دەمێ هیڤی دبنە کلیل

دەیکا وێ بەرسڤ دا وگوت(روژا تو ژ دایک بوی هێشتا ئەم بڕێکی ڤە بابێ تە ژ نیشکەکێ ڤە گوت هیڤی، من ناڤێ وێ کرە هیڤی)، وێ پسیارکر و گوت (بابو بو من بێژە بوچی تە ئەڤ ناڤە هەلبژارت؟) بابی بەرسڤدا (کچا من تو ژی دزانی پشتی برایێ تە یێ مەزن و بەری تو ژ دایک بی دوو برایێت دی ژبەری تە ژ دایک بوون بەلێ ساخلەمیا وان یا خراب بو ئەم ب وان ڤە د هاتینە گرێدان و دچوونە بەر دلوڤانیا خودێ ژبەر هندێ ڕۆژا تو ژ دایک بوی هەرچەندە ساخلەمیا تە یا باش بو ژی لێ هەر ترسەک و نە ئارامیەک ددلێ من دا هەبو من پێکول کر لمن دیار نەکەت، چونکی ئەم گەلەک د ماندیبووین و من نەڤیا رێکێ ڤەکەم بو ڤێ هزرا نەخوش هەروەسا من نەدڤیا ئەڤ هزرە بگەهیتە دەیکا تەژی ژبەر ڤێ چەندێ ب رێکێ ڤە من گەلەک هیڤی ژ خودایێ خۆ یێ پر دلوڤان کرن ژیێ تە بو من درێژکەت و ئەز تەژی ژ دەست نەدەم)، پشتی بەرسڤا خۆ گولێ بوی چاڤێت وێ تژی ڕۆندک بوون ئەو هزرا مێشکێ وێ داگیرکری ئەڤە بو (ئانکو ئەز ئەو هیڤیا بابوی مە ئەوا ژ خودێ خواستی) بابێ وێ دزانی کا کچا وی چەند یا هەستیارە و دزانی هەما هندە دێ ڕۆندک ژ چاڤێن وێ بارن، ژبەر ڤێ چەندێ ئێکسەر بابەت گهوری و گوت (دهێتە بیرا من دەمێ ڕۆژەکێ ئەز ژ کاری دزڤریم و گەلەک یێ ژ وە خەریب بوم، دەمێ ل دوکانەکێ من بو وە هندەک دیاری دکرین من کچەکا بچیک دیت ژیێ وێ نزیکی یێ تە بو وەکی تە گەلەک یا جوان بو من گوتە بابێ وێ کچێ کچا من ژی نزیکی تەمەنێ کچا تەیە روخسەت هەیە چانتێ بکەتە بەر خۆ کا دێ بو یا باش بیت...)، هێشتا بابی ئاخفتنا خۆ بدوماهیک نە ئینا بو وێ بکەیف خوشی ڤە گوت (چانتەکێ ڕەش بو و نەخشەکێ ڕەنگا و ڕەنگێ جوان لسەر بو دهێتە بیرا من)، دەمێ بابێ وێ د خودیکا ترۆمبێلێ یا پێشیا خۆ گرنژین لسەر دێمێ کچا خۆ دیتی تمامکرنا سحبەتا خۆ ژبیرکر هەر وەکو گەهشتە ئارمانجا خۆ،

