چوارەمین فیستەڤالا شەل و شەپک و جلوبەرگێن کوردی

جوداترێ ژ سالێن بۆری، ب ئامادەبوونا سەرۆک مەسعود بارزانی ل ژێر دروشمێ (وەلات دایکە و کەلتوور ناسنامەیە) ل ١٠ خزیرانا ٢٠٢٦ ئەڤ فیستەڤالە هاتە ئەنجامدان.

ل سالا ٢٠٢٣ پشتی نویژەنکرنا قشلا زاخۆ ئێکەمین فیستەڤالا جلوبەرگێن کوردی ل زاخۆ هاتە ئەنجامدانێ ژ بۆ ماوەیێ دوو ڕۆژان ل ٢٥ و ٢٦ ئەیلوولێ.

د وێ فیستەڤالێدا ژ هەرچار پارچێن کوردستانێ تیپ و گرۆپ و شێوازێن ل بەرکرنا جلوبەرگێن کوردی یێن دەڤەرێن کوردستانێ بەژدارببوون، پشتی کو بوویە جهێ سەرنجێ و خەلکەکێ زۆر سەرەدانا زاخۆ کری و بوویە ترێندەکا دەڤەرێ د سۆشیال مێدیا و ڕاگەهاندنا کوردی دا ئێدی ئەڤ بەڕنامێ فیستەڤالێ ژ بۆ سالێن دویفدا ژی هەر ب وی ڕەنگی و بەرفرەهتر بەردەوامبوو ژ بۆ سالێن ٢٠٢٤،٢٠٢٥،٢٠٢٦.

ئەو ڕەهەندێ چوارەمین فیستەڤالا شەل و شەپکان کو ل هەردوو ڕۆژێن بۆری جوداکری ژ فیستەڤالێن دەربازبووی ئامادەبوونا ڕێزدار سەرۆک مەسعود بارزانی و کەسایەتیێن دگەل دا بوون کو بوونە ئەگەرێ پالدانەکا مەزن یا مەعنەوی بۆ فیستەڤالێ و هاندانا هەمی کوردستانییان ژ بۆ پشکداریکرنێ د فیستەڤالێن بهێت دا، ئەڤجا فیستەڤال بتنێ وەک ترێندەکا دەڤەرێ نەما و دەربازبوو ژ بۆ ترێندەکا سەرتاسەری پارچێن کوردستانێ و بوویە جهێ سەرنجا دەولەتێن دەوروبەر ژبەرکو سەرۆک بارزانی ب ئامادەبوونا خۆ سەنگەکا جودا پێشکێشی ڤێ فیستەڤالێ کر و ڕەنگە ل سالێن داهاتوو دا وەکو فیستەڤالەکا نیڤ دەولەتی بهێتە نرخاندن.

گرنگییا ڤێ فیستەڤالێ د وێ چەندێدایە کو ساخکرنا فلکلۆر، کەلتوور و بلندڕاگرتنا ناسناما مللەتێ کوردە. ژبەرکو ئامادەبوویێن ڤێ فیستەڤالێ ب ڕێژەیا هەرە زۆر گەنج بوون و ڕەنگە سێ چارێکێن وێ ژ کوڕ و کچێن هەرچار پارچێن کوردستانێ بن. ئەڤجا ئەڤ گەنجێن پشکدار زانیاریێن کرداری ل سەر کەلتوورێ خۆ وەردگرن و ئاشنای شێوازێن لبەرکرنا جلوبەرگێن کوردی یێن هەمی کوردستانێ دبن، د ئەنجامدا ئاشنابوونا ڤان گەنجان ب پڕەنسیپ و ئادابێن مللەتێ وی و بلند نرخاندنا وێ دبیتە ئەگەر بۆ پاراستنا ڤان بهایان و بلند ڕاگرتنا وان و وەکی پیرۆزیەکا نەتەوەیی بەرێخۆدانێ بۆ بکەت. هەروەسا پەیوەندیێن بەرفرەهـ و نوی پەیدا دبن ژ ئەنجامێ کۆمبوونا وان ل ئێک باژێر و وێ پێشوازییا گەرم یا ل ئێکدو دکەن و پەیوەندیێن خۆرت دروستدبن ب ڤی ڕەنگی فرەڕەهەندییا ریتمێ دیتنێ دەردکەڤیت ئانکو گەنج نابیتە گەنجەکێ باژێر پەرست بەلکو دیتنێن وی بەرفرەهتر دبن و ئالوگورکرنا د ناڤەبەرا باژێرێن جوداجودادا دکەت و نێرینێن وی دویرتر و کویرتر دبن.

ئەو باژێرێن پشکداری د فیستەڤالێدا کرین:

• مێردین
• ئامێدی
• بارزان
• هاورامان
• شاریا
• قامشلو
• ڕەواندز
• سۆران
• سلێمانی
• هەولێر
• دهۆک
• ئاکرێ
• کەرکووک
• هەلەبجە
• زاخۆ

هەروەسا تیپێن هۆنەری یێن پشکدار وەکی:

• نیجێریا
• ئەرمینیا
• ڕۆژهەلات
• باکوور
• باشوور
• ڕۆژئاڤا
• گەلەک جهێن دیتر