مێژوو ب تنێ کۆمەکا ژمارە و بەرواران نینە. مێژوو چیرۆکا مرۆڤانە، چیرۆکا ئەو کەسێن کو د دەمێن سەخت و دژوار دا ژیاین، بڕیارێن مەزن دایین، خەبات کری، هندەک جارا سەرکەفتی و هندەک جاران ژی زیان دیتی. مێژوو ئەو دەنگەیە، کو ئەگەر ئەڤرۆ نەهێنە گۆتن و نڤیسین، دێ ڕۆژەکێ بۆ هەتا هەتا بێدەنگ بن.

ل ناڤ مێژوویا کوردیدا، گەلەک چیرۆکێن مەزن یێن هەین، کو ل پشت هەزاران بەڵگە و بیرهاتنان دا ڤەشارتینە، چیرۆکا چیایان، کۆچ و ئاوارەیی، خەبات و هیڤی، و چیرۆکا کەسانێن کو ناڤێ وان بوویە بەشەک ژ ناسناما مە.

ل ناڤ ڤان چیرۆکان دا، ژیانا "مەلا مستەفا بارزانی" جهەکێ تایبەت یێ هەی. بۆ گەلەک کەسان، ناڤێ بارزانی تنێ ناڤەکێ مێژوویی نینە، بەلکو بەشەکێ گرنگە ژ بیرەوەرییێن نەوەیەکی، کو دگەل چیا، کۆچ و سەختییان دا مەزن بووی.

پەرتووکا «هێزا چیایێن بلند» و پرەک د ناڤبەرا دوو نەوەیان دا

پەرتووکا «هێزا چیایێن بلند» هندەک ژ ڤێ بیرهاتنێ بۆ نەوەیێ داهاتی ڤەدگوهێزیت. گۆتوبێژا ناڤبەرا باپیر و نەڤیێ وی ل ناڤ پەرتووکێ دا، تنێ چیرۆکەک نینە، بەلکو پرەکە ل ناڤبەرا دوو نەوەیان دا، باپیر بۆ دەربازبوویی ڤەدگوهێزیت و نەڤیێ وی گوهێ خۆ د دەتێ و د نڤێسیت.

ئەڤە گەلەک یا گرنگە، چونکی مێژوو دەمەکێ زیندی دمینیت کو ژ نەوەیەکێ بۆ نەوەیەکێ دی بهێتە گەهاندن. ئەگەر نەوەیێ نووی نەزانیت کەسانێت بەرێ چ ب سەرێ وان هاتییە، ئەو ب تنێ بەشەکێ ژ مێژوویێ ژ دەست نادەن، بەلکو بەشەک ژ ناسناما خۆ ژی دێ ژ دەست دەن.

سەرکردایەتی د ناڤ سەختییان و چەمکێ لێبوورینێ دا

هەروەسا، ل ناڤ پەرتووکێ دا هەلویستێن جوان یێن هەین. بۆ نموونە، دەمەکێ پێشمەرگە ل ناڤ سەختییێن چیایان، بەفر و برسیاتییێ ڕا دەرباز دبوون، بارزانی ب خۆ ژی دگەل وان دا ب پێیا دچوو. دەمەکی هەسپەک بۆ هاتە پێشنیارکرن، ئەوی گۆت:

«هندی ئێک ژ هەڤالێن من ب پێیا بچیت، ئەز ژی دێ ب پێیان چم»

ئەڤە وێنەیێ سەرکردەیەکێ ڕاستەقینەیە، کو خۆ د هەمان دژواری و سەختیێن خەلکێ دەوروبەرێ خۆ دا دبینیت.

ل بەشەکێ دی دا، بەحس ل لێبوورینێ دکەت. دەمەکێ بەحس ل رەفتارێ دگەل کەسانێن کورد کو پێشتر دژی خەباتا کوردی بوون دکەت، دبێژیت: «ئەم هەمی کوردین. ئەم هەمی ئێک خێزانین.» ئەڤ ڕستەیە نیشانددەت کو جیاوازی نابیت، و هەمیشە نەدڤیا ببنە ئەگەرێ دووبەرەکیێ و دابڕانێ.

نڤیسین وەک ئامرازێ پاراستنا یادەوەرییا نەتەوەیی

ژ لایەکێ دی ڤە، پرسیارەکا گرنگ ل پێشیا نەوەیێ ئەڤرۆ یا هەی: ئەرێ ئەم چەند مێژوویا خۆ دخوینین؟

ل ڤی سەردەمێ کو زانیاری ب لەزەکا مەزن ل سەر تۆڕێن جڤاکی بەڵاڤ دبن و هەمی ڕۆژەکێ هزاران ڤیدیۆ و دەقان دبینین، مەترسییەک یا هەی کو چیرۆکێن قووڵێن ڕابردووی بەرزە ببن. لەوڕا نڤیسین تنێ کارەکێ ئەدەبی نینە؛ نڤیسین پاراستنا یادەوەرییێ یە. ئەگەر کەسەک ئەزموونا خۆ نەڤەگوهێزیت، و چیرۆکا پێشییان نەهێتە گەهاندن، دگەل بۆرینا دەمی بەشەک ژ بیرهاتنێت مە دێ ژ دەست چن.