گەوهەرێ مرۆڤی د مەبەستا وەرگرتنا کورسیێ و دەستکەفتییان ڕا دیار دبیت. واتە هەکە تە دیت خودانێ کورسیێ ب تنێ بۆ خۆ و وان بەرپرسێن حزبێ یێن ئەو گەهاندیە وێ پلەیا بەرپرسیاریێ کار دکەت و سەرەدەرییەکا جودا دگەل خەڵکی دکەت، هینگێ گومان بۆ مرۆڤی چێ دبیت کو دەما حزب تەنگاڤ دبیت یان ئەو بهارا تێدا نەمینیت، ئەو کورسیپەرێس ل گەل وێ حزبێ د تەنگاڤیێ دا نامینیت؛ چونکی ئەو ب تنێ خودانێ خۆ، سامان و دەستکەفتیێن خۆیە.

هەلبەت باپیران ژ مێژە گۆتیە: «ئەهلێ پاری نائێت هاری.» ئەڤ گۆتنە بیرا مرۆڤی ل مرۆڤێ دەلیڤەبین (ئینتیهازی) دئینیتە پێش.

هندی من بخۆ د ڤان ۳٥ ساڵێن بۆری دا دیتی، ئەوێن ل وەلاتێ مە ب هەر ڕێکەکا هەبی شیاین ب ڕێکا حزبا خۆ بگەهنە پۆست و کورسییان، ب تنێ خزمەتا خۆ و حزبێ کریە. کێمەک ژ وان ئەگەر تشتەک بۆ ئێکێ کربیت ژی، پتر ژ بەر هندێ کریە تاکو ئەو کەسێ تشتەک بۆ هاتیە کرن ببیتە عەبدێ کەڕ و لالێ حزبا وی.

سیستەمێ ئیمتیازاتان و دەمامکێ مەدەنییەتێ

ئەڤ سیستەمێ ئیمتیازاتان، هەمان سیستەمێ عەشیرەتێ، بنەماڵێ و لێکڤەکرنا تاڵان و دەستکەفتییانە (غەنیمەت) ب ڕۆخسارەکێ مەدەنی. لێ کاکڵ و ناڤەرۆکا وێ ب تەمامی دوورە ژ هەر حوکمڕانییەکا خاوەن سازی و دامەزراوەیی یا سەردەم.

پراگماتیزما فەلسەفی بەرامبەر خوەپەرێسییا حزبی

هەکە هندەک وەسا ببینن کو ئەڤ دۆخە پەیڕەوکرنەکا سەردەمیانە یا فەلسەفا پراگماتیزمێ یە و دوورە ژ فەلسەفا ئایدیالیزما کانت، هیگل، یان هەڤپشکییا مارکسی؛ بێگومان ئەو خەڵەت تێگەهشتینە.

هەمی فەیلەسۆفێن قوتابخانەیا فەلسەفی یا پراگماتی—هەر ژ چارلز ساندەرز پێرس هەتا ویلیام جەیمس، جۆن دیوی و ڕیچارد ڕۆڕتی—وەسا دبینن کو دڤێت پراگماتیزم د تیۆر و پڕاکتیکا خۆ دا د خزمەتا هزرکرنا زانستی، جڤاکی و مرۆڤایەتیێ دا بیت، نەک د خزمەتا کەسەکێ یان کۆمەکا کەسان کو بتنێ تەفشۆکێ بەرۆکا خۆ و حزبا خۆ بن.

مەترسییا دەروونی و هەڕفینا ئینتیمایا نەتەوەیی

ئەڤ سیستەمێ سەقەت هەرێم گەهاندیە ئاستێ بەری سەرهلدانێ و دبیت ژی خرابتر. ئەگەر نوکە ئیراق مووچە، بودجە، دەرمان و هاریکارییان ببڕیت، دێ ب ڕوونی دیار بیت کو پترییا وان کەسێن ب ناڤێ شۆڕشێ هاتینە سەر سفرا حازران، ب تنێ بۆ بەرژەوەندییا خۆ کار کریە.

ئەوان و چەتەیێن وان سامان و سامانداری بۆ خۆ پێکڤەنا، د دەمەکی دا پترییا خەڵکی ژ بەرێ خرابتر مانە دبن بارێ ئاریشەیێن جڤاکێ داڕماوی دا، و پێگیربوون (ئینتیما) بۆ ئاخێ و پیرۆزییان گەلەک لاواز بوویە.