هەناسەیەک دناڤ قێژیێن بێ دەنگ دا

ئەز دناڤ قێژیێن بێدەنگیێ دا دژیم، بەلێ ئەڤ بێدەنگیە نە ئارامییە، ئەڤە بێدەنگییا وان زێمارانە یێن کو گەهشتینە ئەسمانی و ستێران پشتا خوە دایێ! هەر رۆژ، دەمێ رۆژ ل پشت چیایێن پشت خویل و ڤەوەریای خۆ ڤەددزیت، ئەز هەناسەیەکا کویر ڤەدکێشم... نە بۆ ژیانێ، بەلکو بۆ وێ یەکێ دا خەندقینا خۆ بۆ دەریایێ بێژم نەکو من دناڤ پێلێن خوەدا ب خەندقینیت، دا خەونێن خۆ بۆ ئاگری بێژم نەکو من دناڤ دۆژەها خوە دا بسۆژیت...!؟ ل ڤێرێ، د ناڤ ڤێ جیهانا کو دیوارێن وێ ژ ترسێ هاتینە چێکرن، قێژی دبنە ئەور و ل سەر سەرێ مە دبنە کەڤر! کەس نابینیت، کەس نا بھیسیت، مرۆڤان گوهێن خۆ ب کەڤران یێ داگرتین بۆ گوهلێبوونا گازیێن هەژاران ب قفل و کلیلان دائێخستینە. زاڕۆک ل قەراخێن جادان دگرین، دایک نانێ رەش دکەنە د دەستێن وان دا و دبێژنێ: "بێدەنگ بن، چونکی" دیواران گوهـ هەنە." ئەرێ، دیواران گوهـ هەنە، بەلێ دل نینن...، من دیت کا چەوا بلقێن ل سەر ئاڤێ بوونە زنجیر و ل ستویێ باوەریا مە هاتنە ئالاندن، من دیت کا چەوا تەرازیا خوار بۆ یاسا و مافێ هەژاران تێدا هاتە کێشان و کڕین و فرۆتن.

ئەز دزانم ئەڤ ئاخە یا ژ قێژیێن بێدەنگیێ د نالیت، ئەڤ ئەسمانە شینیا بۆ زێمارێن مە د گێڕیت، ژ دوهی وەرە ڕۆژ ل هنداڤی مە کپ ڕاوستیای! نە دهەلێت، نە ئاڤا دبیت..، ل ڤێرێ و ل وێرا هە، ئەگەر تۆ بگری دێ بێژنە تە ژارێ لاواز، ئەگەر تو بکەنی، دێ بێژنە تە دێوێ سەرخۆش، ئەگەر تو بێدەنگ بی، دێ بێژنە تە کوێلە،.!ئێدی ئەم چ بکەین دناڤبەرا ڤی سێگۆشەیا مرنێ دا؟ بەلێ دناڤ ڤێ هەمی قێژییا بێ دەنگ دا، هەناسەیەک هەیە، هەناسەیا من نە یا ترسێ یە، ئەڤە هەناسەیا وێ ئاگریە کو دبن خۆلیا ئەنفالێ دا هێشتا نەڤەمرى، ئەڤە هەناسەیا وی قەلەمی یە کو دەمێ دشکیێت، ب خوینا خۆ دنڤیسیت، ئەڤە هەناسەیا وی چیایە یێ سینگێ وی ب گولە و تۆپان دکەڤیت، بەلێ هەر بلند و هەر بهێز و قاییم د مینیت...

ئەز دزانم، رۆژەک دێ هێت، ئەو رۆژا کو ئەڤ هەناسە دێ بیتە باهۆزەک، باهۆزەک کو نە دیوارێن ترسێ دهێلیت، نە تەرازیێن خوار، نە ژی پەیمانێن ب درەو، دێ هەمی قێژیێن بێ دەنگ یێن کو د سینگێ مە دا کۆمبووین ئێخیتە د ناڤ گوهێن دیرۆکێ دا. هەتا وێ رۆژێ، ئەز دێ هەر هەناسەیێ ڤەکێشم، هەر هەناسەیا من دێ بیتە شەهادەیا ژیانێ ل دژی مرنێ. هەر هەناسەیا من دێ بیتە بەرەک و دێ هاڤێمە ناڤ ئاڤا بێدەنگیێ دا، دا پێلەکێ پەیدا کەت، چونکی ئەگەر ئەم نەئاخڤین، کەڤر دێ ئاخڤن، ئەگەر ئەم نەنڤیسین، خوینا شەهیدان دێ نڤیسیت.