روناهیا مالێ و بهایێ وماندیبوون

دەیکا سینەمێ هەناسەکا درێژ هلکێشا دەمێ بەرێ خۆ دایە دەمژمێرێ یا ژ دوازدەی شەڤێ دەرباز بووی؛ ئانکو شەڤ یا ب نیڤی بووی. ژ کارێ مالێ ب دوماهی هاتبوو و گەلەک یا ماندی بوو. ژ بەرکو سپێدێ وەرە یا ل سەر پێیێن خۆ یێن ب ئێش ڕاوەستیای بوو بۆ کارێن پاقژکرنێ، چێکرنا هەر سێ دانێن خوارنێ، شیشتنا ئامان و جلکان، و ڕاکرنا پاشمایکێن زارۆکێن خۆ.

هەردوو کچێن وێ یێن گەنج ل هولا مالێ ڕوونشتبوون. کچا مەزن کو ناڤێ وێ "سینەم" بوو، یا رونشیتی بوو و تەلەفۆنا وێ ل بەر چاڤێن وێ بوو. کچا بچیک ناڤێ وێ "شیلان" بوو

شیلان ێ ژی ب دەنگەکێ بلند دگەل هەڤالا خۆ ب تەلەفۆنێ دئاخفت و دکرە کەنی. دەوروبەرێن وان تژی ببوون ژ کاغەز، چپس، و پەرداخێن شینا قەهوە، چای و ئاڤێ.

دەیکا وان ب دەنگەکێ نزم و ماندی ڤەگۆتێ: دەی کچێن من خودێ هەوە بپارێزیت رابن هندەک هاریکاریا من ژی بکەن.. هەما ئەڤان پەرداخان ڕاکەن و پاقژ کەن، پێیێن من گەلەک دئێشن، وەختە دێ شکێن."

سینەمێ بێی کو چاڤێن خۆ ژ شاشەیا تەلەفۆنێ ڤەکەت، ب دەنگەکێ کێم گۆتێ: "تنێ تە ئەم بۆ شۆلی دڤێین! بلا تە ئەم نەئینابان، خۆ ئەم خزمەتکارێن تە نینین. پا کارێ تە چییە؟ ما ئەڤە نە کارێ تە یە؟ ب خودێ ئەز یا ماندی مە، نوکە ژ دەوامێ زڤریمە ڤە."

شیلان ژی کو هێشتا یا ب تەلەفۆنێ دئاخفیت، ب ئیشارەتا دەستی گۆتە دەیکا خۆ دەنگێ خۆ بلند نەکەت دا کو ئاخافتنا تە نەچیتە گۆهێ هەڤالا من. ب مخابنی ڤە، چ ڕێزگرتن بۆ ماندیبوونا دەیکا خۆ نەبوو.

دەیکێ چ بەرسڤ نەدان. ڕوندکەکا گەرم ل سەر ڕوویێن وێ هاتە خوار. چوو د ژوورا خۆ ڤە و دەرگەهـ گرت. ڕوونشتە خوار و دەستێن خۆ بۆ ئەسمانی بلندکرن. دلێ وێ یێ تژی بوو ژ کۆڤانان. د دلێ خۆ دا گۆت:

خودایێ من.. من ژیانا خۆ کرە قوربان بۆ مەزنکرنا وان. خەما من نە ماندیبوونە، تنێ خەما من کێم ڕێزیا وانە کو دلێ من دکەتە ئاگر و ئەز پێ دسوژم.

ڕۆژا پاشتر، دەیکا وان هزرا خو کر گوت دڤێت پلانەکێ بو دانم. بڕیارەک دا، دا کو وانەیەکێ نیشا وان بدەت. ژ مال دەرکەفت و چوو مالا خێشکا خۆ بۆ چەند ڕۆژان، و تەلەفۆنا خۆ ژی گرت.

د ڕۆژا ئێکێ دا، کچ ژ خەو ڕابوون. چ خوارن ل سەر مێزێ نەبوو، جلک نەهاتبوونە شیشتن، و هەر تشتەکێ خوارن و ڤەخوارنێ و ئامان ل سەر ئێک کۆم ببوون، هەتا کو جهێ ڕوونشتنێ ژی نەمابوو.

سینەم چوو دا جلکەکێ پاقژ کەتە بەر خو بەلێ چ نەدیتن. شیلان چوو د لێنانگەهێ ڤە دا تشتەکێ بخۆت، بەلێ ل وێرێ بێهنەکا زورا نەخۆش دهات ژبەر نەشیشتنا ئامانان و کۆمبوونا گلێشی. هەردووک ڕوونشتن و سەحکرە ئێک و دوو.

شیلانێ ب چاڤێن تژی ڕوندک ڤە گۆت:

مالا دەیک تێدا نەبیت چ ڕامانا خۆ نینە.. ئەو روناهیا مالێ بوو بلێ و مە تاریک کر.

سینەمێ ژی هەست ب شەرمەکا مەزن کر و گۆت:"مە چ جاران ڕێز ل ماندیبوونا وێ نەگرت، مە هزر دکر کو ئەڤە ئەرکێ وێ یێ بێبەرامبەرە."

پشتی چەند ڕۆژان، دەیک زڤڕی مال. دەرگەهـ ڤەکر و چاڤەڕێی تێکچوونەکا پتر دکر، بەلێ دیمەنێ بەر چاڤێن وێ یێ جودا بوو. مال یا پاقژکری بوو، ئامان هەمی هاتبوونە شیشتن، خارن یا ئامادە بوو، و سینەم و شیلان هەردوو ل بەر دەرگەهی ل هیڤیا وێ بوون.

دەمێ دەیکا خۆ دیتی، هەردووکان خۆ هاڤێتە بن پێیێن وێ، و دەست و سەرێ وێ ماچیکرن. سینەمێ گۆت:

گەردەنا مە ئازا بکە دایێ، مە چ جاران بهایێ تە نەزانیبوو.

دەیکا وان ل بن لێڤێن خو ڤە کرە کەنی، چونکی زانی کو هشکاتیا دلێ وان یا بوویە ئاڤ (نەرم بوویە). بەلێ وێ دزانی کو پێدڤییە بەردەوام بیت ل سەر فێرکرنا وان دا کو ببنە خودان بریار و بەرپرسیاریەتی.