بهایێ ڕوناهیێ

د جیهانەکێ دا کو روناهی ب بهایێ پرچەکا زێڕین دهێتە کڕین، تاریاتی نە د مالان دا بەلکو د دلێ مرۆڤایەتیێ دا نیشتەجێ بوویە، کچەک کو هێشتا تەمەنێ وێ ل سەر پەڕێن زارۆکینیێ نەهاتیە نڤیسان، خۆ د ناڤەڕاستا شەڕەکێ مەزن دا دبینیت، شەڕێ دناڤبەرا مان و نەمانێ، دناڤبەرا پاراستنا ناسنامەیا خۆ یا زارۆکینیێ و ڕاگرتنا کێبلێن کارەبێ، دا کو رووخسارێ خێزانا وێ ل بەر تاریاتیێ بەرزە نەبیت

ل کونجەکا ژۆرێ، دایک وەک پەیکەرەکێ ژ ئێشێ ڕاوەستابوو، چاڤێن وێ یێن تژی روندک، سار و بێدەنگ بوون، وێ دیمەنێ کچا خۆ ددیت و هەر کێشەکا مقەسێ وەک خەنجەرەکێ د ناڤ جەرگێ وێ ڕا دچوو، ئەو یا کو جاران ب ئاوازێن ئەڤینیێ و دلۆڤانیێ ئەڤ کەزیە مەزنکری، ئەڤڕۆ نەچار ببوو ل بەرامبەر دیمەنێ قوربانیدانا کچا خۆ یا بچووک بێدەنگ بمینیت، چاڤێن وێ نەدشیان سەحکەنێ، چونکی دزانی ل وی دەمی وان نە بتنێ پرچ دبڕی، بەلکو پاشمایێ کەرامەت و روحا وان بوو د بن بارێ گرانێ نەچاریێ دا دهاتە هەڕشاندن،

ئەو ل بەرامبەر دیمەنێ ململانێیا ژیانێ ڕادوەستیت، مقەس د دەستێن وێ یێن بچووک دا نە هەر ب تنێ ل سەر سەرێ وێ د لەرزیت، بەلکو د ناڤا لێدانێن دلێ وێ یێ بریندار دا دهێت و دچیت، د دەمێ فرۆشتنێ دا، کچکێ ب چاڤێن تژی پرسیار و بێدەماری سەحدکرە وان داڤێن پرچێ یێن کو دکەفتنە د ناڤ دەستێن کڕیارەکێ سار دا، کڕیارەک کو تشتەک نەددیت ل ناڤ وان کەزیان دا ژبلی کەرەستەیەکی، بێی کو بزانێت هەر داڤەک ژ وان کەزیان هێلانەک بوو بۆ خەونەکا زارۆکینیێ

هەر داڤەکا ژ کەزیێن وێ دکەڤیتە سەر ئەردی، نە بتنێ پرچەکە دهێتە بڕین، بەلکو پشکەک ژ خەونێن وێ یێن سادە و کەیف و شادیێن ل حەوشا مالێ یە، کچەکا بچووک کو دڤیا وەک باڵندەکا ئازاد بفڕیت دهێتە زیندانکرن، ئەو دەرگەهێ زارۆکینیا خۆ کلیل ددەت، نە ژبەر کو حەز ژ مەزنبوونێ دکەت، بەلکو دا گڵۆپەکێ هەلکەت و ژۆرا تاری یا دایک و بابێن خۆ ڕوونبکەت

ئەو دزانێت کو ئەڤ روناهیا دێ ب دەست ڤە هێت، روناهیەکا دەستکردە و بهایێ وێ گەلەک گرانە، بهایێ وێ رووحا وێ بخۆیە، کێ دزانی کو روودانێن ژیانێ و بێدادیێ دشێن کچەکا خودان حەز و هیڤی بکەنە قوربانی؟ دا کو تاریاتیێ بۆ چەند دەمژمێران ژ ناڤا مالا خۆ دوور بێخیت، دا کو بسەلمینیت هندەک جاران ل ڤێ جیهانێ، مرۆڤ نەچارە پاشەڕۆژا خۆ بفروشیت دا کو ئەڤڕۆیا خۆ یا تاری ڕوون بکەت.