دەمێ جانتا خۆ ڕاکرێ و خاترا خۆ خواستی، هێژ تبلا وی یا خەناکری بوو.
وێ ژی هێش کراسێ بووکانیێ نەئێخست بوو.
گریێ سالان دێمێ وێ یێ گەش قورمچاند، هەموو ڕۆژێن سالێ ب ڕەشپۆشی خەملاند، تنێ پورا وێ یا سپی ژ ڕەنگێ کراسێ بووکانیا وێ ما بوو.

چەند ل سەر شەملکێ ڕاوەستابا دەستێن وێ د سەر ئەڤراز بوون، دگەل سلاڤا مللا چاڤێن وێ ب وی وێنێ هنداڤی سەرێ وێ دکەتن، دەستێ خۆ درێژی پێلاڤێن خۆ دکر، و چاڤێن خۆ دنقاندن و لێڤێن وێ دلڤین و د سەر سەرێ خۆ ڕا هاڤێژت و ب لەز ل خۆ زڤرت هەر جار پێلاڤ ل سەر بنێ خۆ دکەتن.

ڕوویێ وێ گەش دەبوو، بۆ خۆ دگوت: «دێ هێت ب خودێ دلێ من شەهدە ددت هەر دێ هێت.»

پشتی بیست و حەفت سالێن ڕەبەق سپێدەیەکێ بەرپرسەکێ حکومەتێ دە ریکێ مالا وێ قوتا و کیسکەکێ هەستیکان دگەل ئالایێ وەلاتێ دیاری بۆ ئینان.