ڤیانەک و هزار پەرژان

ب هەمی هیڤیان ڤە، بۆ جارا دووێ دەستێ خۆ بەرەڤ وی بر، لێ ئەوێ جارێ ژی بەری بگەهیتە وێ حەسرەتێ، دەستێ خۆ کێشا و هێدیکا زڤری. چ ڕۆژان وەک وێ ڕۆژێ نەکەفتبوو د ناڤ گێلەشووکا دوودلیێ دا، ئەو دوو دلیا ژ هەمی لایان ڤە ڕێکا ئارمانجێ ل بەر بەرزە دکر. وێ هزر دکر بتنێ هندەک ئاشۆپن وێ د سەر دا دبەن، هەروەکی هەر ڕۆژ دیار دبن، یان ژی دبیت کارتێکرنا گەرما ڤێ هاڤینێ بیت کو هزر و بیرێن وێ ژی وەکی خۆ هشک کربن.

سێ بارە وێ تبلێن خۆ ل دور بەژنا ئەڤینا خۆ زڤراندن، بەلێ هەروەکی بێژی ئەوێ ئەڤینێ چ ڤیان بۆ وێ نینە و خۆ ژ داڤێن وێ ڤیانێ قورتال دکەت، سەرەڕای وێ ڤیانا زێدە یا وێ بۆ هەیی. دێمێ وی یێ تیژ، ب خەمل و بکارێ بەهیچنا خۆ ب ڕەشیپۆشی هزرا وێ بۆ خۆ ڕادکێشا، بەلێ سەرڕەقیا وی بوو ئەگەرێ دەستداهێلانا "خوزیک"ێ ژ نێزیکبوونا وی. وێ بڕیار دا بۆ دەمەکی ژێ دوور بکەڤیت، بەلکی بگەهیتە ڕێگەچارەیەکێ...

ل دەما ئەو بۆ ماوەیێ چەند خولەکان ژێ دوور بوی، هزرەکێ خۆ ل مێشکێ وێ کرە مێهڤان و وێ پست پستەک دگەل ناخێ خۆ کر و گوت: "نەکە ئەو ژ بەر لاپتۆپی یێ توڕە بویی! ژ بەر کو ئەز ڤان ڕۆژان زۆر ب کار دئینم و ل نێزیکی ویمە، و هزر دکەت من ئەو ل پشت گوھ هاڤێتیە، یان ژی دبیت موبایل د دەستێ من دا دیتبیت و هزر کربیت ئەز گرنگیێ پێ نادەم و من یێ ژ بیر کری... ئۆۆۆف، دێ چارەسەریا ڤێ دەردەسەریێ چ بیت؟"

سەرەڕای دووربوونێ و دانا دەمی، ئەو پێک نەهاتن. خوزیک یا هندەک خوزیێن بەرزە و بێ بەرسڤ دخوازیت دا کو بگەهیتە چارەسەریەکێ و ڤێ ئاتافێ ب دوماهیک بئینیت.

ل ڕۆژەکا پایزی، خوزیک د بێهیڤیبوونێ دا حێچ ببۆ و نەدزانی چەوا چرکە، خولەک و دەمژمێرێن خۆ ب بورینیت. تەماشەی ئێک ژ بەرنامەیێن زانستی دکر، بێی کو ئاگەھ ژێ هەبیت کو ئەڤە ئەو بەرنامەیە یێ کو دێ بەرسڤا وێ یا چەندین ساڵە د مێشکێ وێ دا ئاسێ مایی دەت. تەماشەکرنا بەرنامەیێن ژ ڤی جۆری چ جاران وەکی وی دەمی ئارامی ب وێ نەبەخشی بوو.

ل دەمێ ئێک ژ زانایێن کو ل وی بەرنامەی ئامادە، بابەتێ کارتێکرنا ڤیانێ ڤەکری، هەروەکی هزار کەس یێن بەرێ خوزیکێ ددەنە شاشەیا تەلەڤزیۆنێ و یا گوهداریێ دکەت. زانایێ مێهڤان دیار کر کو: "ل دەمێ دوو ڤیانبەخش نێزیکی ئێک دبن، ب ڕێژەیەکا دیارکری ڕادێ بکارئینانا مێشکێ وان کێم و ئالۆز دبیت و ب دروستی کارێ خۆ ناکەت، ژ بەر ڤیانا زێدە."

خوزیکێ دگەل گوهلێبوونا ڤان پەیڤان، ئێکسەر قەستا ژوورا خۆ یا نڤیسینێ کر و هەول دا دووبارە خۆ تاقی بکەت. دەستێ خۆ بۆ جارا گەلەکێ گەهاندە ڤینا خۆ، دا کو هەڤپەیڤینەکێ دگەل بکەت و بگەهنە چارەسەریەکێ... لێ دگەل گوهلێبوونا دەنگێ زەنگا دەرگەهی، ڕێکا هەڤپەیڤینێ دووبارە گوهارت، و ڤینا وێ، کو پێنوسێ وێ بوو، ژ دەستی کەفت.

جارەکا دی حەسرەتا وێ ما د دلی دا، و هێش یا ب ژڤانە بگەهیتێ..