د جڤاکێن پێشکەفتی دا زانست، شیان و باوەرنامە پیڤەرێن سەرەکی نە بۆ بدەستڤەئینانا کاری؛ بەلێ ل هەرێما کوردستانێ دیاردەیەکا نەجوان سەر هەلدایە، ئەو ژی بکارئینانا لەش و جوانیێ یە وەک کەرەستەک بۆ ب دەستڤەئینانا دەرفەتێن کاری، کو ڤێ چەندێ جڤاک تووشی ئاریشەیەکا مەزن کریە. ئەڤ دیاردەیە نە بتنێ سەنگا زانست و خواندنێ کێم دکەت، بەلکو کارتێکرنا وێ یا نەرێنی ل سەر هەمی ئافرەتان دکەڤیت.

جڤاکێ مە ژ بەر سروشتێ خۆ یێ عەشایری کێم جاران جوداهیێ دئێخیتە د ناڤبەرا ئازادییا تاکی و کریارا نەرێنی دا؛ لەورا دەما هندەک ئافرەت بۆ بدەستڤەئینانا پلە و کارێن مەزن قوربانیێ ب لەشێ خۆ ددەن، د ئەنجامدا جڤاک ب کۆم بڕیارێ ددەت، ئانکۆ جڤاک «تەڕ و هشکێن» پێکڤە دسوژینیت. ئەڤە ژی دبیتە ئەگەر کو ناڤ و دەنگێ هەمی ئافرەتێن بزاڤکەر و خودان شیان بکەڤیتە ژێر گۆمانێ و وێنەیێ ئافرەتا کارکەر تێکبچیت.

ژناڤچوونا دادپەروەرییا جڤاکی و بێهیڤیبوونا کەرتێ باوەرنامەداران

ژ لایەکێ دی ڤە، ئەڤ کریارە خەون و هیڤیێن سەدان ئافرەتێن خودان باوەرنامە و پێگەهشتی ژناڤ دبەت. گەلەک ژ کچێن مە ساڵێن تەمەنێ خۆ د خواندنێ و ماندیبوونێ دا دەرباز دکەن دا کو ب شیانێن خۆ بگەهنە ئارمانجێن خۆ؛ بەلێ دەما دبینن جهێن وان ب ڕێکەکا نەجوان و نەدادپەروەرانە ژ لایێ کەسێن بێ شیان ڤە دهێنە داگیرکرن، تووشی بێهیڤییەکا مەزن دبن.

شکۆیا مێژوویی یا ئافرەتا کورد بەرامبەر واقیعی هەڤچەرخ

گەر ل مێژوویا جڤاکێ خۆ یێ کوردی بزڤڕین، گەلەک وێنەیێن شانازیێ یێن ئافرەتێن مە یێن سەردەمێن بەرێ دەردکەڤن؛ ئەو ئافرەتێن کو ب هزر، ئازایەتی و مۆڕالا خۆ سەرکردایەتییا جڤاکی یا کری، نە ب کریارێن کێمبها و قوربانیدان ب ڕێزا خۆ.

گەلەک ژ نموونەیێن ئافرەتێن مە ب ژیری، مێرخاسی و سەنگا خۆ یا جڤاکی ناڤدار بوون و کاریگەری ل سەر بڕیارێن مەزن یێن سیاسی و جڤاکی کرینە. وان نیشان دا کو ئافرەتا کورد دشێت ببیتە ئەندازیارا جڤاکی و خودان پێگەهەکێ بڵند بێی هندێ کو بازرگانیێ ب شکۆیا خۆ بکەت.

بەراوردکرنا وێ مێژوویا تژی ژ شانازی دگەل هەلویستێن هەڤچەرخ وێ ڕاستیا تاڵ دیار دکەت: شکۆیا ئافرەتێ ل سەر بنیاتێ ژیری و ڕەوشتێ وێ دهێتە ئاڤاکرن، نە ل سەر کەرەستەکرنا لەشێ وێ.