دیسان ئەڤ ڤیستەڤالە بوویە میمبەرەک بۆ نیاسینا ئەڤێ دەڤەرا پڕی کەلتور و ڕەسەن و کوردەواری، دیسان پڕی جوگرافیێن جوان و گەشتوگوزاری، کو ژجوانترین دەڤەرێن دهوکێ و کوردستانێ یە، هەروەک دبێژی بەهەشتا خودێ یە و بەرەکەتا ویە لڤێ دەڤەرێ هاتی خارێ ژ ئەسمانا و ب هەمی جورێن بەرهەمێن خوەمالی وەک سێڤا سورا بەرواریا، هنگڤینێ شرینێ چەل و چیا، سڵک، پتات و تریێ هەمەجور و هەمە ڕەنگ لسەر خەلکێ ڤێ دەڤەرێ باری.

جهێ دل خوەشیێیە کو ئەڤ ڤیستەڤالە سال بۆ سالێ ژ کاڤلوژانکێ خوە یێ دەڤەرداری دەردکەڤیت و بەرەف کوردستانی بوونێ دچیت، کو ئەڤ ساڵە گەلەک کەسان ژ باکور، باشور، ڕۆژهەڵات و ڕۆژئاڤا بەژداریکر، هەم ب سەرەدان و هەم ب بەرهەمێن خوە یێن خوەش.

یا ژ هەژیە بێژین ئەڤ ڤیستەڤالە یا بجوش و خروش بوو ژبەر چاڵاکی، ستران و داهوەتێن کەلتوری بدەنگێ چەندین هونەرمەندا کو ڕەوشەکا دی دا ڤیستەڤالێ.

ئەڤ دەڤەرا بناڤ و دەنگ ب کەلتورێ خوە یێ ڕەوشەنبیری و کوردپەروەری کو لاندکا شوڕەشا ئیلونێ بوو، ناڤدارە ب سەدان قوربانیا و شەهیدا و پێشمەرگێن هەردوو شوڕەشێن ئیلون و گولان و بەرهەنگاریا چەتێن ئینگلیزی ل گەلیێ مزیرکا، ئەڤێ دەڤەرێ وەسا دا دیارکرن کو نەبتنێ د مەیدانا خەباتێدا پالەوانن لێ دشێن ببن چرایێ کومکرنا هەرچار پارچێن کوردستانێ و ڤەژاندن و ئێکگرتنا کودایەتیێ ل ڤێ ڤیستەڤالێ.

سەرەدانکەرێ هێژا، ئەڤ ڤیستەڤالە نە بتنێ ئاهەنگەکا بەرچاڤکرنا بەرهەمیە، بەلکو ئەڤە نامەکا حەژێکرنێ و ڤیانێیە، کو بدەستێن جوتیارەکێ ماندیبووی هاتیە نڤێسین و دێ پێشکێشی جەنابێ تەکەت، ئەڤ جوتیارێ ئەڤرۆ تو بەرهەمێ وی دبینی قورتالبوویێ دوو شوڕەشا و ئەنفالا و داستانێن کانی ماسێ، فەوجا سوتکی، سەرێ حەمێ و بەرژۆریێ یە، ئەڤە خوەرستیا ڕەنج و خوها ئەنیا وی و دەست و تبلێن وی یێن گڕ و پەق پەقە، کو سەدان تڤەنگ ب وان دەستا بدوژمنیڤە پەقاندینە تاکو ئەم ئەڤرۆ بشێین ئەڤان ڤیستەڤاڵا پێکبینین و بێژین ئەم یێن هەین و دێ هەر هەبین ئەم کوردین پاشی بەرواری نە.