دۆهی دەمێ من پرچا بای شەدکر
پتەپتا هەلما بێدەنگیێ
ل بەر بێلایێ گوهـ لمن سمتن
ڤێ نیڤ شەڤێ
ماچەکا هەلداریای هات و
تەزینکەک ل سەر دێمێ بایدا ئینا خار
گرکەکێ هناڤێن بەندەمانێ لەرزاندن
ما کی هەیە بزانیت
ئەو کورستانا د سینکێ رۆژێ دا
هەرفینەکە یا ژ خەونێن من هاتیە ئاڤاکرن
برینەکە یا ژ درەوا هاتیە فاماکرن
گەلەک جارا من
ئەزمانێ خوە د قونەریێن
پەیڤێن تە د ئالادن
دا کو زەنگولوکێن خوهدانا
وەستیانا من تێکەلی
گرنژینا تەیا سحاریان بکەت
ئەڤە پرتەکا من چوو
کادا پرتا دی یا پندڤیای
تێکەلی رویێ تەیێ
پایز دزی تێکەلی هشیایێ بکەم

تۆ دزانی
بەری ببمە تیفکلێ هنارەکا
لێڤ هەلدریای
ل بەر گیڤاندێ زەڤیا هەنێ
لێڤێن عەردێ کاژکاژ بووی
لوریک دگوتن
نە بێدەرا بەهینا من ئەز
دنخافتم نەژی
دەنگێ دەنگڤەدانا
شکەفتا هەنێ دەنگ هێران دکر
ئای بێ هیڤی بوون
من چەند دڤیا و تە چەند دا من
بتنێ من مستەک ژ تە دڤیا
تە شەڤ درێژەک دا من
ئای بۆ بەختێ منێ
هێشتا مێشتا زاکا
خەریبیێ ژبیرنەکری
ما دێ چەند سالێن دی
تە د گەوریا خەونێن خوەدا
غولغولینم

ما هەلوسە پایزەک نینە
من تێرا بەهینێ ڤیک بدەت
یان د بێدەرا بەرزەبوونا من دا
فێری سەمایا فرینێ بکەت
من دلەک ژ تە و
تە شکەستنەک ژ هیروبارێن
کێلانا خەونێن من
ما هەتا کەنگی
خوە ل بارانا ژڤانێن تە یێن درەو بگرم
نە تۆ دبیە
دارا کنجروکا مرادا
پیرەژنێن گوندێ مە
پستویێ شەلوالێ منێ
تژی پنی ژمن بدزن و
ل دور بەژنا تە ب ئالینن
نە ئەز دبمە
ئەوێ من دڤیای
هزار رێکا
د چاڤەرێبوونێ دا ڤەبرم
ئەزێ ژ تە هیڤی هەلوەشای
دێ ل بەندا
پفە سحرا تە یا جاران
یا خەون نڤین و باوەشینک
شەق راوەستم
دیسان خەونەک ژ من دیربوون ژتە