە ئاستێ دڵسۆزییا نەتەوەیی، بەلکو پارت ب تنێ ئامرازەکن بۆ خزمەتکرنا خەڵکی.
كۆمێنت (0)
هێشتا چو كۆمێنت نینن