هەر تشت

هەر تشتەک د دەمێ خودا یێ مەزنە و گرنگە. ل دەمێ تو د ئەزمونێن خاندنێ دا و سپێدەهیان، ئەو یا مەزنە؛ لێ پشتی چەندێ گەلەک ئاسایی دبیت ل پێش چاڤ و هزرێن تە. یان هێش سادەتر، ل دەمێ د زاروکینیێ دا ئەم فێری پیتان دبوین، ئەو بو مە چیا بوون، بەلێ نوکە ب ئاسانی دخوینین و دنڤیسین—بەلکی پتر ژ زمانەکی ژی مە ئاریشە دگەل نەبیت، یان هەما هزر ژی نەکەین ڕۆژەکێ مە هند خەم سەرا دخارن حەتا کو فێربوین، و نوکە ژیک دەمێ ئەم باسێ وان ڕۆژان دکەین، پێ دکەینە کەنی کا چەوا مە هندە خەم بۆ تشتێن بچویک دخارن.

کاودانێن ئالۆز و پێدڤیا هۆشیاریا عەقلانی

ئەڤرۆ و ئەو کاودانێ نوکە تو د ناڤ دا دژی، بۆ تە یا ب زەحمەت و هند نەخۆش دبیت هەتا ڕادەیەکێ کارتێکرنێ ل خەو و کارێ تە بکەت و ژ خەیالا تە نەدەرکەڤیت. تێ دگەهم و ئەز ژی هندەک جاران دکەڤمە د ڤی تشتی دا، بەلێ ئەم پێدڤی ب هۆشیارکرنێ نە ژ لایێ ئێکودوو ڤە—نەکو ب وی شێوازی کو یێ بەرامبەر هزر بکەت تو ب کێمی ددانی، بەلکو هۆشداریەکا عەقلانی کو بشێت وەرگریت بێی کو هەست ب کێماتیێ بکەت.

مەزنکرنا بابەتان و تێرکرنا مێشکی ب داتایێن نەپێدڤی

بەلێ ئەڤە ژ لایەکی ڤە دەمێ ئەم گەلەک دچینە دناڤ هەر بابەتەکی دا و ژ قەبارێ وێ مەزنتر لێ دکەین. هەر وەکی د پەرتوکا نارین محمد "بڕیاردان سەرێن رێیان ڤەدکەت" دا بابەتەک هەیە ب ناڤێ: هویرکاریێن بچویک؛ یا باسی هندێ کری کا بابەت چەند ژ قەبارەی دهێنە مەزنکرن، و نیڤا وێ ژیک یا پێدڤی نەبو بگەهیتێ، چێدبیتن هەما پێدڤی نەبو ل سەر بهێتە ئاخفتن و بچیتە د ناڤ مێشکێ تە یێ ناڤخۆیی دا.

مێشکێ مە دشێت هەتا ڕادەیەکێ داتایان ب هەلگریت، هەر چ نەبیت بلا ئەو قەبارە بۆ تشتەکێ پێدڤی بیت داکو مفای ل مە بکەت.

ئەڤە ژی ئێك ژ ڕێکێن ژ بیرچوونا کارێن ڕۆژانە و پێدڤی بۆ مە، کە مە ژبیر نەکربان؛ وەکی خارنا دەرمانان ل دەمێن درست، ئەنجام دانا راهێنانەکێ ل وی دەمێ تە بۆ خۆ دانای، یان دروستکرنا خارنەکا تە بڕیاردای ل دەمێ بهێنڤەدانێ بۆ خۆ دروست بکەی. هەر تشتێ بچویک کارتێکرنێ ل تشتێ مەزن دکەت بێی کو مە ئاگەهـ ژێ هەبیت.