د ژیانێ دا، ئێک ژ زەحمەتترین و هەستیارترین قۆناغان بۆ هەر دایکەکێ ئەو دەمەیە، کو دبینێت کوڕێ وێ بەرەڤ قۆناغا هەڤژینیێ و ئاڤاکرنا خێزانەکا سەربەخۆ پێنگاڤان دهاڤێژیت.

ل ڤێرێ ئالۆزییەکا دەروونی یا مەزن د ناڤبەرا حەزا کەیفخۆشیێ و ترسا ژدەستدانێ دا دروست دبێت. بەری دایک بڕیارێ بدەت کوڕێ خۆ بگەهینێتە خەونا وی، پێدڤییە خۆ ئامادە کەت کو کوڕێ وێ دێ بیتە زەلامەکێ سەربەخۆ، دێ مالا خۆ دانیت و دێ سیستەمەکێ نوو یێ ژیانێ دگەل خێزانا خۆ دانیت ژ دیری وی سیستەمێ تێدا مەزن بووی.

ژ حەژێکرنا خودانکرنێ بەرەڤ حەژێکرنا ئازادکرنێ

تێگەهشتن و حەژێکرنا دروست یا دایکێ ب تنێ د پەروەردەکرن و خودانکرنێ دا دیار نابێت، بەلکو د وی دەمی دا دیار دبێت دەمێ کوڕ مەزن دبێت و بەرەڤ ئارمانجێن خۆ ڤە دچێت.

دەمێ دایکەک بزاڤێ دکەت کوڕێ خۆ ل ژێر سێبەرا دەستهەڵات و حەزێن خۆ بهێلیت بێی کو ڕێزێ ل تایبەتمەندیا ژیانا وی یا نوو بگریت، وی دەمی دێ ئاریشێن کوور د پەیوەندیا وان دا چێبن.

حەقیا ژیانێ ئەڤەیە: چاوا تە ڕۆژەکێ ژ ڕۆژان ژیانا خۆ دگەل «کوڕێ خانمەکا دی» (هەڤژینێ خۆ) ئاڤا کر، ئەڤرۆ ژی مافێ کوڕێ تە یە بچێت دگەل خانما خۆ ژیانەکا سەربەخۆ دەستپێبکەت. ئەڤە سنەتا ژیانێ یە، نە بێوەفایی و پشتگۆهکرنا تە!

ئەنجامێن پەیوەندیێ دەمێ مالا دایکێ دبیتە هۆلا شەڕی

دەمێ دایک نەشێت ڤێ ڕاستیێ قەبوول بکەت و بەردەوام ئاریشان پەیدا بکەت، دێ ئەنجام ئەڤە بن:

1. ڕەڤینا کوڕی: کوڕ دێ هەست ب تەنگاڤیێ کەت و بەردەوام دێ هەوڵدەت خۆ ژ چاڤپێکەفتنێن خێزانی دوور بێخێت.
2. شەڕ و ئالۆزیێن بەردەوام: هەر ڕوونشتنەک یان سەرەدانەک کو دڤێت یا تژی بیت ژ ئارامیێ، دێ بیتە شەڕ و گازندە، ب تنێ ژ بەر کو کوڕی بڕیار دا ب مافێ خۆ یێ سروشتی ڕاببیت.
3. تێکچوونا ناخێ کوڕی: کوڕ دێ د ناڤبەرا بەرپرسیارەتیا بەرامبەر دایکا خۆ و پاراستنا ئارامیا خێزانا خۆ دا تێکچێت، و هەست ب گونەهباریێ کەت د دەمەکی دا کو وی چ تاوان نەکرینە.

دڤێت دایک بزانیت: ئەگەر تە بڤێت کوڕێ تە یێ نێزیکی تە بیت و بەردەوام ڕێز و حەشژێکرن بۆ تە هەبیت، بزاڤێ نەکە خۆ پاڤێژیە د ناڤ ژیانا وی یا تایبەت دا.

چارەسەری: چاوا پەیوەندیەکا تەندروست ل سەر بنەمایێ ڕێزێ دهێتە ئاڤاکرن؟

بۆ دەربازبوون ژ ڤێ ئاریشەیا جڤاکی و دەروونی، پێدڤییە هەم دایک و هەم ژی کوڕ شێوازێ هزرکرنا خۆ بگۆهۆڕن و ڤان پێنگاڤان بجهـ بینن:

بۆ دایکێ (گۆهۆڕینا تێگەهێ کۆنترۆڵکرنێ و حەژێکرنا ب مەرج)

• تێگەهشتن ژ سنووران: قەبوولکرنا وێ چەندێ کو مالا کوڕی جهەکێ تایبەتە، بڕیارێن وان یێن ناڤخۆیی ڕێزگرتن دڤێت و پێدڤی ب مایتێکرنێ نینن.
• دوورکەفتن ژ ڕۆڵێ «قوربانی»: بەردەوام بکارئینانا خەم و نەخۆشیێن بەری نوکە بۆ دروستکرنا هەستێ گونەهباریێ د ناخێ کوڕی دا، ب تنێ پەیوەندیێ سارتر دکەت.
• دانانا ئارمانجێن نوو: دایک هندەک ئارمانجێن دی دانیت دووری کوڕێ خۆ و خێزانا وی (وەک پەیوەندیێن جڤاکی، عیبادەت، وەرزش، یان هەر تشتەکێ دی) دا کو مژویل ببیت و خۆ دوور بێخێت ژ سەر کۆنترۆڵکرنا کوڕێ خۆ و خێزانا وی.

بۆ کوڕی (هەڤسەنگیا گرنگ)

• دانانا سنووران ب نەرمی و ڕێز: بێی ڕەقیا ئاخفتنێ، بێژە دایکا خۆ کو تو بەردەوام حەش وێ دکەی، بەلێ بۆ ڕوون بکە کو بڕیارێن ژیانا تە یا خێزانی هێلا سورن و یێن تە و هەڤژینا تە نە.
• تەرخانکرنا وەختی بۆ دایکێ: سەرەدانا وێ بکە و چ جاران دەستخالی نەچە، و بۆ دیار بکە کو وێ جهێ خۆ یێ تایبەت د دلێ تە دا هەیە و تو هەر حەشێ دکەی.
• پاراستنا سەربەخۆیا ژنێ: چ جاران هەڤژینا خۆ نەکە قوربانی دا کو دلێ دایکا خۆ خۆش بکەی؛ حەق و ئارامیا مالا تە بەرپرسیارەتیا تە یە.