ئۆپۆزسیۆن ب شێوەیەکێ گشتی و د سیستەمێن سیاسی یێن دیموکراتیدا، پێکهاتییە ژ هێز، پارت یان ئاراستەیێن سیاسی، یێن کو نە دەستهەڵاتبن و ب ڕەنگەکێ ڕێکخستی و ل سەر بنەمایێ دەستووری و یاسایی ڕەخنێ ل کارێن حکومەتێ دگرن، چاڤدێریا سیاسەتێن وێ دکەن، و هەردەم بەرهەڤن بۆ وەرگرتنا دەستهەڵاتێ ب ڕێکا هەلبژاردنان.

ئۆپۆزسیۆن دشێت ببیتە دوو جۆر. جوداهیا د ناڤبەرا ئۆپۆزسیونا ئاڤاکەر و تێکدەردا ئەوە کو ئۆپۆزسیونا زانستی و دیموکراتی، ئۆپۆزسیونەکە بۆ حکومەتێیە نە بۆ دەوڵەتێ، ئانکو ئارمانجا وێ پێشڤەبرنا وەڵاتییە نە لاوازکرنا دەزگەهێن وێ. ڕامان ئەڤەیە: ئەگەر ڕەخنەیێن ئۆپۆزسیونێ نە بۆ دیارکرن و ڕاستڤەکرنا خەلەتی و کەمتەرخەمیا حکومەتێ بن، بەلکو ئارمانجا وان تێکدان و لاوازکرنا دامودەزگەهێن حکومی یێن وەڵاتی بیت، ل وی دەمی دکەفتە بن پێناسەیا ئۆپۆزسیونا تێکدەر.

د سیستەمێن دیموکراتیدا، ئۆپۆزسیۆنێ گرنگیەکا مەزن و کارتێکرنەکا بەرچاڤ هەیە بۆ پاراستنا سیستەم و یاسایێن حوکمرانیێ. پێدڤیە د هەر هەلبژارتنەکێدا گۆهۆڕین ب سەر دەستهەڵاتێدا بهێن بۆ پاراستنا نیشتمانی، و نویکاریەک بۆ پێشئێخستن و باشترکرنا ژیانا خەلکی و بهێزکرنا قەوارەیێ وەڵاتی هەبێت.

واقیعێ ئۆپۆزسیۆنێ ل هەرێما کوردستانێ

ئەم دێ بەحس ل هەرێما کوردستانێ کەین. ل هەرێما کوردستانێ، بارودۆخێ سیاسی و حوکمڕانیێ د قۆناغەکا هند هەستیاردا دەرباز دبیت، کو تێدا قەیرانێن جوراوجۆر و ڕەوشا ئالۆزا ژیانا خەلکی، بڕێڤەبرنا وەڵاتی و حکومەت ئێخستیە بن پرسیارەکا مەزنڤە. ژ هەژی گوتنێیە کو ئۆپۆزسیۆنێ ڕۆلەکێ بەرچاڤ و کاریگەر د ڕەخنەگرتن و داخازکرنا مافێن خەلکی د ڤێ قۆناغێدا هەبوویە، و ئەڤە ب خاڵەکا ئەرێنی دئێتە هەژمارتن.

لێ ب واقیعی، ڕۆلێ ئۆپۆزسیۆنێ د ڕەخنەگرتنا حکومەتێدا دچیتە ژێر هەردوو جۆرێن ئۆپۆزسیونا ئاڤاکەر و تێکدەر. سەرەڕای کو مە بەحس ل گرنگیا ڕۆلێ ئۆپۆزسیونا کوردی کر د ڤێ قۆناغێدا، لێ مخابنیڤە، گەلەک جاران ئەم دبینین کو پشکەک ژ هێزێن ئۆپۆزسیونێ دوور کەفتینە ژ وێ پێناسەیا زانستی و ئاڤاکەر. ڕەخنەیێن وان نەبووینە چارەسەری بۆ پێشڤەبرنا دەزگەهێن دەوڵەتێ، بەلکو ل هندەک قۆناغاندا بووینە ئامرازەک بۆ تێکدان و لاوازکرنا پێگەهێن نیشتمانی، و ئەڤە ب ڕوونی دکەڤیتە دناڤ خانەیا ئۆپۆزسیونا تێکدەردا.

