د خەلوەیا مندا

من ژ ڤێ ژیانێ چ وانە نەگرتن،
چ پەیڤان ئەز فێر نەبووم،
ژ بلی پیتێن ناڤێ تە.
لەوڕا دەستپێکا هەمی:

• هەلبەست
• چیڕۆک
• پەیڤ و گازندەیێن من

ب پیتا ناڤێ تە دەست پێ دکەت.

ژ ڤێ ژیانێ من چ وانە نەگرتن
ژ بلی عەشقا تە،
حەز و ڤیانا شوینوارێن تە.
هەردەم دوبارە دکەم پەیڤێن تە.
من دزانی ئەز یێ پاراستی بووم
ب لاڤەیێن تە...

نوکە ژی، هەردەمێ
دچم د میحرابا عەشقا خودێ دا،
دبمە:

• عاشقەکێ ڕێ بەرزە کری
• بولبولەکێ گول بەرزە کری
• صوفییەکێ مەلیل
• مریدەکێ بێ طەریقە..

ب سالان دمینمە د خەلوەیا خوە دا..
لێ ب تنێ ب دەستێن بلند ڤە گازی دکەم ب ناڤێ تە.

بەلکی جارەکا ب تنێ ژی
ژ بانێ بلند خودایێ دلۆڤان،
ب ڤیان تەماشەیی دەستێن من یێن ڤالا بکەت..
دەمی:

• بڕاوەستینیت
• یان بزڤڕینیت
• یان من بینیتە دیدارا تە...