هەردەمێ ئەم بەحس ل ژیانا ئاکنجیبوونێ ژ دەرڤەی وەڵاتی دکەین، بەلكو ئێک ژ بزەحمەتترین پرسیارێن ل دەف دایك و بابان دروست دبن ئەوبیت، ئەرێ دێ چاوا و ب چ شێواز زاروكێ خو ل جهەك یان وەلاتەكێ بیانی پەروەردەكەت؟، ب شێوەیەكی كو كلتور و ناسنامە و ڕەسەناتیا خۆ ب پارێزیت. گۆمان تێدا نینە ئەم هەمی حەز دكەین زارۆکێن مە مفای ژ خالێن بهێز یێن سیستەمێ ڕۆژئاڤای وەربگرن، وەک ڕێكخستنا دەمی و ئەنجامدانا كاران ددەمێ خودا، پشت بخۆ بەستنا زاروكی، و..هتد. لێ ڕەنگە د هەمان دەم ژی دا تڕسەك یانژی پرسیارەك لدەف دەیك و بابان دروست دبیت ئەرێ ئەڤ زاروكە دێ ڕهـ و ڕیشالێن خو یێن كوردی و بوهایێن خو یێن خێزانێ پارێزیت یان دێ ژ دەست دەت، و ئەرێ ئەم چاوا د هاریكاربین دا ئەو ل وەلاتەكێ بیانی ژی ناسنامەیا خۆ ژ دەست نەدەت؟

ئەز وەک ڕاوێشکارەکا دەرونی، دێ ل خوارێ هندەک خالێن گرنگ و سادە بەحسکەم، کو دێ د هاریكاربن بو مە، دا کو پرەکا ئارام د ناڤبەرا جیهانا مالێ و جیهانا دەرڤەی مالێ دا دروست بکەین:

ڕێنمایی و خالێن سەرەکی یێن پەروەردەیی

1. زمانێ دایکێ بکە بنەما:
   یا پێدڤیە خێزان ب گشتی مالێ بكەتە جهەكێ ئارام بو زمانێ دایكێ، ژبەركو زمان بتنێ پەیڤ نینن، بەلكو هەست و ناسنامەنە ب تایبەت دایك و باب لدەمێ تو د مال دا ب زمانێ كوردی د ئاخڤی تو بتنێ وی فێری زمانێ وی ناكەی، بەلكو تو وی زارۆكی ب هێزتر ب رهێن ویڤە گرێددەی.
2. جوداهیان شلوڤە بکە، نە یاسایێن توند:
   دەمێ زارۆک پرسیارێ دکەت بۆچی هەڤالێ من یێ ل قوتابخانێ دشێت ڤێ ڕەفتارێ بکەت لێ ئەز نەکەم یان بوچی هەڤالێ من یان جیرانێ مە فلان جلكی دكەتێ و ئەز نەكەمێ؟لدەمێ دەیك و باب بتنێ بەرسڤا"چونکی ئەم کوردین و وە ناکەین" ددەتە زارۆكی بەلكی ئەڤ بەرسڤە بتنێ بەس نەبیت كو زارۆك بدروستی تێبگەهیت، ب زمانەكێ جوان و هەستەكێ پڕ ژ دلوڤانیێ بۆ روهن بکە، کو هەر کەلتوورەکی بوهایێن خۆ یێن جودا هەنە و ئەڤە شێوازێ خێزانا مە یە بۆ تێگەهشتن ژ ژیانێ، بو ڕوهن بكە كو یا جوانە ئەو ڕێزێ ل كلتورەكێ بیانی بگریت لێ د هەمان دەمژیدا دڤێت پاراستنێ لسەر ڕەسەناتیا خۆ بكەت، ژبەركو ئەو ژی وەكی وان خودان بوها و كلتورەكێ جودا و تایبەتە.
3. دروستکرنا شانازیێ ب ناسنامەیێ:
   وی هەستی بو زارۆكێ خۆ چێكە، كو ئەو شانازیێ ب ناسامە و گەلێ خویێ ڕەسەن ببەت و حەز ژێبكەت، بو زارۆكێ خو بڕێكا چیڕوک و سەرهاتیان بەحس ل جەژن و هەلكەفت و خوارنێن كوردی و داب و نەریت و هەر تشتێ ب كلتورێ وی یێ ڕەسەنڤە گرێدای بكە، پێدڤیە وی پێزانین لسەر ڕەسەناتیا خۆ هەبن، دا كو بساناهی بەرەف ئەنجامدانا دابونەریت و كلتورەكێ بیانی نەچیت و كلتورێ خۆ پشت گوهڤە بهاڤێژیت.
4. ئازادیا دانوستاندنێ بدێ ل شوینا سەپاندنا هندەك بریارێن ڕەق:
   ل وەڵاتێن بیانی زارۆک فێری هندێ دبیت كو پرسیاران بکەت و بوچوونا خۆ بێژیت، ئەگەر دەیك و باب د مال دا بتنێ ب زۆری یان سەپاندنا یاسایێن ڕەق سەرەدەریێ دگەل وان بكەن، بەلكو دێ ڤالاهیەك دناڤبەرا وان و زاروكێن واندا دروست بیت، گوپیتكا سەركەفتنا دەیك و بابان د پەروەردەكرنا زاروكێن خودا و شرینكرن و نیشاندانا كلتورێ وان یێ ڕەسەن بو زارۆكێن وان دێ ئەو بیت، كو دایك و باب بهێلن زاروك ب ئازادی بو وان ب ئاخڤن و گوهداریا هزر و بوچوون و ئاخفتنێن زارۆكێن خو بكەن، و بڕێكێن ساخلەم و تەندروست هزرێن وان ڕاستڤەبكەن، دیسان پێدڤیە دەیك و باب دگەل دا ببنە هەڤال، داكو وان ئاگەهـ ژێ هەبیت ژبەركو بڤێ ڕێكێ دێ وی زاروكی باوەری بتەهەبیت و ب ئارامی بەحسێ هەمی هەست و هزرێن خۆ بوتە كەت.