گیانەوەرێن کولانان، گەهاندنا دەنگێ بێ دەنگان

د ناڤ ڤێ جیهانا بلەز و پڕ ژ كار دا، دناڤ كولانێن باژێرێن مەدا، هندەك دروستكریێن بێدەنگ و ب ژیانەكا پڕ ژ ململانێ دناڤ کۆڵانێن باژێرێن مە دا دژین، کو پتریا جاران چاڤێن مە بسەردا دەرباز دبن بێی كو هەست ب ئازارێن وان بكەین، وان زمانەكێ وەكی یێ مە مرۆڤان نینە، گیانەوەرێن کۆڵانان بێ دەستهەڵاتترین بەشێ جڤاکی نە، نە دشێن بەحس ل برسیبونا خۆ بكەن نە ژی دشێن گازیا ئازارێن خۆ بگەهیننە مە، نەژی دشێن لسەر ڤی ڕویێ ئەردی سكالایێ بكەن بەرامبەر وان مرۆڤێن زورداری و توندوتیژیێ دگەل وان دكەن و وان ژ ژیانكرنێ بێ بەهر دكەن، چ پێنەڤێت سكالایا ڕوژا دوماهیێ یا جودایە!!

دڤێت هەر كەسەك بزانیت كو تێگەهشتنا ئەڤێ بێ دەستهەڵاتیێ دەستپێكا ڕاستەقینەیا هەمبێزا مرۆڤایەتیێ یە، کو خودێ د ناخێ هەر ئێک ژ مە دا چاندی. چونكی مروڤایەتیا مە ب شێوازێ ڕەفتاركرنا مە بەرامبەر لاوازترین دروستكری دهێتە تاقیكرن، د وەرزێن سەخت یێن ساڵێ دا، چ د گەرما دژوار یا هاڤینێ دا، کو چپكەكا ئاڤێ ب دەست نا کەڤیت یان د وەرزێ بەفر و سەرمایا گران یا زڤستانێ دا، کو پەناگەهەک بۆ گەرمکرنا لەشێن وان نینە، ئاژەڵێن کۆڵانان دکەڤنە بەر مەترسیێن زۆر گران و ئەو پێدڤی ب بچویكترین دەستێ هاریكاریێ دبن. دانانا ئامانەكێ ئاڤێ ل بەر دەرگەهێ مالان یان پێدانا هندەك ژ خوارنێ بو وان ئەرکەکێ بچویکە ل سەر ملێن مە، لێ دێ چەند هەستەكێ خوش بیت ئەگەر تو بزانی یا ژیانبەخشە بۆ وان، و ژ لایەکێ دی ڤە ئازاردان و ئەنجامدانا توندوتیژیێ دژی ڤان دروستکریێن بێ زیان، نیشانا برینەکا گرانە د ڕەوشت و ئارامیا جڤاکی دا، کو پێدڤیە هەر زوی بهێتە ڕاگرتن و نەمینیت. دیسان ژلایێ ئاینی و ڕۆحی ڤە ژی، دلوڤانی برن ب گیانەوەرەکێ تێنی یان برسی دەرگەهەکێ مەزنێ خێر و بەرەکەتێ یە کو گۆنەهان ژێدبەت و ڕوحا مروڤی ئارام دکەت، هەروەسا دەرونناسی ژی ئەڤێ چەندێ بەحس دكەت، کو دەمێ مرۆڤ دەستێ دلۆڤانیێ درێژ دكەت ژبو دروستکریەکێ بێ دەستهەڵات، هەستەکێ کوویر ب وژدان‌ و ئارامیێ و ئازادبوون ژ ستریس و فشارێن ڕۆژانە دکەڤیتە دناخێ وی دا، چونکی ئەڤ هاریکاریە بەری کو مفا و قەنجیەك بیت بو ئاژەڵی، ناخێ مرۆڤی بخۆ ژ ڕەقبوونێ پاقژ دكەت. زێدەباری ڤێ چەندێ ژی ئەڤ دیاردا دلوڤانیا مەیا بەردەوام دگەل گیانەوەرێن بێ زیان و پێدڤی ب هاریكاریێ دشێت ببیتە قوتابخانەكا مەزن بو زاروكێن مەژی كو وان فێری درێژكرنا دەستێ هاریكاریێ بكەت، ژبەركو زاروك نە ب ئاخفتنێن مە بەلكی ب ڕەفتارێن مە فێردبن دەمێ زاروكەك دبینیت دایك و بابێن وی دلوڤانیێ ب گیانەوەرەكێ لسەر جادێ دبەت خوارنێ و ئاڤێ ددەتێ د ڕەوشێن نەخوشدا هاریكاردبیت دگەل و ب نەرمی ڕەفتارێ دگەل دكەت توڤێ هاریكاری و بەخشندەیێ د دلێ ویدا شوین دبیت، كو بەرهەمێ وێ دێ ئەوبیت ڤی زارۆكی دویر دكەت، ژ بون ب كەسەكێ توندوتیژ و بێ دلوڤانی و دبیتە كەسایەتیەكێ خودان بەرپرسیاری.