«لاوکۆ ئەڤینی شەرمە، گەلەکا ب ترسو سەهمە، ئەڤینی گونەهه ل جەم مە..»

شەهریڤانا کوردی گەلەك جوان د سترانەکا خوە دا دبێژیت ئەڤینی ب ترس و سەهمە. ترس و شەرم د ئەڤینیێ دا گەلەك پیروزییا بەرز ڕادگرن، ئانکو ئەگەر ترس و شەرم د جڤاکێ مەدا نەبان دا گەلەك ژ ڕەوشا نهوو خرابتربیت! د کەسایەتیا تەدا ئەگەر ترس و شەرم هەبن، پشتراستبە ل پاشەرۆژەکا نێزیك تۆ دێ سوپاسدارێ ترس و شەرما خوە بی، چونکی د ئەنجام دا ئەڤینی تشتەکێ دەمکیە! لێ ڤیان هەردەم د دلی دا دێ یا زیندی بیت.

ئەگەر تە ترس و شەرم بۆ ئەڤینیێ لبن پێکرن، بێی دوو دلی دێ پەشیمانی و شکەستنا کەرامەتێ بیت بەهرا تە. هەتا ئیمام بوخاری ژ پێغەمبەرێ مە "موحەممەد" سلاڤ لێبن ڤەگوهاستیە دەمێ دبێژیت: ئەگەر تۆ شەرم نەکەی هەر تشتێ تە دڤێت بکە. یا ئاشکەرایە مەرەم ژ شەرمێ یان ترسێ نە د بابەتێ پێشڤەبرنا کەسایەتی و دیارکرنا بەهرەیان دایە، بەلکو مەرەم ژێ پاراستنا کەرامەتێ یە.

ئەڤینی: هەستەکێ سرۆشتی یان تاقیکرنەک بۆ ویژدانێ؟

د پارچەیا دییا سترانێ دا دبێژیت: "ئەڤینی گونەهە ل جەم مە"، ئەرێ ژ راستا ئەڤینی گونەهە؟ ئەگەر گونەهبیت بوچی هەستەکە بێی ئاگەهیا مە دناڤخویامەدا سەرهلددەت؟

ب بوچوونامن ئەڤینی و هەستێن تە تاقیکرنن بۆ تە! بۆ نموونە کا چاوا دەمێ تۆ برسی دبی تۆ د شێی خارنەکا حەلال و ساخلەم بخوی، و د هەمان دەم دا تۆ دشێی خارنەکێ بدزی و بخوی یان تۆ دشێی گوشتێ بەرازی بکری و بخوی! د ئەنجام دا دێ هەر تێر بێ، بەلێ خارنەك دشێت تەندروستیا تە تێكبدەت و تە نەخوش بکەت و خارنەکا دیتر ژی دشێت ساخلەمیا تە جێگیر بکەت. لێ ئەگەر تە بەردەوام خارنا ب زیان خوار، تۆ دێ نەخوش بی و ل داویێ تۆ یێ نەچاری دەستبەرداری هەر جورەکێ خارنا ب زیان بی و ل جهێ وان حەب دەرمانا وەکی چارەسەری بکاربینی.