شێڤ ئەو زەڤیا بەرهەڤ بۆ چاندنێ، لێ هشتا نەهاتیە چاندن، بێدەر ئەو جهە یێ دەرامەت لێ دهێتە کومکرن و گێرەکرن و کا و دان ژێک دهێنە جوداکرن و دهێتە ڤەگوهاستن بۆ عمبار و کادینان.

کێشە و ململانا مروڤان ژ کەڤندا ل سەر کاری و عەردی و بەرهەمی و ڤەگوهاستنێ و بازارکرنێ هەبووینە و زیانێن مەزن گەهاندی نە، ژبەر هندێ زانایێن وان سەردەمان پەند و ئاموژگاریێن خۆ ددان، داکو شەر چێنەبن و زیان ڤێ نەکەڤن، و ئەگەر ببن ژی ل وان جهان بن یێن کێمتر زیان ژێ چێدبن، لەوان دگوتن شەرێ ل شێڤێ چێترە ژ قەرقەشا ل سەر بێدەرێ، لڤێرە شیرەت ل خەلکی دکرن کو کێشێن خۆ ل شێڤێ، ئەو زەڤیا نەچاندی بەری زەحمەتێ پێڤە بەن و بهێتە بەرهەمی چارەکەن، خۆ ئەگەر لوێرێ شەری ژی بکەن دێ زیان بتنێ ب شەرکەرا کەڤیت، و دەرامەت نەهاتیە چاندن کو زیان ڤێ بکەڤیت و کارتێکرنێ ل خەلکی بکەت. بەلێ هەکە بۆ دەمێ کومکرنا بەرهەمی و دەرامەت هاتە ڤەگوهاستن بۆ سەر بێدەرێ، ئێدی دێ کارێن پێتڤی هێنەکرن قرش بهێتە گێرەکرن و کا و دان بهێنە ژێک جوداکرن و ڤەگوهاستن بۆ مالان و عمبارکرن، لوی دەمی هەر قەرقەشەکا ل سەر بێدەرێ چێبیت دێ بیتە هویێ کار راوەستاندنێ و تێکدانا رەوشا بێدەرێ، و ژ گوتنەکا سار پيکدادان چێدبیت و چریسکەکا ئاگری تێرا هندێ هەیە گوڕی ب هەمیێ بکەڤیت و بسوژیت و زیان ب هەمیان بکەڤیت!.

ئانکو مەبەست ژڤێ پەندێ کێشەیێن خۆ د دەمێن خۆدا لجهێ بەرژەوەندێ چارەسەر بکەن، و گفتوگو و شەرێ خۆ لوێرێ بکەن و ئێکلا بکەن، بەری کەدا کار و رێنجبەریێ بەرهەم بهێت دا زیانێن مەزن نەبن.

سیاسیبوونا جڤاکی و ململانێ د ناڤبەرا ئازادی و بەرپرسیارەتیێ دا

بەلێ دیارە رێڤەچوونا ژیانێ کەفتیە ژێر باندورا حەزێن کەسوکی، و یاسایێن ئاسمانی و یێن مرۆڤی نەشیاینە مروڤی هەڤسارکەن و بۆ ئاراستەیا باشتر پاژوون، لەوان هەمیشە کێشە و شەر و پيکدادان هەنە!، شەڕ و قەرقەشە ل شێڤێ ژی هەنە و ل بێدەرێ ژی و چووینه ناڤ گوندی و کەفتیە ناڤ مالاندا ژی و سەرێ هەمیان پێڤە گێژبوویە و زیان ب هەمیان گەهشتیە!.

جڤاک ب گشتی سیاسی بوویە و لبن باندوڕا پێشکەفتنا زانستی و تەکنولوژی و بیاڤێن سوسیال مەدیایێ هەمی بووینە سیاسەتمەدار و مەدیاکار و مایێ خۆ د هەمی پرسادا دکەن، و ئەڤە مافەکێ سروشتییە، بەلێ پەندەکا کوردی هەیە دبێژیت: پێژتنا نانی بۆ نانپێژی بهێلە، باشە هەر ئێک شولا خۆ بکەت. بەلێ دەمێ بیاڤەکێ چالاکیێن مرۆڤی باندوڕا خۆ لسەر ژیانا خەلکی هەبیت، لوی دەمی مافێ خەلکی یە ب ئازادی رایا خۆ دەرببڕیت.

هەڤولاتیان ئاسایش و پاراستن و دەرفەتێن کاری دڤێن دا ب ئارامی بژین، سیاسەت ژی کارێ سیاسەتڤانان و لایەنێن سیاسی یە دا داخازێن خەلکی و بەرژەوەندێن گشتی بجهبینن، ئەو بخۆ ژی هەر هەڤولاتینە سیاسەتکرن کرینە پیشە و کاری پێ دکەن.

لایەنێن سیاسی هێز و رەوایا خۆ ژ مللەتی وەردگرن، و دەنگێن هەڤوەلاتیان د هەڤرکیان و هەلبژارتنان و ڕاپرسیناندا دڤێن دا ب سەرکەڤن و ب ئارمانجێن خۆرا بگەهن.

ل هەرێما کوردستانێ سیستەمێ سیاسی دیموکراتیە، داکو کێشە و هەڤرکی ب ئاشتیانە چارەسەر بن، و مللەتی ب گشتی یا خۆ گوتیە و کریە، ئێدی بەرپرسیاری یا لایەنێن سیاسییە رێزێ ل ئیرادا مللەتی بگرن و یا مللەتی گوتی بجهبینن.

پێدڤیا دەستپێشخەری و چارەسەریا ئاشتیانە

هندە هندی شەرێن ناڤ شێڤا هاتینەکرن و ل سەر بێدەرا و لناڤ گوند و باژێران و کولان کولان و مال بۆ مالان ژی هاتینە کرن و لدوماهیێ ژبلی زیانا و شەرمزاریێ ب نەچاری پێکهاتینە، ئەڤجا مادەم هوسانە، و دوماهیێ هەر پێکهاتنە، پێتڤییە لدیف بنەمایێن دیموکراتیەتێ کێشەیان چارەسەرکەن و مللەتی ئارام کەن.

شەڕ و کێشە و ئالوزی و پێکدادان لدەڤەرێ و ل جیهانێ گەلەکن و کوردستان دناڤ وی ئاگری دایە، و دنافخۆدا ژی قەرقەشە و شەرێ سیاسی و مەدیایی دەرونێ خەلکی تيکدایە، مللەت پێتڤی ب رزگارکەرەکی یە، ژڤێ گيژبوونێ رزگارکەت، ب هیڤینە هەمی لایەنێن پەیوەندیدار ل سەر دەستپێشخەریا سەروک بارزانی کوم ببن و ڤێ پرسێ ئێکلاکەن.