Kurd Diaspora
دەرگەهێن عەشقێ و خەریبیێ
دەرگەهێ ئێکێ
ئەزێ
ل بەر دەرگەهی ڕاوەستیاێ
تو هاتییە بەر چاڤێت من
چانتەک د دەستێ تە دا
پرچا تە
ژ ڕەنگێ سۆرێ تاری
ل سەر مللێن تە یا بەردای
تو د بەر سینگێ من ڕا بوری
ئەزێ وەستیای
بەرێ خۆدانا چاڤێن تە
ئها وێ گاڤێ
دلێ من ژ سینگێ من دزی
هەتا، نوکە
د زیندانا چاڤێن تە دا
یێ گرتییە و
یێ تێدا مای
دەرگەهێ دووێ
ئاهەنگا نەورۆزێ بوو
ئێڤاریەکا درەنگ بوو
ئەز ڕەبەنێ خودێ
ل بەر دەرگەهـ و پەنجەران
ل بەر دیوارێ خەریبیا تە
من های ژ عەمرێ دنیایێ نەبوو
تو هاتی
ب کراس و فیستانان
پرچا تە، یا بەلاڤە بوو
سلاڤا تە
وەکی بیڤەلەرزا
ب (وانێ) کەفتی
ئەز تێک هژاندم
هەتا، نوکە
دلێ منێ
ب دیف تە کەفتی
دەرگەهێ سێێ
ئێڤارەکێ
چاڤێ من مانە ل دەرگەهێ تە
ل ڕێکا تە
ل هاتنا تە
نە دەرگەهێ تە ڤەدبیتن
نە ڕێکا تە
ب ڕێکا من دکەڤیتن
نە چاڤێ من
ب تە دکەڤیتن
کا بێژە من
دێ کەنگی دلێ من
ب دیتنا تە
خۆش بیتن
ماچەکا تە
بەر من کەڤیتن
دەرگەهێ چوارێ
ئەز و تو پێکڤە
ل بەر دەرگەهێ ترۆمبێلا خۆ
ماینە ژ پێرڤە
نە تە دل دا
خاترا خۆ ژ من بخازی
نە من دل دا
بچمە ڤە
چەندا خۆش بوو
ئەوێ گاڤێ و
ئەو دەلیڤە
هەتا نوکە
ئاگرێ عەشقا تە
یێ مایە
ب ڤی دلی ڤە
كۆمێنت (0)
هێشتا چو كۆمێنت نینن