جوانکاریا ئاخفتنێ و پەیوەندیێن جڤاکی

د شێوازێ کارکرن و خزمەتکرنا مە دا ئەڤجار چ ل جهێ کاری بیت یان ل ناڤ ژیانا ئاسایی، زانستێ جوانکاریێ بۆ مە پێدڤییە، و تام و چێژەکا دی ل کار، کریار، ئاخفتن و ڕەفتارێت مرۆڤی زێدە دکەت.

بۆ نموونە، ل دەمێ مرۆڤ ئاڤەکێ دکریت، مرۆڤ دشێت ب گەلەک ڕێکان بێژێتێ: تو دشێی ب دەنگەکێ ڕەق و نەرێک و پێک بێژیێ «کانێ ئاڤەک؟»، و تو دشێی ژی ب تۆنەکێ گونجای، نەرم و نازک بێژیێ «زەحمەت نەبیت، تە ئاڤەک دابا من». هەر ئەو دەمە و چ ژ مرۆڤی کێم نابیت، بەلێ بەرۆڤاژی، مرۆڤ ب سەنگ دکەڤیت و ژیانێ شیرین دکەت د کۆمەلگەهی دا.

جوانکاریا کریار د ناڤ مالێ دا

نموونەکا دی د کریاران دا: ئەگەر کابانیەک رابیت ب چێکرنا زەلاتەکێ، دشێت هەر باجان سۆرکەکێ یان خیارەکی و ئەو تشتێت دکەتە د ناڤ دا، هەما بکەتە چەند پارچە و ب هەڕەمەکی باڤێژیتە تێدا، و چێدبیت هەڤسەنگیا خوێ ژی نە یا درست بیت و ببیتە جهێ گازندێن خوارنڤانان. بەلێ د بەرامبەر دا، دشێت ب جوانی، هەمی ئێك قەبارە، دیکۆرەکێ جوان و دابەشکرنا ڕەنگێت وان کەرەستان — بۆ نموونە چێکرنا ئالایێ پیرۆزێ کوردستانێ دگەل سفرا خوارنێ — کار بکەت. هەروەسا هزر د هندێ دا بکەت کا چ تام و بەهارات دێ زەلاتا وێ هێشتا خۆشتر و بێهنخۆشتر لێ کەن، و هەتا ئینان و دانانا سەر سفرێ ب هندەک لڤین و شێوێت جوان دانیت، کو دیمەنەکێ جوان بۆ چاڤێت کەسێت ل هیڤیا وێ خوارنێ دروست کەت.

جوانکاریا دەڤەرێ و شۆڕەشا لۆکالی د ئاڤەدانکرنێ دا

دیسان نموونەکا دی یا زیندێ: ئەگەر سەحکەینە وان گەڕەک و گوندێت کەڤن و دێرۆکی ل وەلاتێ ئیتالیا یان یونانستانێ، دێ بینین چەند جوان ب ڕەنگان ڕێکخستینە و هندەک دیمەن ژێ دەرێخستینە! هەما هەر مرۆڤ دشێت سەحکەتێ، ب مەزاختیەکێ کێم یان بێ بەرامبەر، بتنێ ب ڕێکا دانانا هەلەکێ بۆ هندەک بەهرەمەند و قوتابیێت هۆنەرێ شێوەکاری وەک چالاکی و وانا کرداری ب وان کاران ڕاببن.

د بەرامبەر دا، ل گوند و باژێرێت مە ب سەدان کۆڵان، گەڕەک و گوند یێت هەین — وەکی تاخێ جهیان ل زاخۆ، تاخێ شێلێ ل دهۆکێ، و هەروەسا ل ئاکرێ و هەمی دەڤەر و دەڤەرۆکێت کوردستانێ — کو بتنێ ب هندەک بزاڤ و چالاکیێت سادە دێ هێنە گوهۆڕین، ئەگەر ئیرادا کارکرنێ، هەستێ جوانیێ و جوانکاریێ هەبیت.