Kurd Diaspora
سپێدەھیان ل سەر جادەیێن سار ھەر چ ھێزەک د چاڤێن مندا یە ئەز د مەزێخم، ھەر رۆژەکێ ب رەنگەکی سەحدکەمە سروشتی چەند سیستەمەکێ جوانە، چەند ب لێزانی یێ ھاتییە رێکخستن، تو بێژی رۆژەکێ ئەز ژی کارەکی بکەم، ھەمی قوتابیێن سپێدەھیان ژ خەو ھشیاردبن سەرقال بکەم.
سەیرترین تشت ل دەف من، ھێزا دەیکا منە، ب شەڤ و رۆژێن خو ب شیشتنا دیوار و پەنجەران ڤە دبەتە سەر، ھزر د تمامبوونا ژیێ وێ دا دکەم، ئای خودێ چەند ماوەکێ کێم یا ژیایی، راستە تا نوکە ژی دژیت بەلێ ماوەیێ ژیانا وێ ژ تەمەنێ پەلاتینکەکێ ژی کێمترە...
مەیلەکا مرنا مروڤاتیێ یا د ناڤ روحا مندا بێ حەزا من رۆژ ب رۆژ مەزن دبیت، ئێدی ھزر دکەم مرنا کەسێ نابیتە کارەسات
ماچیە ئەگەر مرن دوماھیکا چیروکا مە نەبیت.
د ھزرا من دا مرن نە دووماھیک برگەیا ھەبوونا مەیە ھندەک تشتێن بچویک بچویک یێن مایین و دێ پشتی مرنا مەژی مینن، بوونا من حەقی نادەتە خو مرن دووماھیک رێکا مەزنا من بیت.
ل رۆژێن زڤستانێ یێن ب باران، د ناڤ خەیالێن گوڕێ خو دا بەرزە دبم، ئەرێ نوکە گوڕێ من چەند تەڕ بوویە، بێھنەکا نەخوش تژی نەفەسێن من یێن بچوویک دبیت کو ئێدی حەزا من ژبو بێھنا ئاخ و بارانێ ژ من دستینیت.
رەنگە بارینا بارانێ ژڤانێ من و مریەکێ دەستە برایێ من تێک بدەت، دبیت ژی مالامن یا نوی تژی ئاڤ بکەت.
ئەز حەز ژ ھاڤینان ناکەم، مار و دویپشک ل وی دەمی گەلەک د چالاکن، ئەو شتی زۆر بەیا گەنجێن ڤی وەلاتی دناڤ گەرمیێ دا د بەختەوەرن، تو بێژی گەنجێن ڤی وەلاتی ژ جنسێ مار و دویپشکان نەبن و ب ئەگەرێ شاشیەکا ھورمونی نەچووبنە دناڤ جەستەیێ مروڤان دا.
بھاران ژی ھەمی دەمان ئەز یێ دخەوم و حەز ناکەم ژیێ خو یێ مایی د خەودا ببەمە سەر.
وەکی ھەمی دەمان ژی من نەڤێت مروڤەکێ تەقلیدی بم و پایزێ ب بەلگەکێ زەر ھند پیروز بکەم، ل پایزان ژی دناڤ گورێ خودا گەلەک ژ گوھورینا کەش و ھەوایی دترسم، چونکە من تەنگە نەفەسی یا ھەیی و دبیت چ ژ جیرانێن مەژی نوژدار نەبن.
بێھنا مرنەکا توند یا ژمن دھێت، ئێدی ژ بێھنا مرنێ ناترسم، ماکی ھەیە بێژیت ئێدی مرن دووماھیکە؟!
دبیت د گورێ خوژی دا جارەکێ بمرین و بچینە دونیایەکا دی.
مرن یا جوانە ھندی وان جلکێن پێشمەرگێ جیرانێ مە ژبو رۆژا جەژنێ کرین و ئاوارەیەکی جەژن پێ پیروزکری....
تعليقات (0)
لا توجد تعليقات بعد