Kurd Diaspora
پەنجەشێر نە بتنێ نەخۆشییەکا جەستەیی یە، کو ڕویبڕوی خانەیێن لەشی ببیت، بەلکی تاقیکرنەکا مەزنە بو هێزا دەرونێ مروڤی ژی، هەلگرێ ڤێ نەخوشیێ بتنێ ب لەشێ خۆ ل دژی ڤێ نەخوشیێ ناڕاوەستیت، بەلكی دەرون و ناخێ وی ژی دبەنە د ناڤ تاقیکرنەکا مەزن دا، پەنجەشێر ئێک ژ وان برینێن بێدەنگە کو ل دەستپێکێ جەستە دئێشیت لێ بەرەڤ دل و دەرونێ مرۆڤی ژی دچیت. دەمێ پەیڤا "پەنجەشێر"بۆ ئێکەم جار بو نەخوشی دهێتە گۆتن، ڕەنگە هەستەکێ ب ترس و بێهیڤی دناخێ وی دا پەیداببیت. لێ د ڤێ ڕاگەهاندنا دژوار دا، مەزنترین چەکێ مرۆڤی پشتی ئارامبونا ناخی بڕێكا دوعایان، پشتەڤانیا دەرونی یا خێزان، هەڤژین، زارۆک و دەوروبەرێن وی یە. پشتەڤانیا دەرونی بتنێ دابینکرنا خزمەتگوزارییان نینە، بەلکی کلیلەکا سەرەکییە بۆ دەربازبونا قۆناغەكا سەخت و سەرکەفتنێ ل سەر ڤێ نەخۆشیێ.
لدەستپێكێ خێزان كو بو هەلگرێ نەخوشیێ وەك پەناگەها ئارامی و دلوڤانیێ یە: خێزان ئەو جهێ ئارام و پاراستیە یێ کو نەخۆش تێدا هەست ب گرنگی و ئارامیا خۆ دکەت. دەمێ مالباتەک ڤێ نەخۆشیێ هەمبێزدكەت ب ڤیانەكا گەرم و ڕێزگرتنەكا مەزن ژ نەخوشێ خۆ، ئەو پتریا ڕێژا ترسێ ل دەف نەخۆشی کێم دکەن. پشتەڤانیا خێزانێ ژی چەند ڕەهەندێن گرنگ بخۆڤە دگریت وەك:
نەهێلانا هەستێ بتنێبونێ: یا گرنگە وی هەستی بو نەخوشی دروستبكەن كو ئەو نەخوشیە بتنێ یا وی نینە، بەلکی خێزان هەمی دگەلدایە و دڤی شەڕی دا ئەو بتنێ نەهێلایە.
بلندكرنا هێزا مەعنەوی: پەیڤێن جوان، بێهنفرەهی، و بلندکرنا هەستێ هیڤییێ د دەمێن بێهیڤیبونێ دا، وەک دەرمانەکێ مەزنێ دەرونی کار دکەت و شیانا بەرهنگاربوونێ ل دەف نەخۆشی زێدە دکەت.
گرنگیدان ب كەسایەتی و لایەنێن دی یێن ژیانا كەسێ توشبوی و بەرێخودانا وی ب چاڤێ ئەندامەكێ نورمال یێ خێزانێ و دویركەفتن ژ بەرێخودان بچاڤێن تڕسیای و خەمگین: یا گرنگە نەبتنێ بابەتێن گرێدای نەخوشیا وی بو بەحس بكەن بەلكی بەحس و ئاخفتن لسەر بابەتێن دیژی یێن ژیانێ بهێتەكرن داكو نەخوش كێمتر هەست ب نەخوشیا خو بكەت و پیچەك ژ وی كەشوهەوای دویر بکەڤیت، دیسان ژ بۆ وێ چەندێ ژی داکو نەخۆش هەست بکەت ئەو هێشتا مرۆڤەکێ ژیانکەرە نە كو نەخوشەكە دیسان دویركەفتن ژ گوهلێبونا دەنگوباسێن نەخوش و نەڕاست لسەر نەخوشیا وی چ دسوشیالێ دابیت یان دناڤ خێزانێ دابیت.
comments (0)
No comments yet