پشتى بۆرينا چه‌ند خۆله‌كه‌كێن كێم دووباره‌ ئه‌و كه‌سێ بڕيار داى خۆ د ناڤ لاپه‌رێن په‌رتووكان دا ببينت، كو عه‌مرێ وى نێزيكى 10 سالان بوو زڤڕى په‌رتووكخانێڤه‌. لێ ئه‌ڤێ جارێ نه‌ ب ئه‌وان هه‌ست و سۆزێن خۆ يێن گه‌شڤه و نه‌ ب دلێ خۆ يێ مه‌زنڤه‌‌، به‌لكو د چاڤێن وى دا پێلێن ترسێ خۆ دهاڤێتن و د ڕوويێ وى دا دێ بێژى ڤولكانێن ئاگرى تێڕا هاتينه‌ خوار؛ وه‌سا ڕه‌نگێ خۆ گوهۆرى بوو بۆ سۆريڤه‌، هه‌تا ستوونا ده‌نگێ وى ژى وه‌ك يا جارا ئێكێ نه‌مابوو، ده‌مێ گۆتيه‌ من: "ئه‌ز دقارم ئه‌ڤێ په‌رتووكێ بزڤڕينه‌مه‌؟"

من په‌رتووك ژ ده‌ستان وه‌رگرت و به‌رى ئه‌ز به‌رسڤا وى بده‌م، من چاڤێن خۆ ل به‌رپه‌ڕێن په‌رتووكێ گێڕاندن كا چو كێماسى نه‌گه‌هاندينه‌ په‌رتووكا من! ئه‌و په‌رتووكا ب 200 لاپه‌ڕى برى، ب 100 لاپه‌ڕى زڤڕاندبوو! ئه‌و په‌رتووكا ب به‌رگه‌كێ جوان هاتييه‌ خه‌ملاندن، بێ خه‌مل زڤڕاندبوو؛ دێ بێژى يا كه‌فتييه‌ به‌ر تيرێن دوژمنان و ب دژوارى هاتييه‌ برينداركرن.

ب بێ ده‌نگى من خۆ كێشا ناڤ چاڤێن وى يێن تژى پێلێن ده‌ريايى و من زانى ئه‌گه‌رێ ترسا وى چييه‌ و ئه‌گه‌رێ ڤه‌گه‌راندنا په‌رتووكێ چييه‌، ده‌مێ ب ده‌نگه‌كى له‌رزڤه‌ گۆتى: "ده‌يكا من گۆت ئه‌ڤ په‌رتووكه‌ يا گرانه‌ و بهايێ وێ گه‌له‌كه‌، ب زڤڕينه‌ڤه‌". دیار بوو كو ئه‌و ب په‌رتووكڤه‌ كه‌فتييه‌ به‌ر هێرشێ و گۆمانێن من ژی شاش نه‌بوون. دايكا نه‌خوينده‌ڤان ناهێلت زارۆكێن وێ خوينده‌ڤان بن؛ ئه‌و هزر دكه‌ت چ دناڤ لاپه‌رێن په‌رتووكان دا هه‌يه‌ هه‌تا ب ئه‌ڤێ كريارێ ڕابت و زاڕۆكێن خۆ ل سه‌ر هێلا خۆ يا ژيانێ ده‌رباز بكه‌ت؟

ئه‌وى نه‌دڤيا گوهـ ل ده‌نگێ من بت ده‌مێ ئه‌ز دبێژمێ نه‌خێر نازڤڕينم... لێ هيڤيا وى هاته‌ بجهئينان و ئه‌و بارێ ترسێ و ڤولكانێن ئاگرى من ل سه‌ر دێمێ وى و ژ چاڤێن وى دووركرن، ده‌مێ من ب دله‌كێ به‌رفره‌هڤه‌، ب ده‌نگه‌كێ نه‌رم و ب گرنژينڤه گۆتيێ: "ئه‌رێ دێ زڤڕينم..." من پاره‌ دا ده‌ستى و ب له‌ز، بێى ل پشت خۆ بزڤڕیت، ژ په‌رتووكخانێ ده‌ركه‌ڤت. ئێدى نه‌ دێمێ وى كورى و نه‌ شوينپێيێن وى كورى د په‌رتووكخانا من دا نه‌مان.