دەمێ بابێ وێ ئەڤ هزرە دکر هیڤیێ پسیارەکا دیتر هەبو (باب تو ب هەیڤان ژ مە دیر دکەفتی ژبەر کاری و ئەو ڕۆژا تە بومە دیاری ئیناتین هەر سپێدەهیا وێ ڕۆژێ وەکی هەرجار مە پسیارا دەیکا خۆ کر بابو دێ کەنگی زڤریت گوتە مە هێشتا گەلەک دەم یێ مای کارێ خۆ دوماهیک بینیت و بزڤریتەڤە پا بوچی هەر وێ ڕۆژێ بشەڤ تو هاتی و دوبارە نەچوی کاری؟)، وی هەناسەکا کویر کێشا و دیار بو ڤێ پسیارێ تشتەکێ نەخوش ئینا بیرا وی ب کورتی بەرسڤ دا (ل وی دەمی هندەک تشت رویدان ئەز نەچار بووم دەستا ژ کارێ خۆ بەردەم)، وێ گوت (بابو بوچی تە دەست ژ کارێ خۆ بەردا؟ بەس تو گەلەک پێڤە ماندیبووی و تە مال ب هەیڤان دهێلات و بتنێ دا پروژێ خۆ بدوماهیک بینی) باب یێ مەندەهوش بو ژ پسیار و هزر و دویفچونێن وێ، وی ژی د بەرسڤا خودا گوت (کچا من تو ژی نەمایە ئەو کچا بچیک یا ب بەرسڤێن کورت رازیدببوو من نەدزانی ژ نوکە پێڤە دڤێت یێ ئامادەبم بو پسیارێن تە و ب تێر و تەسەلی بەرسڤان بدەم) دوبارە هەناسەکا کویر کێشا و گوت (کچا من ئەو پڕۆژێ من سالەک ژ تەمەنێ خو کریە قوربان و من خو لبەر ئاگرێ غەریبیا وە گرتی پێنگاڤا دوماهیکێ ژ پڕۆژەی بەرەڤ دوماهیکێ د چوو و بەری ئەو خەونا من بو خێزانا خۆ ئاڤاکری د ئێک دەمژمێر دا ژناڤ دەستێن من فڕی و نەزڤری)، دوبارە هیڤیێ پسیارەک کر (بوچی بابو ئەگەر چ بو؟) وی گوت(کچا من گەلەک ئەگەر هەبوون لێ ئەگەرێ ژ هەمیان بهێزتر ئەو بوو کو ئەو جهێ پڕۆژێ من لێ کو ل دەڤەرەکا میسل بو ژبلی کو هەمی خەلکێ وێرێ عەرەب بوون سەرەدەریا خەلکێ نەیا باش بو دگەل مە بەلێ کەسێن خودان دەستهەلات و بهێز کەرب و کینەکا مەزن کربوونە ددلێ خۆ دا و بو وان یا نەخوش بو کەسەکێ کورد کارەکێ وەسا ئەنجام بدەت ژبەر ڤێ چەندی ب هەمی هێزا خو رێک هەمی لمن گرتن و دژایەتیا من کرن، کو پڕۆژێ خۆ بدوماهیک نەئینم هەر چەندە گەهشتبوو پێنگاڤێن دوماهیێ پشتی من گەلەک پێکول کرین و من دیتی دبێ مفانە نەچاربوم پڕۆژەی ب بهایەکێ ئێکجار کێم بفرۆشم و بزڤرم براستی ژی گەلەک یا ب ئێش بو بەلێ لدوماهیێ من دیت ئێدی چ ژ دەستێت من ناهێت من بریاردا ب زیترین دەم بزڤرم بو هەمبێزا خێزانا خۆ خودێ دزانیت چ د بەرژەوەندیا من دابو پشتراستم هەمی دەما ژ رویدانێن هەرە بچیک هەتا مەزنترین رویدان چەند یا نەخوش بیت خودایێ مەزن مەرەمەک پێ هەیە و بێ ئەگەر چ تشت نابن لەوا من ڤیا ب چارەنڤێسێ خو یێ رازی بم و من باوەریەکا تمام ب خودایێ خو هەیە و سوپاسیا وی دکەم دنەخوشیان دا بەری خوشیان)، پشتی ڤی بابەتی دوبارە بێ دەنگیێ ترۆمبێل داگیرکر هەر ئێک ژ خێزانێ د هزرەکێ دا نقوم بوو، د دەمەکێ دویراتی خولەک ب خولەک کورتتر دبو نێزیکی ئەوێ مالێ دبوین یا بەری پتری دەهـ سالان تێدا ژیاین،

پشتی دەمەکێ درێژ ژ ڕێکێ و دەمەکێ تژی هزر وهەست گەهشتن دەمێ هیڤیێ ئەو جهە دیتی بو وێ هەستەکێ سەیر بو ئەڤە نە بتنێ دەڤەرەکا کەڤن بو بو وێ بەلکو بەشەک بو ژ زاڕۆکینیا وێ ل ناڤبەرا جادە و کولان و دیوارێن وان دا گەلەک بیرهاتن هەلگرتبوون، پاشی گەهشتن وێ مالا کەڤن هیڤی چو د ژوورڤە هەر ژ پێنگاڤێن دەسپێکێ پیچەکێ راوەستا، وێنەیێ مالی هەمی جیاواز بو ژ وی وێنەیێ د هزرا وێ دا مای، سەرێ خو بلندکر چاڤێن وێ تژی بوون ژ وێ دیتنێ هەروەکی مالێ شەڤەکا تاری هەمبێز کربیت و نە بەردابیت ئەوێ رەشاتیێ دەست بسەر مالێ هەمیێ دا گرتبوو شینوارێن سوتنێ لسەر دیواران و کەلوپەلان دیاربوون، هیڤی د هزرەکا کویر دا چووبوو و گوت (چەند ئاگرەکێ بێ دلوڤان بو بەلێ یێ بێ هێز و ترسنۆک بو هەمی تشت سۆتن لێ نەشیا ئەو هێز و هیڤیا ددلێ خێزانا من دا بسۆژیت....چەند تشت لڤێرێ هاتینە گهورین ژ وێ ڕۆژا مە لێ بارکری؟ و چەند تشت ل ناخێ مە دا هاتینە گهورین)، و هێشتا چاڤێن خۆ ژ دیواران نەوەرگێرایە چونکی نە بتنێ دیوارێن بریندارێن سۆتنێ ددیت بەلکو کچەکا بچیک ددیت لڤێرێ یاری دکرن و ل رەخێ دی دکرە کەنی ڕۆژانێن خو لڤێرێ دەرباز دکرن ئەو ڕۆژە دهاتە بیرا وێ دەمێ ژ ڤێ مالێ بارکرین ل وێ ڕۆژێ کچەکا بچیک بو وێ نەدزانی سال دێ ب ئەڤێ لەزێ دەربازبن و ڕۆژەکێ ژ ڕۆژان دێ زڤریتە هەمان جهی بەلێ وەکە کچەکا د دلێ خودا دەهـسالێن تژی ئەزموون و سەربور و بیرهاتن هەلگرتین)،

