دووماهیک پەیڤ

دەما من چاڤێن خۆ ڤەکرین سپێدە بوو، دیسان من هەست ب بێزاریێ کر، چونکە تاڤ هنداڤی من بوو و گەلەک گەرم بوو. ئەز ڕابووم بەرەڤ پەنجەرا خۆ چووم و ل سەر دیوارێ پەنجەرێ ڕوونشتم. ژ نیشکەکێ ڤە من دەنگەک بهیست و گۆتە من: "تۆ بۆچی شڤێدی ل بەر گەرماتیا من نڤستی؟ مانێ تۆ حەژ من ناکەی؟"

من ب دەنگەکێ لەرزۆک و ب ترس ڤە بەرسڤ دا: "ئەز ل بەر گەرماتیێ نڤستم چونکە ستێر گەلەک د جوان بوون، من هەست ب ئارامیێ کر و ئەز نڤستم."

تیرۆژکێن رۆژێ پرسیارەکا ب زەحمەت ژ من کر و گۆت: "ئەرێ هین مرۆڤ دشێن ل وەرزێ زڤستانێ هەمی دەمان ب شێوەیەکێ زەلال ستێران ببینن؟"

بۆ ماوەیەکێ مام بێدەنگ و پاشان من بەرسڤ دا: "نەخێر، ئەم هەمی دەمان نەشێین ستێران ب جوانی ببینین ل وەرزێ سەرمایێ، بەرۆڤاژی هاڤینان کو گەلەک ب جوانی دبینین."

تیرۆژکێن رۆژێ بەرسڤ دا و گۆت: "ئانکۆ تۆ شڤێدی ب دیتنا ستێران ئارام بووی؟"

من بەرسڤ دا و گۆتێ: "بەلێ، گەلەک ئارام بووم، لێ تە بۆچی ئەڤ پرسیارە ژ من کر؟"

تیرۆژکێن رۆژێ بەرسڤ دا و گۆت: "چونکە هەمی مرۆڤ دگەل هەڤدوو ناگونجن، لێ وەرزێن سالێ دگەل هەمی تشتان و هەمی کەسان دگونجن. سەرەڕای هندێ کو چێدبیت گەلەک هەبن وەکی تە کەرب ژ من ڤەبن، بەلێ من کەرب ژ کەسێ ڤەنابن و ئەز هەمی بزاڤان دکەم دلێن وە شاد بکەم؛ ب دەنگێ بالندەیان، دەنگێ ڕوویباران، و ب ڕەنگێ هەیڤ و ستێران."

من بەرسڤ دا و گۆت: "تۆ ڕاست دبێژی ئەی تیرۆژکێن رۆژێ، لێ ئەز چ بکەم گەلەک حەژ سەرمایێ دکەم!"

تیرۆژکا رۆژێ دیسان پرسیارەک ژ من کر و گۆت: "تۆ پتر ژ هەمیان حەژ کیشک فێقی دکەی؟"

من ژی بەرسڤ دا و من گۆتێ: "ئەز گەلەک حەژ هژیران دکەم، بۆچی؟"

تیرۆژکێ بەرسڤ دا و گۆت: "چونکە هەمی سالان دگەل هاتنا من، ئەو فێقیێ تۆ حەژێ دکەی بەرهەم دهێت و تۆ خۆشیەکێ ژێ دبەی ب خوارنا هژیران و ب دیتنا ستێران. کا چەوا ئەم وەرزێن سالێ جوداهیێ ناکەین د ناڤبەرا مرۆڤان دا، و کا چەوا هەر مرۆڤەک گەلەک حەژ فێقیەکێ تایبەت بۆ خۆ دکەت، ئەم وەرزێن سالێ دهێین و وان فێقیان پێشکێشی هەوە دکەین، هین ژی نابیت جوداهیێ بکەن د ناڤبەرا مە وەرزان دا."