دەستپێکا ساڵا نوو یا خواندنێ قۆناغەکا هەستیار و پڕ ژ گۆڕانکارییە، نە بتنێ بۆ زارۆکی بەڵکو بۆ هەمی خێزانێ. بۆ هندێ کو ئەڤ قۆناغە ب سەرکەفتن و ب بێ ترس و نێگەرانی دەست پێ بکەت، پێدڤییە دایک و باب ژ لایێ دەروونی، جەستەیی، رێکخستنا ژینگه‌ها مالێ و پەیوەندیکرن ب قوتابخانێ ڤە ئامادەکاریێن تەمام بکەن.

ئامادەکرنا دەروونی و جەستەیی

دەستپێکا ڤێ سەرکەفتنێ ژ ئامادەکرنا دەروونی و جەستەیی یا زارۆکی دەست پێ دکەت. نێزیکی هەفتەیەکێ یان دوو هەفتەیان پێش ڤەبوونا قوتابخانان، ڕێکخستنا دەمێ نڤستن و رابوونا زارۆکی دەستپێکەکا بنەڕەتییە، دا کو ب شەڤ زوو بنڤن و سپێدێ ب ئارامی و هێز ڤە ڕاببیت. هاروەسا دگەل ڤێ، ئاخڤتنا ئەرێنی دەربارەی قوتابخانێ، مامۆستایان، دروستکرنا هەڤالێن نوو و بەحسکرنا تشتێن خۆش حەزا چوونا قوتابخانێ ل دەف زارۆکی دروست بکەن، کو ڕێگریێ ل ترس و نێگەرانیێ دکەت. هەروەسا كێمکرنا بەرەبەرە یا بکارهێنانا مۆبایل و ئامێرێن ئەلەکترۆنی هاریکاریا مێشکێ زارۆکی دکەت، دا کو تەرکیزا خۆ ڤەگەڕینیتەڤە سەر ئامادەکاریێن خواندنێ.

ژینگەها مالێ و پێداویستیێن خواندنێ

ل سەر ئاستێ ژینگه‌ها مالێ و ئامادەکرنا کەرەستەیان، پشکداریکرنا زارۆکی د کڕینا پێداویستیێن قوتابخانێ دا وەکی جانتا، پەرتووک و کەرەستەیان، و ئازادکرنا وی د هەڵبژارتنا ڕەنگ و شێوازێن حەز ژێکری دا، ئارەزو و جۆشەکا مەزن ل دەف دروست دکەت. هەروەسا دەستنیشانکرن و دروستکرنا جهەکێ ئارام، روون و دوور ژ دەنگەدەنگ و تەلەفزیۆنێ ل مالێ، زارۆکی فێر دکەت کو جهەکێ دیارکری هەبیت بتنێ بۆ تەرکیزکرنێ و ئامادەکرنا ئەرکێن ڕۆژانە.

ساخلەمی و خوارنا دروست

ساخلەمی و لایەنێ جەستەیی ژی ڕۆلەکێ مەزن دگێڕیت د سەرکەفتنا ئاستێ خواندنێ دا. پشتڕاستبوون ژ خارنا تێشتێ بەریا چوونا قوتابخانێ، وزە و تەرکیزەکا باش ددەتە مێشک و جەستەیی بۆ دەستپێکرنا ڕۆژێ. ئامادەکرنا لفکەکا ساخلەم بۆ دەمێ بهێن ڤەدانێ، وەکی فێقی، گیز، بادەم و ئاڤێ، و دوورکەفتن ژ شرینی و بەرهەمێن دەستکرد، ژیراتی و ساخلەمیا زارۆکی دپارێزیت. هەروەسا ئەنجامدانا پشکنینا چاڤ و گووھان ل دەستپێکا سالێ، ڕێگریێ ل هەر کێشەکا نەدیار یا دیتن یان گووھلێبوونێ دکەت، کو رەنگە کاربکەتە سەر تێگەهشتنا وی د پۆلێ دا.