مەلاقی د سیاسەتێ دا: ژەهرا شرین یا دەستهەلاتێ و بکوژێ بێدەنگ

د جیهانا سیاسەتێ دا، گەلەک چەک و ئامراز هەنە کو دبنە ئەگەرێ کەفتنا سەرکردە و حوکمڕانان، لێ چ ژ وان هندی "مەلاقیێ" مەترسیدار نینن.

مەلاقی نە بتنێ ئاخفتنەکا نەرم و شرینە، بەلکو ئەو ژەهرەکە کو هێدی هێدی، بێی کو مرۆڤ پێ بحەسیێت، دناڤ دەمارێن دەستهەلاتێ دا بەڵاڤ دبیت. گەلەک جاران، سیاسەتمەدار دکەڤنە دناڤ بازنەیەکێ تژی ژ وان کەسێن کو هەردەم دبێژن "بەلێ قوربان" و ل سەر هەر بڕیارەکێ، چ باش چ خڕاب، دەستان بۆ لێ ددەن.

دوورکەفتن ژ گەل و دروستکرنا واقیعەکێ خەیالی.

خەتەریا هەرە مەزن یا مەلاقیێ د وێ چەندێ دایە کو واقیعەکێ سەختە و خەیالی بۆ سەرکردەی دروست دکەت. دەمێ دەوروبەرێن مرۆڤی بتنێ وەسف و پەسنا بکەن و ڕاستییێن تەحل ژێ ڤەشێرن، بڕیاردەر دکەڤیتە د ناڤ "کۆچکەکا شیشەیی" دا. ئەو باوەر دکەت کو هەمی تشت د باشترین ڕەوش دانە و خەلک یێ ژێ ڕازییە، لێ د ڕاستیێ دا ل سەر جاددەیێ و دناڤ ژیانا ڕۆژانە یا خەلکی دا ڕەوشەکا ب تەمامی جودا هەیە.

مەلاق ب زیرەکی ڤێ پەردەیا خاپاندنێ چێدکەن، بتنێ بۆ پاراستنا پێگەهـ و بەرژەوەندیێن خۆ یێن تایبەت، بێی کو چ خەمەکا نیشتمانی هەبیت.

زیانەکا دی یا ڤێ دیاردێ ئەوە کو کەسێن دلسۆز و خودان شیان ژ ناڤەندێن بڕیارێ دوور دئێخیت. ئەو کەسێ کو دلسۆزە و وێرەکییا گۆتنا "نەخێر"ێ هەی بۆ ڕاستڤەکرنا کێماسییان، جهێ وی د ناڤ سیستەمەکی دا نامینیت کو بتنێ حەز ل پەسنا دکەت. د ئەنجام دا، خەمخۆرێن ڕاستەقینە پشتگوهـ دهێنە هاڤێژتن، و دامەزراوە ب کەسێن لاواز و بێ شیان تژی دبن کو بتنێ بسپۆرێن لڤاندنا سەرێ خۆ نە و شیانێن چارەسەرکرنا چ گرفتان نینن.

کارەساتا مەزن ل وی دەمی ڕوو ددەت کو وەڵات یان قەوارەیێ سیاسی دکەڤیتە د ناڤ قەیرانەکا دژوار دا. د دەمێن تەنگاڤیان دا، پێتڤی ب هزرێن ژیرانە، پلانسازیێ و وێرەکیێ هەیە. لێ ژبەر کو دەوروبەرێن سەرکردەی بتنێ کەسێن مەلاقن کو چ شیانێن ڕێڤەبرنێ نینن، ل وێ چرکەساتێ سەرکردە خۆ ب تنێ دبینیت. ئەو مەلاقێن کو دوهی ب درەو شەکر د شکاند، دێ ئێکەم کەس بن کو ل دەمێ کەڤتنێ پشت دەنە سەرکردەی و بەرەڤ لایەکێ دی و بەرژەوەندییەکا نوی بڕەڤن.

ل دوماهیێ، مێژوو ب پەسنا ناهێتە نڤیسین، بەلکو ب کریاران دهێتە سەلماندن. سەرکردەیێ سەرکەفتی ئەو نینە یێ ل وان کەسان دگەڕیت یێن هەردەم دبێژن "بەلێ قوربان"، بەلکو ئەوە یێ گوهێ خۆ ددەتە وان دلسۆزان یێن کو بۆ بەرژەوەندییا وەڵاتی وێرەکییا گۆتنا "نەخێر"ێ هەی.

ب کورتی؛ مەلاقی دەرگەهێ کەڤتنێ یە، و ڕاستگۆیی ژی تاکە زامنا مان و پێشکەفتنێ یە.