ئاستەنگ و خاڵێن لاواز د ئەزموونا بڕێڤەبرنێدا

ئەرێ ب ڕاستی ژی ئۆپۆزسیون دشێت تاقیکرنا بڕێڤەبرنا وەڵاتی ب باشی و سەرکەفتیانە دەرباس بکەت؟
ب مخابنیڤە، ئەگەر چ ژ دەرڤەی ڕۆلێ دەستهەڵاتێ، ئۆپۆزسیۆن ڕۆلەکێ گرنگ د وەڵاتیدا هەیە، لێ ئۆپۆزسیونا کوردی هێشتا نەگەهشتییە وێ قۆناغا پێشڤەچوون و پسپۆریێ و پێدڤی ب ئەزموونا پتر هەیە. لەوڕا، پارتێن دەستهەڵات خودان ئەزموونەکا درێژ و مێژوویەکا گونجایی نە دگەل سیاسەتا ناڤخۆ و پاراستنا قەزیا کوردی د ناڤخۆ و دەوروبەراندا، ڕۆلەکێ گرنگ دبینن. بەرانبەر ڤێ ئێکێ، ئۆپۆزسیۆنێ پێدڤی ب بەرنامەکێ ڕێکخستی و گۆهۆڕینان هەیە بۆ زێدەتر پێشڤەچوونێ. دا ژ چەند لایەنانڤە سەحکەینێ، ئەو خاڵێن لاواز یێن مە بەحسکرین چنە؟

بڕێڤەبرنا دەرەکی و دیپلۆماسی:

ئۆپۆزسیۆن هەتا نوکە هێزەکا ناڤخۆیا وەڵاتی بوویە کو ڕەخنە ئاراستەی دەستهەڵاتی کرینە بۆ باشترکرنا ژیانا خەلکی. لێ قۆناغا گرتنە دەستا دەستهەڵاتی ب ڤی شێوەی نینە کو ڕەخنەیێن وان بشێن ب تەمامی د باشترین بارودۆخدا وەڵاتی بڕێڤە ببەن؛ بەلکو سەرەدەریکرن دگەل هەڤپەیمانێن سیاسی و سیاسەتا دەرڤە گەلەک ژ ڤێ ئالۆزتر و ب زەحمەترە. مەترسی ئەوە کو هێزەکا ناڤخۆیا تەمەن گەنج و جەماوەری، کو هەمی جەماوەرێ خۆ ب ڕەخنەیێن ڕەمزی ل دەستهەڵاتی کۆمڤە کربیت، د ڤی دەمیدا ئامادە نەبیت ب سەرکەفتیانە وەڵاتی بڕێڤە ببەت.

هێزا سەربازی و ئەزموونا دەستهەڵاتی:

کەرتێ سەربازی ئێک ژ ئالۆزترین و هەستیارترین کەرتێن وەڵاتییە، ژ بەر کو ڕاستەوخۆ ڕۆل هەیە د پاراستنا ئاسایش و ئارامیا نیشتمانیدا، ب تایبەتی ل هەرێمێ. ژ بەر کو بۆ ماوەیەکێ درێژە گۆهۆڕین د دەستهەڵاتێدا نەهاتینەکرن، یا دیارە کو ئەگەر ئۆپۆزسیۆن ڕابیت ب دانانا حکومەتەکا نوی، دێ چەندین گۆهۆڕینان ئەنجامدەت و ئەندام و ئەوان کەسان دابەش کەت یێن کو وان باوەری پێ هەین. لێ ژ بەر کو ئەڤە کەرتەکێ هەستیارێ وەڵاتییە و ل بەرانبەر نەپشراستییا د بڕێڤەبرنا دروست و ئەزموونا کێم یا ئۆپۆزسیونێ، حکومەت زێدەتر پسپۆری د ڤی بیاڤیدا هەیە.