دونیا هەمی دبیتە ئێک
ئەم ژێکڤە دبینە ئێک ئێک
ئەڤە نە خەونا مە بوو
مە چجار نەخواست ئەڤ ڕێک

ڕێکا مە ئازادی بوو
ئێکبوون و سەربەستی بوو
لێ هەر پرت و بەلاڤ دبێن
ئەڤ نە خازیا خانی بوو

هەر کەسەک چوویە لایەک
مە نەما باب و دایەک
کوردستانێ بکەنە ئێک
ئێک وەلات و پارچەیەک

ئەڤرۆ هیڤی بوونە کۆل
ژ جوداهیێ چاڤ مانە زل
دونیایێ ڕێکا خۆ دیت
ڕێکا مە ما زخت و زل

گۆتنا مە نەبوو ئێک پەیڤ
شەڤ لمە تاری بوو، بێ هەیڤ
مە ئارمانج هەر ئێکبوون بوو
ئەڤرۆ وەندابوو بۆ تەیف(سیتافک)

بۆ ڤێ خۆرت و عەگیدا
خەبات کر وەکە مریدا
ڕێتن گەلەک ڕۆندک و خوین
کا بەرهەمێ شەهیدا

مە هەبوون پادشاهـ و میر
زانا و شەهرەزا و وەزیر
دەولەت و شارستانی
ئەڤرۆ کرێچی و ئێخسیر

مە خاست سەمفۆنیەک ئێک دەنگ
ب ئامیرێن هەمە ڕەنگ
بۆ سروودا ئێکگرتن
ل تەڤ جیهانێ دابا دەنگ

لێ مخابن گازیا مە
پێ نەهات داخوازیا مە
بۆ ئەڤرۆیا پڕ برین
ئەڤرازی بۆ رێکا مە

بۆ سۆبە دکەین گازی
دەست بدەین هەڤ ب نازی
دا ڤێ ژینا پڕ فهێت
بڕەڤینین بسەر فەرازی

سروودا مە یا ڕەنگین
یا پڕی ئەڤین و ژین
ما هەژار و بریندار
تەڤدا بۆ ژان و بڕین