کارەساتا شەنگالێ د تەباخا ٢٠١٤ێ دا، ئێک ژ تاریکترین و هوڤانەترین لاپەرەیێن دیرۆکا هەڤچەرخ یا مرۆڤایەتیێ یە. ئەوا ل سەر دەستێ ڕێکخراوا تیرۆریستی یا داعشێ دەرحەقێ ئێک ژ مللەتێن کەڤنار یێن ڕۆژهەلاتا ناڤەراست ئەنجامدایی، کو ئەو ژی ئێزدینە، ئەڤ کارەساتە پێشێلکرنەکا ڕاستەوخۆ یا هەمی یاسا و پەیماننامەیێن نێڤدەولەتی یە.

هەروەها کارەسات نە ب تنێ ژمارە و ئامارن بەلکو د ناخێ خۆ دا ب هزاران چیرۆکێن ئازار و فرمێسک و خۆراگریێ هەلگرتینە.

چیرۆکا (نادیە): شاهدییەکا زیندی ژ ناڤ دۆزەخێ

چیرۆکا دایکەکا ڕزگاربووی یا ب ناڤێ (نادیە) کو گوشەیەکا بچووک یا وێ دۆزەخێ نیشان ددەت، نموونەکا زیندی یا ڤێ کارەساتێ یە. نادیە ل سەر وێ ڕۆژا ڕەش دبێژیت:

«ل سپێدەهیا ٣ی تەباخێ دەنگێ فیشەک و قیژیێن زارۆکان دەڤەر هەمی هەژاند، پشتی زانین کا ئەو چیە د قەومیت و چەکدارێن داعشێ گوندێ مە دوورپێچکری، ئێکەم کارێ وان مێر و گەنج ژ ژن و زارۆکان جودا کرن، هێشتا قیژیا دایکان د گوهێن من دا دهێت دەمێ کو چەکداران د باوەشا من دا کوڕێ من یێ گەنج برە ڕێزێ و ل پێش چاڤێن من گولەباران کری، ئەو دیمەنە چ جاران ژ هزر و مێشکی من دەرناکەڤیت، و پاشان ئەم وەک دەستکەفتێن جەنگی هنارتینە بازارێن کۆیلایەتیێ ل وێرێ وەک تشتەکێ بێ بها کرین و فرۆشتن ب مە دهاتە کرن، و پتر ژ سێ سالان ئەز د ناڤ ئەشکەنجە و ئازارەکا دڕندانە دژیام بەلێ مە کەرامەتا خۆ دپاراست هەتا کو ب ڕێکا قاچاغچیان ئەز شیام ب شەڤەکا تاری برەڤم و خۆ بگەهینینە کەمپێن ئاوارەیان.»

ئەڤ چیرۆکە تابلۆیا ڕاستەقینەیا وێ جینۆسایدێ یە، یا کو تێدا:

• پتر ژ ٦,٠٠٠ ژن و زارۆک هاتنە ڕفاندن.
• نێزیکی ٢٠٠,٠٠٠ کەسان بەرەڤ چیایێ شەنگالێ ڕەڤین و تووشی بێ ئاڤیێ و برساتیێ بووین.

ل ڤێرێ ئازارا ڕزگاربوویان ب دەربازبوونا ژ دەستێ داعشێ ب دوماهی نەهاتییە، بەلکو برینێن دەروونی و نەزانینا چارەنووسێ هزاران بەرزەبوویان هەتا نوکە ژی ئازارەکا بەردەوامە.