Kurd Diaspora
دارا سێڤێ ل نیڤا باخچێ مالا مام عەلی بوو، بڕاستی ئەو بتنێ دارەک نەبوو؛ بیرهاتنێن هەمى دەمێن خۆش یێن زارۆکێن گوندى بوو.
ڕۆژەکێ، دەستەکێ ڕەش بسەر گوندی دا گرت. دەنگێ پۆتێن سەربازان و دەستڕێژا چەکێن وان ئارامی هەمی تێکدا. سەرکردەیێ وان مرۆڤەک بوو کو چ دلوڤانی د دلێ وی دا نەبوو، چ مال نەمان ئەو نەچنە دناڤدا و تالان نەکەن، دەما هاتیە د مالا عەلی دا و دیتی ئەو دارا هند جوان یا دناڤ باخچەیی دا، دلێ وی نەگرت ئەو جوانی وەک خۆ بمینیت و دەست دا بڤرەکی و هینگێ ڕاوەستیا هەتا دار ل ئاخێ دایی و ل پێش چاڤێن گوندیان، دارا کەڤنار کرە هزار پارچە، مام عەلی ب دلەکێ شکەستی و چاڤێن پر ژ ئەسرین تەماشەی دارا خۆ یا پارچەبووی دکر و د دلێ خۆ دا دگۆت:
وەکی وێ دارا تە کریە پارچە پارچە
دەستێن تە ژی ببنە هزار و ئێک پارچە...
ساڵ بورین، ڕۆژەکێ دەنگوباس بۆ گوندی هاتن، کو دەستهەڵاتا وی فاشستێ دارا گوندی پارچەکری ب دوماهیک هاتییە، ئەو ب خۆ ژی ب هەمان دەرد چوو، دل و جەرگێن وی ژ ئێشانێ بوونە پارچە پارچە و ب بێکەسی تەرمێ وی کەفتە کۆلانان بێی کو کەسەک هەبێت گۆڕەکێ بۆ بکۆلیت.
كۆمێنت (0)
هێشتا چو كۆمێنت نینن