دەمێ تو سینگێ خۆ ب نەرمی د هەژینی،
دلێ من ل سینگێ مندا تو د ڤەژینی.

دەمێ ئەز دمێژم لێفێن تە دفڕن،
پەیڤێن تە ل هنداڤ لێڤێن من د مرن.

ب تەنێ ئارەزۆ دمینیت ڤیانەک،
ماچێن تە ئاشۆپن بکەمە راستییەک.

دەمێ ئەز نێزیکبم شەڤێ ژ بیر دکەم،
چاڤێن تە دبینم هەیڤێ ژۆردا دبەم.

ئەز ل ناڤ رۆناهیا تەدا یێ هندامە،
ئەز تە و خۆ نابینم من نینە ئارامە.

لێ ئەگەر دەستێ من بگەهیت دەستێ تە،
دێ هەمی جیهانێ کەمە بەر بەستێ تە.

ئەگەر ئەز سەرێ خۆ دانم سەر سینگێ تە،
دڤێت دەم راووەستیت، گوهبدەم دەنگێ تە

نە پێر بیت نە دوهی بەڵکی بەس ڤێ گاڤێ
ئەز و تو بگەهین ئێک وەکی رۆژ و تاڤێ

لێڤێن تە ژ بۆ من بەس ماچ و لێڤ نین،
ئەو بۆ من دەروازێ خەونەکا شرینن.

هەر دەما جارەکێ لێڤێن تە دمێژم،
دلێ من ئەز بۆ تە سترانا دبێژم.

ڤێ جارێ بەژنا خۆ ل من نە ڤەشێرە
من تۆ هەر خۆش دڤێی بمینە ل ڤێرە.

دەما نێزیک دبی بێهنا من چک دبیت،
ئەز دمینم بێدەنگ هزر پاشڤە دچیت.

ئەڤینا دلێ من ب هەمی شیانا،
ناڤێ تە دنڤیسیت ناهێلیت کۆڤانا.

ژ هەردوو لێڤێن تە من ماچ نەڤێن گەلەک،
ئەگەر یا ژ دل بیت بۆ من بەسە ماچەک.

ئەو ماچا من ڤیای بۆ شەڤێن ژیانێ
دێ بۆ مە تژیکەت بەهارا ڤیانێ.

نزیکی من ببە دلێ مە هەر دێ ژیت،
دنیایێ چ بڤێت بلا هەر بێژیت.

ل ناڤبەرا هەردوو وان چاڤ و لێڤێن تە
ل هنداڤ سێرانا وان جۆتە سێڤێن تە

من جهەکێ دیتی تە ژی بهیستی یە،
پرا ئەشقا مە یە. ئەو«خۆشەویستی»یە.