هەڤدژیا هەست و واقیعی، هەر وەرچەرخانەکا مێژوویی و ڕودانەکا جەرگبڕ ل مەیدانا سیاسەتێ دا، دوو دیمەنێن دژوار و بەروڤاژی ئێک ل دویف خۆ پەیدا دکەت، دیمەنەکێ پر ژ خەم، هەستێن بریندار و دوو دلیا بەرامبەر پاشەروژێ، و دیمەنەکێ دی ژ واقعبینی، هوشیاری و شیکاریا ستراتیژی. ڕوودانێن دووماهیێ یێن باکور و باکورێ ڕۆژهەڵاتێ سوریێ (ڕۆژئاڤا)، گەلەك گۆمان و پرسیارێن کویر دناخێ تاك و جڤاکێ کوردی دا دروست کرینە. بەلێ بۆ گەهشتن ب تێگەهشتنەکا دروست ل سەر ئەنجامان، پێدڤیە ژ سنورێن سۆزێ و کارڤەدانێن دەمکی دەرباز ببين و ب چاڤەکێ سار و ل سەر خۆ، عەقلانی و دووربینانە سەحکەینە سەنگا هاوکێشەیێ.

ڕوویێ دلتەنگێ وێنەی و بارگرانییا دەروونی، نەخۆشی و ژانا ڤێ قۆناغێ د وێ چەندێ دا خۆ دیار دکەت، کو ناڤونیشانێ فەرمی یێ "ڕۆژئاڤا" جهێ خۆ دا پێناسەیا ئیداری یا نووی کو (باکورێ ڕۆژهەڵاتێ سوریا)یێ یە، و ئەزموونا دەهـ سالێن بورى یا ڕێڤەبەرییا خۆسەر دگەل هەلوەشاندنا پێکهاتا هێزێن سوریا دیموکرات (هەسەدە) چویە ناڤ قۆناغەکا نوو دا. ئەڤ گۆهورینە ب تنێ گوهورینا ناڤان نینە، بەڵکو بارگرانیەکا دەروونی یا مەزنە ل سەر وی جڤاکێ سالێن درێژە بەرگریێ ژ ئاخ، ڕامان و هەبوونا خۆە کری.

ل ڤێرێ پرسیارەکا کوور دناخێ هەموو کەسەکی دا هەلدکولیت: ئایا ئەڤ هەمی قوربانی دان، ماندووبوون و بەخشینا خوینا هزاران گەنجان دێ بنە هێڤێنێ سەرکەفتنەکا مێژوویی؟ بەرسڤا ڤێ پرسیارێ ناکەڤیتە د ناڤ سۆزداریا وەختی دا، بەلکو دناڤ وێ چەندێ دایە کا ئەڤ قوربانیە دێ چەوا بنە ئەگەرێ جێگیرکرنا مافێن سەرەکی یێن جڤاکێ کوردستانێ، ژبەرکو شەڕ د سیاسەتێ دا چ جار مەرەما دووماهیێ نینە، بەلکو ئامرازەکە بۆ گەهشتن ب مافان، دەمێ دەرگەهێ سیاسەتێ ڤەبوو، مانەڤە د خەندەقان دا دێ بێتە ئەگەرێ وێرانکرنا ژێرخانا مروڤی، سیاسی، کلتووری و جڤاکی.

لایەنێ ستراتیژی، گوهورینا ئامرازان ژ چەکی بۆ سیاسەتێ

دەمێ ژ ئاستێ سۆزداریێ بەرەڤ شیکاریا کویرا ستراتیژی پێنگاڤا د هاڤێژین، دیار دبیت کو ئەڤ گۆهورینە ب چ ڕەنگان تێکچوون و دۆڕاندن نینە، بەلکو گوهورینا هۆکار و ئامرازانە ژ ڕەقیا شەڕی بۆ نەرمی یا دیپلوماسیەتێ، کو بو چڤاکێ مە گەلەک پێدڤیە. دەمێ کورد ژ ئاستێ "ئیدارەکرنا ناوچەکا ئالۆز و دورپێچکری" دەرباز دبن بۆ ناڤ جەرگێ "بڕیاردانێ ل سەر ئاستێ هەمی وەلاتی" ب وەرگرتنا پۆستێن سەروەری ل ناڤەندا بڕیارێ ل دیمەشقێ، ئەڤە دەستپێکا گوهورینا هاوکێشەیێ یە ژ ئیدارەدانا قەیرانەکێ بۆ بەشداریکرنێ د داڕشتنا پاشەروژا وەلاتی دا.

دیسا پاراستنا ناسنامەیێ و نەهێلانا گەفێن دەرەکی مەزنترین و پیرۆزترین دەستکەفتێ ڤێ قۆناغێ یە، دگەل چەسپاندنا خاندنێ ب زمانێ کوردی و دانپێدانانا فەرمی یا ناسنامەیا کلتووری د ناڤەروکا دەستوورێ وڵاتی دا. بەلێ ئەڤە ب واتەیا هندێ نائێت، کو ب نڤێسین و دەقێن هشکێن دەستووری هەمی کێشە چارەسەر ببن! بەلکو دانپێدانا دەستووری تەنێ دروستکرنا چوارچۆڤەکێ یاسایی یە، دا کو جەوهەرێ دۆزێ ژ ناڤ نەچیت و خەباتا مەدەنی بکەڤیتە سەر ڕێچکەیا راست و فەرمی.

ئارمانجا بنەڕەتی یا هەر بزاڤەکا رزگاریخواز یا نەتەوەیی ل جیهانێ پاراستنا زمان، مێژوو و بوونا جڤاکی یە، نەکو بەردەوامیدان ب شەڕ و وێرانکاریێ ب تنێ بۆ پاراستنا پێناسەکا لەشکەری! زێدەباری ڤێ چەندێ، چوونا د ناڤ سیستەمێ فەرمی و دەستووری دا هەمی بیانوو ژ دەستێ هێزێن هەرێمی دەرئێخستن– ب تایبەت وان ئالیێن کو بەردەوام مەترسی بوون – کو ڕۆژانە هێرشێن ئاسمانی و سەربازی بکەنە سەر ژێرخانا ناوچەیێ و سەقامگیریا خەلکی تێکبدەن.