سیناهییا پێدڤی و هلنگڤتنێن ڕێیێ

ل ڤان پێنج سالێن بۆرین، من زانی هەکە من پیچەکا سیناهییێ هەبیت کو تێرا دیتنا ڕێیا من بکەت، باشترە ژ هەبوونا گەلەک سیناهییێ. چونکی، هەبوونا گەلەک سیناهییێ، دبیت ببیتە ئەگەرێ هندێ مرۆڤ ڕێیا هندەکێن دی ژی ببینیت. لەو، گەلەک سیناهی ل نک من دهێتە هەژمارتن ڕەنگەک ژ ڕەنگێن ئاڵۆزییان.

ل ڤان پێنج سالێن بۆرین، من زانی ژ ڕێیا تەمەنێ خۆ یا دوور و درێژ، ئەڤە بتنێ پێنج پێنگاڤان ئەز چۆمە پێش، هەر پێنگاڤەکێ ژی، ب دەهان جاران ئەز یێ ل سنگەبەران هلنگڤتیم، وان هلنگڤتنان، هندەک جاران چۆک و ناڤدەستێن من خۆینەلۆ دکرن، هندەک جاران ژی ئەنییا من ل سنگەبەران ددا. من حەز ژ گەلەک تشتان نەکریە. لێ، ئەو تشتێ ژ هەموویان پتر من حەز ژێ نەکری، شوونپێیێن مرۆڤان بوون!. چونکی، ل هەر مەیدانەکێ، لناڤ بەفرێ بیت، ل سەر هەر ڕێیەکا ب تۆز یان هەڕی بیت، شوونپێیێن دوو مرۆڤان هاتبنە دیتن، دوو بەرەکی و کوشتن یا ل وێرێ هاتیە دیتن. پترییا جاران، خشخشا مارگیسکێن لناڤ تراشێن هەردوو ئالیێن ڕێ، پتر ژ پێڤەدانان مارێن ل سەر نیڤەکا ڕێ، ئەز یێ گەزاندیم و تەزینک یێن ئێخستینە لاشێ من. لێ، چونکی من دزانی هەکە مرۆڤەک ل هەمی تەمەنێ خۆ ل سەر ڕێیەکێ ب ڕێڤە بچت و شوونپێیێن وی نەهێنە دیتن، ڕامانا وێ ئەوە هێشتا ئەو نەڕابوویە پێیان!. لەو، ئەز ل سەر چۆنا خۆ یێ بەردەوام بووم، و نە من گوهێ خۆ ددا خشخشا خودان ددانێن بێژەهر نە خودان ددانێن ب ژەهر.

دیلی و بەهایێ پێیێن مرۆڤی

هندەک جاران، نەخاسمە وەختێ ژین یان مرنا خۆشتڤییەکێ مرۆڤی ددەستێن کەسکیدا بیت، ئەندامێن لاشێ مرۆڤی گەلەک داگێڕانان بۆ وی کەسی دکەن، دا کو چو زیانان نەگەهینیتە خۆشتڤییێ مرۆڤی. ئەڤ چەندە ئەو یەک مرۆڤی ژ هەمی تایبەتمەندییان دۆشت و وەک ئالاڤەکێ بکارئینانێ مرۆڤی دهێلیت. ڕاستە مرۆڤ ژ پێرڤە دمینیت. لێ، نزانیت کانێ ل سەر پێیێن خۆیە یان یێن هندەکێن دی؟.

هندەک جاران، پێیێن من ژی وەک پێیێن گەلەک مرۆڤێن دی کو ژین یان مرنا خۆشتڤییەکێ وان ددەستێن کەسکیدا، لاشێ من دهلگرت. لێ، ئەز بەرەڤ وی جهیڤە نەدبرم یێ من دڤیا!. مرۆڤ د وی کاودانێ نەفرەت لێکریدا دمینیت هەتا خۆشتڤییێ مرۆڤی ئازاد دبیت، پشتی ئازادبوونا خۆشتڤییێ مرۆڤی، ژ نوو مرۆڤ دزانیت کو ئەو هەردوو پێیێن ل سەر دراوەستیت، یێن مرۆڤینە.

دوو ئەرک، شۆڕەشا هزری و پەناگەها خێزانێ

هەکە من تەمەنەکێ درێژ هەبوو، دێ بزاڤێ کەم دوو ئەڕکان بجهـ بکەم؛ ڕازیکرنا وان مرۆڤێن فیشەک و نانی بۆ شۆڕەشێن چەکداری کۆم دکەن، پەیڤان بۆ شۆڕەشێن هزری کۆم بکەن. هەروەسا، دێ بزاڤێ کەم ڕێیا ژین و ژیارا خۆ کورت بکەم و ب وان تشتێن کێم یێن ل بەر دەستێن من هەیین.. ڕازی ببم، ب تایبەتی ژی ئەندامێن خێزانا خۆ. چونکی، هەکە هەمی ئەو هێزێن مرۆڤی زیندی د ژیانێدا دهێلن، ژ مرۆڤی بهێنە وەرگرتن، هێزا خێزانێ بۆ مرۆڤی بمینیت، تێرا مانا مرۆڤی د ژیانێدا هەیە.

پرتێن هەبوونێ و مەترسییا هەڤالبوونا زێدە

هندەک دبێژن: هەکە مرۆڤی گەلەک هەڤال و ناسیاڕ هەبن، باشە. ئەز ب خۆ حەزناکەم من گەلەک هەڤال و ناسیاڕ هەبن!. چونکی، د ژیانا خۆ دا، من چەند هەڤال و ناسیاڕ هەنە، وان هند پرتیێن من یێن هزری یێن بۆ خۆ برین، ڕاستە هەر ئێک ژ وان ژی پرتەکا خۆ یا هزری یا ل نک من هێلای. لێ، هندی ئەو ل دووری من بن، ئەز هەستپێدکەم پرتێن من دووری منن. ئەڤجا، کێ کێ پتر ڤیایە، کێ کێمتر یان پتر بەندکێ ڤیانێ لدوف یێ دی بەردایە، مرۆڤ ڤێ چەندێ نزانیت، بتنێ تشتێ دزانیت ئەڤە یە؛ ڤیانا هەڤال و کەسۆکاران، ڤیانەکە ژ کریارێن وان دزێت. ئەز وەسا هزر دکەم نهۆ بتنێ ئێک پرت یا ژ من مای، دترسم هەڤال یان ناسیاڕەکێ دی بۆ من چێببیت و ل دونیایا بەرین، وەک بایەکێ کەس نەزانیت ژ کۆڤە دهێت و دێ کۆڤە چیت، بۆ خۆ ببت و من بێی ناڤ و ناسناڤ بهێلیت.