شیرەت و پەند

مروڤێن ئاقل و زانا
ژفێربونێ قوتابخانەکە
دەرس وسەربورێن ئەوانا
بوژیانێ خزینەکە
حوكمەتن گوتنێن وانا
بخوینەو خو ژێدیر نەکە
بیە دوستێ باخچەڤانا
بێهنا گولاڤا لخو نەکە
تێکەلیا ئاسنگەری بکەی
ژدووکێلێ خو عاجز نەکە
ئاسنێ بو ئاڤاهیا
لبەر بارانێ ژەنگی نەکە
ئەگەر چویە ناف دیوانا
بگوتنێت کرێت خو سارنەکە
ئەوکەسێ مافێ تە بخوت
هشیاربە باوەر ژێ نەکە
یێ گوتنا بڤە گوهێزیت
دلێ خو بو خالی نەکە
ئەوگرێکا مەزن ڤەدکەن
برێزبە و مایێ خو تێنەکە
رویبار بوش بو کەتە پێلا
مەلەڤانیا لناف نەکە
ئەوکانیا تە ئاف ژێ ڤەخار
بپارێزە شێلی نەکە
هنگڤینێ ئەسلی بکری
پیڤەر خودانە ژبیرنەکە
بازرگانێ لتەبکەت فێلا
بازاری ئێدی دگەل نەکە
تەپکەکێ بو ئێکی بکولی
بکەڤیە تێدا هەوار نەکە
ئەگەر نەشێی بکەی باشی
خەلەتی و شاشیا نەکە
ئەگەر تەچاند توڤێ ستریا
دناڤدا خو پێخاس نەکە
ئاخفتنێن شەری نەبێژە
ئاگرێ فتنێ هل نەکە
لێ بورین مەزناتی یە
ژکەسێ خو بلندتر نەکە
یێ رابردویەک رەش هەبیت
پشتا خو قەت پێ گەرم نەکە
بویە بەرپرس بەرپرسیاری
مافێ کەسێ بەرزە نەکە
یێ دگەل بوچوناتە نەبیت
ب خیانەت گونەهبار نەکە
ئێک گرتن هێزو شیانە
دوژمنا لسەر خو زال نەکە
ئەو شاشیا لدەف تە هەبیت
کەسێ بوێ تومەتبار نەکە
دگەل نەزان و نەگوهدارا
چجارا گەنگەشێ نەکە
دهەر تورەکرنەکێ دا
بریارێ نەدەو دەرنەکە
تونەشیای راستیێ بێژی
راستی بێژی تورەنەکە
خودێ کەرەمەک دگەل تەکر
ژین هێلانە خو قەلس نەکە
تانەگەهیە باوەریێ
ژهەمی گوتنا باوەرنەکە
هەتا فێقی باش نەگەهیت
بێ تامە و ژبنێ نەکە
شولێ ئەڤر بوسوباهی
نەهێلە و گیرو نەکە
ل جهەکی بویە مێڤان
هەتا درەنگ خو شر نەکە
هەڤالێ تە بیتە مرید
ژداخازیا بێزار نەکە
ئەوێ چاکیەک لتەکر
دگەلدا خو بێ وەفا نەکە
ئەگەر مایە رویس و برسی
خو هەوجەی نەمەردا نەکە
ئەگەر تە نانێ ئێکی خار
بوتە شەرمە لومە نەکە
ستەم لێکەربە دەربدەربە
زولم و زورداریێ نەکە
ژهەبونا مال و سەروەتی
قەبری تەنگ و تاری نەکە