«ئێکەمین ڕێک بۆ نەهێلانا خەمباریێ ئەوە؛ تە هند دەمێ ڤالا نەبیت تێدا پرسیارێ ژ خۆ بکەی کا تو یێ بەختەوەری یان نە.»

مژویلبوون ڤالاتیێ ناهێلیت، و ڤالاهی بنیاتێ گەلەک خرابیانە. تشتەکێ ژیوارییە ئەگەر تە د ئێک ڕۆژدا خۆ ب گەلەک کاران ڤە مژویل کر، پاشی تو هەست ب وێ بێزاریێ ناکەی ئەوا تو ژ نەبوونا کارەکی دبینی. هەر گاڤا تە دەمێ ڤالا نەبیت، تە هند هێز ژی نامینیت، کو ب شەڤێ بمینییە هشیار و خەمان ژ ئاریشێن خۆ یێن کەسایەتی بخوی، بەلکو پشتی زەحمەتییا ڕۆژەکا پڕی دەستکەفت، دێ چییە د ناڤ خەوەکا کویر و ئارامدا.

چ ژ وێ چەندێ بەختەوەرتر نینە مرۆڤ بۆ کرنا خێرێ و ئاڤاکرنا ئاخڕەتا خۆ زەحمەتێ ببینیت و هەتا مرنێ خۆ پێڤە مژویل بکەت. چ نینە ئەگەر مرۆڤ هندەک زەحمەتا ب تام ببەت، چونکی ئارامییا تەمام د دونیایێ دا نینە.

پرسیار ژ ئیمام ئەحمەد بن حەنبەل (خودێ ژێ ڕازی بیت) هاتە کرن: کەنگی دێ بەندە تاما ئارامیێ بینیت؟ وی بەرسڤ دا و گۆت:

«ل وی دەمێ ئەو ئێکەم پێنگاڤا خۆ دهاڤێژیتە د بەهەشتێ دا.»

خۆمژویلکرن وەکی ڕێکەک بۆ خۆگونجاندنێ

دبیت ڕامانا ئەڤێ خۆمژویلکرنێ ئەونەبیت کو تو ژ ڕووبڕووبوونێ برەڤی، بەلکو خۆمژویلکرن ژ ئاریشێ ب شێوەیەکێ بەشی، دبیتە ڕێکەک دا کو خۆ دگەل بارودۆخی بگونجینی و ئەڤە نابیتە خۆبەدەستڤەبەردان. ژبەرکو هەمی ئاریشان چارەسەری نینن، و چارەسەرییا هندەک ئاریشان یا د پشتگوههاڤێتنا وان دایە. ب ڕامانەکا دی یا باش؛ ئەوە تو خۆ دگەل بگونجینی، ب تایبەتی ئەگەر لایەنەکێ وێ یێ ئامادە نەبیت بارودۆخی چارەسەر بکەت. هەروەسا خۆمژویلکرن ژ ئاریشێ دبیت ببیتە ئەگەرێ چارەسەرییا وێ و ببیتە دەلیڤەیەک بۆ ڕزگاربوونێ ژ کارڤەدانان، و مرۆڤ بشێت ب زیرەکانە ئاریشێ چارەسەر بکەت.

مژویلبوونا مرۆڤی نە ب تنێ د کرنا کارێن ب زەحمەت دایە، بەلکو دبیت د ئارەزوویەکێ دا بیت، یان ژی د دانانا پلانێن ڕۆژانە دا بیت. ئەم دشێین بۆ خۆ ژیانەکا دی د ژیانا خۆ یا ڕۆژانە دا دروست بکەین و تێدا دیار بکەین کا ئەم پێدڤی ب چ تشتانەین دا کو ڕۆژانە ئەنجام بدەین. هندەک کەس یێن هەین بێی کرنا وەرزشێ نەشێن ژیانا خۆ یا ڕۆژانە ببوڕینن، و هندەکێن دی ڕۆژا خۆ دەست پێ ناکەن ئەگەر بەشەکێ قورئانێ نەخوینن.

گەلەک کەس یێن هەین ژیانا خۆ تژی کری ژ چالاکی و هەلکەفتێن وەسا کو ژیانا وان تژی خۆشی دکەن، و هزرێن وان مژویل دکەن و ناهێلن ئەو هزر د وان ڕوودانێن ب ئازار دا بکەن یێن کو ل زارۆکینییا خۆ تێدا ژیاین. گەلەک ژ وان کەسێن سەرکەفتی، یێن د ژینگەهەکا خێزانی یا نەخۆش دا ژیاین، و هەتا گەلەک ژ وان کەسێن خزمەتەکا مەزن بۆ مرۆڤایەتیێ ژی کری، د ژیانا خۆ یا تایبەت دا کەسەک نەدیتییە دلۆڤانیێ پێ ببەت و وان بەختەوەر بکەت.