ژ سۆزێ بۆ هشیاریا سیاسی

دیرۆکا نەتەوەیا کورد دیرۆکەکا پڕە ژ خەبات و قوربانیدانێ، لێ د جیهانا ئەڤرۆ دا پاراستنا دەستکەفت و مافێن نەتەوەیی ب تنێ ب هەست و سۆزان ب ڕێڤە ناچیت. جیهانا ئەڤرۆ پێدڤی ب گۆهۆڕینەکا هزری هەیە، ئانکو ل شوینا پشتبەستنێ ب سۆزێن دەمکی، پشتبەستن ب ستراتیژیەکا فکری و زانستی و ب مێشکەکێ نوو و پێشکەفتییە بۆ بهێزکرنا پێگەهێ مە ل دەڤەرێ.

ئەڤرۆ سەردەمێ سیاسەتا نێڤدەولەتییە، نە سەردەمێ گازندەیان و کارڤەدانێن سۆزداری، بەلکو سەردەمێ بەرژەوەندیێن هشک و دیپلۆماسییا زیرەکە. ئەگەر مە بڤێت مانا خۆ و دەستکەفتێن خۆ ل ڤێ دەڤەرا ئالۆز مسۆگەر بکەین، پێدڤییە ئێکەتیا مە ئێکەتییەکا ڕاستەقینە بیت، ئانکو ل سەر بنەمایێ دادپەروەری و هشیاریا نەتەوەیی رێک بێخین.

بڕێڤەبرنا دەولەت و قەوارەیان ل ڤی سەردەمی ب تنێ بڕێڤەبرنا ڕۆژانە نینە. دەستکەفتێن مێژوویی ب ساناهی نائێنە پاراستن ئەگەر هزرێن پێشکەفتی و زەینێن ڤەکری نەبنە خودان بڕیار و ئێک ئارمانج. گۆهۆڕین نە مەترسییە، بەلکو تاکە ڕێکا ڤەکرنا دەرگەهێن گرتییە.

ئەڤرۆ، ب داخازکرنا مافان و هەڵوێستێن سۆزدار ئەڤ دەستکەفتێن مێژوویی نائێنە پاراستن، نەژی مافێن مە یێن نەتەوەیی ب دەستڤە دهێن، بەلکو مە پێدڤی ب مێشکێن ستراتیژی و ئێکگرتی هەیە کو ل سەر بنەمایێ زانستی و بەرژەوەندیان داخازا مافێن خۆ بکەن.

ئەڤڕۆ زێدەتر و گرنگتر ژ گۆهۆڕینا دەستهەڵاتێ و شەرێ هێزێن سیاسی و جیاوازیا بیروبۆچوونێن وان، مە پێدڤی ب گۆهۆڕینەکا هزری یا جڤاکی هەیە. ل شوینا زێدەبوونا هەستا سۆزداری بۆ لایەنگریا پارتایەتیێ، ئەم پێدڤی ب زێدەبوونا هەستا نەتەوەیی هەنە، کو د گەلدا هزرەکا ئازاد و راستبین هەبیت، ئامادەیا دیتنا کەمتەرخەمی و خەلەتیان هەبیت بێ جیاوازیا لایەنگریا سیاسی، ژ بەر کو ئارمانجا هەمی پارت و لایەنەکی سیاسی پێشئێخستن و ڕێکخستنا وەڵاتییە و ب دەستڤەئینانا مافێن نەتەوەیییە د بن ئێک ناڤ و ئاڵادا، و ب تنێ جیاوازیا ڕێ، بیر و رایان هەیە.