دشێت فشار وەک بارودۆخەکێ نیگەرانیێ یان تێکچۆنا دەروونی بهێتە پێناسەکرن، کۆ ژ ئەگەرێ ڕەوشەکا سەخت پەیدا دبیت. فشار بەرسڤەکا سروشتی یا مرۆڤی یە، کۆ هانددەت بۆ چارەسەرکرنا ئاستەنگ و وان گەفێن د ژیانا مە دا تووشی مە دەبن. هەمی کەس هەتا ڕادەیەکی تووشی فشارا دەروونی دبن، بەلێ شێوازێ بەرسڤدانا مە بۆ فشارێ ژ کەسەکێ بۆ کەسەکێ دی یا جیاوازە.

جۆرێن فشارا دەروونی

• فشارا جەستەیی
• فشارا دەروونی
• فشارا ڕەفتاری
• فشارا سۆزداری
• فشارێن کۆمەڵایەتی

کاریگەریێن فشارا دەروونی و جەستەیی

1. کاریگەریێن فسیۆلۆجی: بریتینە ژ تێکچوونا کۆئەندامێ هەرسکرنێ، سکچوون، قەبزیا درێژخایەن، کێشەیێن هەناسەدانێ، کێشەیێن فشارا خوێنێ، سەرئێشان، شەکرە، گرژبوونا ماسولکەیان، تێکچوونا خوارنێ...
2. کاریگەریێن دەروونی: لاوازبوونا بیرهاتنان (یادەوەریێ)، تووڕەبوون، ترس، دڵتەنگی و هەستکرن ب خەمۆکیێ، بێمتمانەیی ب خۆ، کێمبوونا ئەنجامدانا کاری، لاوازیا بیستنێ، جۆڵەیا زێدە...

پرسیارێن بەربەلاڤ د دەربارەی فشارێ دا

هەست ب فشارێ دکەم، ئەرێ ئەڤە وێ چەندێ دگەهینیت کۆ ئەز نەشێم کار بکەم؟

پتریا مە ب باشی دشێین سەرەدەریێ دگەل فشاران بکەین و بەردەوام بین سەر کاری. ئەگەر کێشە بۆ مە پەیدا بوو د ڕووبەڕووبوونا فشارێ دا، پێدڤییە داخوازا هاریکاریێ ژ چارەسەرکەرەکێ دەروونی یان ڕێنماییکارەکێ دەروونی بکەین.

ئەرێ پێدڤییە ئەم چاڤەڕێی وێ چەندێ بین د ڕەوشێن سەخت دا تووشی فشارێ ببین؟

بەلێ، سروشتییە هەست ب فشارێ بکەی د دەمێ چاڤپێکەفتنا کاری، تاقیکرنا قوتابخانێ، یان کێشەیێن خێزانی، یان دگەل هەڤال و هەڤپێشەیان، یان د دەمێ ڕوودانان دا وەک قەیرانێن ئابووری، بەلاڤبوونا نەخۆشیان، کارەساتێن سروشتی، شەڕ و توندوتیژی. گەلەک کەس ب دەربازبوونا دەمی ئاستێ فشارێن وان کێم دبیت و دشێن سەرەدەریەکا ئاسایی بکەن.

ئەرێ هەمی کەس ب ئێک شێواز بەرسڤا فشاران ددەن؟

نەخێر، کەسان ب شێوازێن جیاواز کارڤەدان هەنە بەرامبەر ڕەوشێن فشارێ. شێوازێ ڕووبەڕووبوونێ و نیشانێن فشارێ ژ کەسەکێ بۆ کەسەکێ دی جیاوازن.

تەکنیکێن کۆنترۆڵکرنا فشارێ و شارەزاییێن برێڤەبرنا وێ

• گوڕینا ڕۆتینێن ژیانێ
• ڕێکخستنا دەمێ نڤستنێ و زوو نڤستن
• باشترکرنا پەیوەندیان دگەل کەسێن دی
• خوارنا تەندروست
• وەرزشکرن ب بەردەوام
• کێمکرنا دەمێ بکارئینانا تۆڕێن کۆمەڵایەتی