وێ دەست ب بیرئینانا وان دەهـ سالان کر ب هەمی هوورکاریێن وان ڤە هاتە بیرا وێ کا چەوا خێزانا وێ دوبارە ژ چنەیێ دەسپێکرن و کا د چەند ئاریشە و ئاستەنگان دا بورین لێ هزرا ژ هەمیێ گرنگتر لدەڤ ئەڤە بو کا خێزان چەند یا خوراگر و بهێز و ئێک گرتی بو وان ئەو هەمی روودانێن بسەڕێ وان دا هاتین وەک دوماهیک نە ددیتن و ڕێک نەدانە ماندیبون و خەم و بێزاریێ هەستێ رازەمەندیێ ژ وانا بدزیت، هیڤی زڤری بو خێزانێ سەحکرە چاڤێن وان ئێک لدویڤ ئێکی هەر وەکو ئێکەم جارە وان بچاڤەکێ جیاواز ببینیت نە بتنێ ئەندامێن خێزانا خۆ ددیتن بەلێ گەشتەکا دەهـ سالان ددیت، سەبر و وەستیان وبزاڤ و دەستپێکێن نووی، ژ بابێ خو دەستپێکر ئەو کەسێ بەردەوام قوربانیان ددەت، دەیک ئەو کەسا ئەم ب جوانترین شێواز پەروەردەکرین لدەمێ باب یێ دویر ژمە، برایێ مەزن ئەو کەسێ هەر ل ژیەکێ بچیک کار کری ب مەرەما، هندێ دەیکا من پێتڤی کەسێ نەبیت لدەمێ باب نە یێ ئامادە، ئەم بچیک د ئەڤان هەمی نەخوشیان نە دگەهشتین ب تنێ خەما مە ئەو بو کەنگی دێ بابێ مە ژ کاری زڤریت چونکی ژێ غەریب دبووین و هەروەسا مە پێشبینی دکرن کا چ دیاری بومە دگەل خۆ ئینایە،

ل وی دەمی تێگەهشت کو ئەو دەهـسال نە بتنێ سالبوون دەربازبوون و بدوماهیک هاتن بەلێ گەشتەک بو کەسێن بهێزتر و سەرکەفتی ژ وان دروستکرن و باش فێری هندی کرن دوبارە دەستپێکرن ژ چنەیێ نە شەرمە و چ جاران درەنگ نینە بو دەستپێکەکا نوی و دەمێ گەلەک ئاستەنگ و ماندیبوون د رێکێ دا هەبن ڕامان ئەو نینە کو ناگەهیە ئارمانجا خۆ بەلێ بەرۆڤاژی ئاگری خانی ژناڤبر بەلێ نەشیا هیڤیا وان ژناڤ ببەت، ئەڤرۆ درەوشەکا گەلەک باش دابوون گەلەک هەست ب سوپاسگوزاریێ دکر و ئەڤ جهێ دیدەڤان لسەر قوناغا دەستپێکێ یا ژیانا وان نوکە دیدەڤانێ سەرکەفتن و هێز و دەست نە داهێلانا وانا بو، ئێدی نە بتنێ شینوارێن سۆتنێ ددیتن بەلێ چیرۆکا خێزانەکێ ددیت کو شیانە دووبارە رابن سەر پێت خو، لمالا کەڤن دا زارۆکینیا خۆ ددیت و د خێزانا خۆ دا ئەڤرویا خۆ و د ئەوێ رێکا پێکڤە بڕین دا پاشەرۆژەکا رووهنتر ددیت، باوەریەکا مکوم بو هیڤیێ دروست بو کو جوانترین تشت مرۆڤ دگەل خۆ هەلگریت د درێژیا گەشتا ژیانا خۆ دا دلەکێ پری رازیبوونە و زمانەکە ژ سوپاسگوزاریێ نەراوەستیت.