تشتەک ب ناڤێ حەژێکرن و ڤیان نەمایە؛ بتنێ ژبەر کو ئەو باشترین هەڵبژارتنە بۆ وان د وی دەمی دا. د راستی دا ئەو د غیابا ژیانا ئێکودوو دا ناژین، ژ بەر کو د بچووکترین کاودانێن خراب و نەخۆشییان دا، یان ژی ل هەمبەر هەڵبژارتنەکا دیتر یا باشتر، دێ دگەل مرۆڤی هێنە گوهۆڕین. ئەگەر تۆ ب ڤی ڕەنگی بی و خۆ د تنێبوونێ دا ببینی، بزانە ئەو تۆ یێ ل کویراتیا بێ‌ڤیانیێ دا دژی.

ئەڤە وێنەیێ سەردەمەکێ تازەیە کو تێدا پەیوەندیێن مرۆڤایەتی بووینە قوربانییا بەرژەوەندی و لەزاتییا ژیانێ. دەمێ ڤیان دبیتە ئەگەرەک بۆ پڕکرنا بۆشایییا دەمکی یان هەڵبژارتنەک ژ بەر نەبوونا بەدیلەکێ باشتر، ئیدی ناڤێ وێ نابیتە حەژێکرنا ڕاستەقینە، بەلکو دبیتە «پەیوەندییا مەڕجدار».

ستوونێن دەروونناسییا حەژێکرنێ ل بەرامبەر بڕیارا بازرگانی

د دەروونناسیێ دا، حەژێکرنا دروست ل سەر سێ ستوونێن سەرەکی ئاڤا دبیت:

• پشتەڤانییا دەروونی
• سۆزداریا بێ‌مەڕج
• بەردەوامی و خۆڕاگری د تەنگاڤییان دا

دەمێ کەسەک ل دەمێن نەخۆش دا پاشڤە دچیت یان ل دۆرگەڕا هەڵبژارتنەکا نوی دا ل تە دگوهۆڕیت، ئەڤە نیشانا هەرەسین و سستییا بنەمایێ وێ پەیوەندیێ یە؛ پەیوەندییەک کو ل دەمێن خۆش ب مەرج دگەل مرۆڤی یە و ل تەنگاڤییان دا مرۆڤی پشتگوهـ دهاڤێژیت.

فەیلەسۆف و دەروونناسێ بناڤودەنگ ئێریک فرۆم (Erich Fromm) د پەرتۆکا خۆ یا بناڤێ «هۆنەرێ حەژێکرنێ» (The Art of Loving) دا دیار دکەت کو حەژێکرن نە بتنێ هەستەکێ دەمکی یە، بەلکو بڕیارەکا ب هۆش و ئیرادەیە. بەلێ د سەردەمێ مە دا، ئەڤ بڕیارە بوویە کریارەکا بازرگانی و سۆشیال میدیایی، کو تێدا مرۆڤ وەک کەلوپەل دهێنە هەڵسەنگاندن؛ هندی تۆ بۆ وان ب مفا بی دێ جهێ تە ل دەڤ وان هەبیت، و هەر دەما کار ب تە نەما، وەک کەرەستەیەکێ کەڤن دێ تە هاڤێژنە لایەکی و ژ بیر کەن.

وەک دەروونناسێ مەزن کارل یونگ (Carl Jung) دبێژیت: «ل هەر جهەکێ بەرژەوەندی و حەزا دەستهەڵاتێ لێ دیار بوو، ڤیانا ڕاستەقینە دێ ل وێرێ مریت.»

«ڤیانا شل» و کەلتوورێ بەکاربردنێ (کۆنسۆمەریزم)

زێدەباری ڤێ چەندێ، جڤاکناسێ بناڤودەنگ زیگمۆنت باومان (Zygmunt Bauman) ئەڤی سەردەمی ب چەمکێ «ڤیانا شل» (Liquid Love) وەسف دکەت؛ جیهانەک کو تێدا سۆشیال میدیایێ و کەلتوورێ کۆنسۆمەریزمێ (حەزا مەزاختن و تەلفکرنا بەردەوام) کۆنترۆلا ژیانا مرۆڤان کرییە.

ئۆپشن و هەڵبژارتنێن بێ دووماهی یێن پشت شاشەیان، وەهمەک ل دەڤ مرۆڤی چێکریە کو هەمی دەمان ئەلتەرناتیڤەکا باشتر یا هەی؛ ژ بەر ڤێ چەندێ، ب پەیدابوونا بچووکترین ئاریشە د پەیوەندیێ دا، ل شوینا هەوڵدان بۆ چارەسەری و ئاڤاکرنێ، ئێکسەر دەستبەرداری کەسێ بەرامبەر دبن، ڕێک وەکی چەوا کەرەستەیەکێ کەڤن ب ئێکێ نوی دگوهۆڕن.

ڕەنگڤەدانا قەیرانێ د جڤاکێ مە دا

ل جڤاکێ مە ژی ئەڤ ئینقلابا سۆزدارییا مۆدێرن ب ڕەنگەکێ ڤەشارتی کارتێکرنێ ل سەر مە دکەت. د سەردەمێ بەرێ دا بنەمایێ پەیوەندییان و هەڤژینیێ ل سەر ئارامی، وەفاداری و هەڵگرتنا بارێ ئێکودوو د تەنگاڤییان دا بڕێڤە دچوو؛ بەلێ ئەڤرۆ ژ بەر کارتێکرنا ژیانا چاڤلێکرنێ و پێشبڕکێیا مادی یا ناڤبەرا خەڵکی دا، بەشەکێ مەزن ب چاڤێ کڕین و فرۆتنێ (حساب و کتاب) بەرێ خۆ ددەنە پەیوەندییان.

د هەمان دەم دا، پەیڕەوێ جڤاکی زۆربەی جاران ڕێزێ ل شکۆیا تاکەکەسی و ڕاستگۆییێ ناگریت ئەگەر بهایێ وی یێ مادی یان پێگەهێ وی یێ جڤاکی بەرز نەبیت. ئەڤ چەندە بوویە ئەگەر کو گەنج ژ ترسێن کویر یێن پێگیربوونێ (پابەندبوونێ) بڕەڤن و ژیانا سۆزداری بتنێ وەک ئامرازەکێ پاراستنا بەرژەوەندیێن کەسۆکی ببینن.