رۆندکێن بێدەنگیێ

دیسان ئەز ژ خەو رابووم، من نەدزانی کا شەڤە ئان ژی رۆژە. ئەز ب لەز بەرەڤ پەنجەرەیا ژۆرا خۆ چووم، من پەردە وێڤە بر، لێ نە شەڤ ل بەر چاڤێن من دیار بوو، نە ژی رۆژ؛ بتنێ من هاژ دەنگێ بارانێ، عەوران، خشخشا بەلگان و تیک تاکا میلا دەمژمێرێ هەبوو، هەر وەکۆ ئەز یێ نابینا مە. لێ دەما من چاڤێن خۆ ل ژۆرا خۆ دزڤراندن، من ب تمامی ژۆرا خۆ ب رووناهی ددیت. بۆ من بوو جهێ پرسیارێ: بوچی ئەز دەرڤە نابینم، لێ ژۆرا خۆ دبینم؟ ئایە ئەز دناڤ خەوەکا ئەبەدی دا مە و نادەرکەڤم؟ ئان ژی چێدبیت ئەڤە خەونەکا کاتی یە، و هێشتان ئەز ژ خەو نەڕابوومە؟ ئەز بەرەڤ مێزا خۆ چووم، من پێنووسەک ژ دەست گرت دگەل کاخەزەکا سپی، من نڤیسی: بوچی جیهانا ژ دەرڤە نابینم؟ لێ ژ نیشکەکێ ڤە نڤیسینا من ژناڤچوو! ئەز سەرسام مام، من ب دەنگەکێ بلند گوت: بوچی دووبارە ژێچوو؟ کاخەزا سپی بەرسڤا من دا و گوت: چونکە تە پرسیار ژ من کر. من ژی ب ترس و لەرز ڤە بەرسڤ دا: پێدڤی بوو من چ کربا؟ ئەڤە سەرێ چەندین سالانە ئەز ل ناڤا ڤی بارودۆخی دا مە. بۆ من جهێ پرسیارێ یە بوچی ئەز دونیایا دەرڤە نابینم. ئەز د وێ باوەرێ دا بووم تو دێ بەرسڤەکێ دەیە من. کاخەزا سپی ب دەنگەکێ نەرم و ب خشخشا خۆ یا سەرنجڕاکێش بەرسڤ دا و گوت: بەلێ، ئەز دێ هاریکاریا تە کەم، لێ تۆ هەردەم پرسیارێ ژ من دکەی، نەکو داخازا هاریکاریێ. من ب سەرسوڕمانی ڤە بەرسڤ دا: چاوا داخازا هاریکاریێ ژ تە بکەم؟ کاخەزا سپی بەرسڤ دا و گوت: پێنووسێ خۆ ژ دەست بگرە و بنڤیسە: ئەز داخازا هاریکاریێ ژ تە دکەم، من دڤێت جیهانا دەرڤە ببینم و بۆ چەندین جاران ڤێ نڤیسینێ دگەل خۆ دووبارە بکە، دێ ئەنجامێ وێ بینی. من پێنووس ژ دەست گرت، من نڤیسی و بۆ گەلەک جاران من دگەل خۆ دووبارە کر. پشتی چەند خولەکان ژ بێدەنگبوونێ و بێهیڤیبوونێ، ئەز ل سەر کورسیکا خۆ رۆنشتم و چاڤێن من تژی بوون ژ رۆندکێن بەرزەبوونا من ژ ڤی بارودۆخێ ئەز دناڤ دا دنالم بۆ چەندین سالان. ژ نیشکەکێ ڤە، تیرۆشکەکا رووناهیێ ل سەر کاخەزا سپی گەش کر. ئەز ب لەز بەرەڤ پەنجەرەیا ژۆرا خۆ چووم، من پەردە دیسان وێڤە بر، لێ ئەڤ جارە من جیهانا ژ دەرڤە ژی دیت، دگەل بارینا بارانێ و بەلگێن زەر یێن پایزێ! ئەز بەرەڤ کاخەزێ ڤە چووم و من نڤیسی: چاوا تە هاریکاریا من کر ئەی کاخەزا سپی؟ کاخەزا سپی ب گرنژینەکا جوان بەرسڤ دا و گوت: پێدڤی یە هین مرۆڤ گەلەک دەمان دگەل خۆ، بۆ گەلەک جاران، گفتوگۆیێ بکەن؛ چونکە هەر کەسەک پتر ژ کەسەکێ دی ل هەستێن خۆ دگەهیت. ئەڤە چەندەها سالە تۆ کەسەکێ هوشیاری و تە چ جاران هاریکاریا خۆ نەدکر، تە بەرسڤەک نەبوو بۆ بەردەوامیا ژیانا خۆ، تۆ چ جاران ل دووڤ ڕامانا ژیانێ و لێگەڕیانێ نەبووی، تە نەدزانی هاریکاریا خۆ بکەی و دگەل خۆ بڕوینی و ب ئاخڤی و بێژیە خۆ: بوچی ئەز دناڤ ڤێ ژیانێ دا مە؟ من بەرسڤ دا و گوت: من هزر دکر ئەز دناڤ خەونەکا بەرزە دا مە! کاخەزێ بەرسڤ دا و گوت: (تۆ دناڤ خەونان دا نەبووی، بەڵکو خەون دناڤ هزرێن تە دا بوون؛ ئەو خەونێن کو تە پرسیار ژ وان دکر و وان بەرسڤەک نەددا تە، چونکە تە هاریکاریا خۆ نەدکر و تو ل دوویڤ ڕامانا ژیانێ نەبووی، بەڵکو تۆ ل دوویڤ بەرسڤا خەونەکێ بووی کو بزانی بوچی تۆ جیهانا ژ دەرڤە نابینی بێی کو هاریکاریا خۆ و وێ خەونێ بکەی. لەوما خەونەک ل ناڤ هزرێن تە دا بوو، کو بوچی ئەز جیهانا دەرڤە نابینم؟ و تۆ نەگەهشتبوویە هیچ ئەنجامان تا تۆ نەڕوونشتی و تە گەلەک جاران گفتوگۆ دگەل خۆ نەکری. لێ وی دەمی، تۆ گەهشتیە بەرسڤا خەونا خۆ، کو دیتنا جیهانا دەرڤە بوو). من ب رۆندکێن خۆشیێ بەرسڤ دا و گوت: سۆز بیت ئەی کاخەزا سپی، هەمی دەمان ئەز پێنووسەکێ ژ دەست بگرم، و دگەل کاخەزەکێ گفتوگۆیێ دگەل خۆ بکەم.