ئەو شەڤا شەهیدبووی، دەستپێکا پاییزێ بوو. وەکو هەمی ڕۆژێن دیتر مژویلی ژیانا ڕۆژانە بوو. دەهـ ساڵ بۆرین و هێشتا چاڤەڕێی پەیدابوونا زارۆکەکێ ئێکانە بوون، لێ چ ئێڤارەکا جەرگهەژین بوو!

تێرۆژکێن ڕۆژێ بەرەڤ بەرزەبوونێ ڤە دچوون، ئەو تاڤزەرکا ئێڤارییان ژی هێدی هێدی یا بەرزە دبیت. داخوازا شیڤەکا ب لەز کر، هەر وەکو بێژی ئوغەرەک ل پێشیا وییە کو زڤڕینا وێ یا ب زەحمەتە!

چانتکێ خۆ هاڤێتە بەر هەڤژینا خۆ و گۆتێ: «نانێ بۆ دوو ڕۆژان داگرە، پشتی هینگێ دێ ڤەگەڕێم.» جلکێن خۆ ل بەر خۆ کرن، باش خۆ خەملاند و دوو ڕەختێن فیشەکێن بڕنۆیێ ژی ل سەر شێتکێ گرێدان.

خاترا دووماهیێ و گومانا دلی

خاترخواستنەکا نە چاڤەڕێکراو و بێ ژڤان بوو. ئەوێ ڕۆژێ سەر و سیمایێن وی گەشتر بوون ژ هەمی ڕۆژێن دیتر. بەرێ خۆ دا وێ ئوغەرێ و چەند پێنگاڤەکان بەرەڤ دەرگەهێ مالێ چوو، دوو سێ جاران ل پشت خۆ زڤڕی هەر وەکو دڤیا ئاخفتنەکێ بێژیت، لێ ئەزمانێ وی هاریکار نەبوو؛ تەنها سەرێ خۆ هەژاند و چاڤێن وی پڕ بوون ژ ڕۆندکان و بەرێ خۆ دا وێ ئوغەرێ.

پشتی دەمەکێ کورت، ل نێزیک گوندێ وان شەڕی دەستپێکر. هەڤژینا وی ژ وان گولەیێن تڤەنگان دترسیا و د دلێ خۆ دا دگۆت: «کاودان یێ ئالۆزە، تو بێژی شەهید ببیت؟ نە نە، دێ زڤڕیتڤە! ئەڤە چییە و ئەز بۆچی هندە یا ب گومانم؟ مانێ مە سۆز دابوو هەڤدو ئەو ڕۆژا زارۆک بهێتە سەر دونیایێ ئەم پێکڤە بین و ناڤەکێ کوردی بۆ هەڵبژێرین!»