دلوپ

ل به‌ر ئاوازێ‌ چپ.. تپ.. چپ... وه‌‌كو دلشادی د به‌ر ژه‌نینا كه‌مانێ‌ را ل هه‌نبه‌ر تیپا دهۆكێ‌ سه‌رێ‌ خۆ دهه‌ژاند، چپ.. تپ.. چپ.. ترار، له‌گه‌ن، قازان، ته‌شت...، ئه‌وێن وه‌‌كو به‌ركێن شترنچێ‌ ل نیڤا خانی و هه‌ر كۆژییه‌كێ‌ د به‌لاڤكری، پێشوازی ل ئاوازێن بانێ‌ ئاخێ‌ د دێرانت، ته‌ماشه‌دكر.

هه‌كو نۆته‌یا ناوازه‌یا لێدانا ده‌رگه‌هی دابڕاندی، ده‌رگه‌هـ ڤه‌كر دا ... بێژتێ‌: مامو چ ل ته‌ بكه‌ین، ڤی كۆلكی نه‌ئاڤادكه‌ی، و نه‌دفرۆشی!؟ هه‌ما بهێله‌ ئه‌م هه‌ڤسوی دێ‌ بو ته‌ ئاڤاكه‌ین، دا دیمه‌نی كۆلكی ته‌ به‌س وێنه‌یێ‌ ته‌لارێن مه‌ كرێت بكه‌ت!

نورچێنه‌ك ژ ناڤ لێڤێن وی ده‌ركه‌فت و ده‌ستێ‌ وی ده‌رگه‌هـ دگرت، هه‌كو گۆتیێ‌: بۆچی رازی نابی؟