ستران گۆتن بەشەکێ گرنگە ژ ئەدەب و کەلتور و فۆلکلۆرێ مە چ یێ زارکی بیت یان یێ نڤێسی بیت. ستران گۆتن ژی ئێک ژ حنێرێن سترانبێژایە، بتایبەتی سترانا فۆلکلۆری کو گەلەکا درێژە و د ناڤ خۆدا گەلەک ناڤ و جهـ و نامە و پەیامان دگەهینیت.

سترانا فۆلکلۆری و سترانبێژێن فۆلکلۆر بێژ، گەلەک ڕوودان و ناڤێن شار، باژێر، چیا، دۆل، شکەفت، کانی و ڕووبارێن کوردستانێ د ناڤ ڕۆپەلێن خۆ دا هەڵگرتینە. مینا مێژوویەکێ گەلەک تشت پاراستینە، بتایبەتی کارەسات و مەڕگەساتێن دژمنان کو ئیناینە سەرێ کوردان. لەوما دبێژین ستران گۆتن نە هەندا ب سانااهییە هەر وەکی هندەک هزر دکەن.

گرنگە سترانبێژی پاشخانەیەکا هزریا و ڕەوشەنبیری یا باش هەبیت؛ هەرتم بزاڤێ بکەت خۆ پێبگەهینیت د دێڕۆک و جۆگرافیا کوردستانێ دا تا ڕادەکی یێ باش و شارەزا بیت، داکو بکاریت ب باشترین شێوە پەیاما خۆ بگەهینیت. سترانبێژێن فۆلکلۆربێژ و سترانبێژێن سەردەم ژی دڤێت بزاڤێ بکەن خۆ ئاڤا بکەن و گەلەک ل سەر سترانان و سترانگۆتنێ ڕاوەستن، و ل ڕهـ و ڕێشالێن سترانێ بگەڕێن و چیرۆک و سەرهاتیێن وان بزانن؛ چونکی گەلەک ستران هەڵگرێن دێڕۆکەکێنە ب دەنگێ سترانبێژان هاتینە پاراستن د دەمەکی دا کو نڤێسین نەبوو. بەلێ دێ هێشتا باشتر بیت ئەگەر سترانبێژ یێ ئەکادیمی بیت و تشتەکی ژ ئاواز و پەیڤ و فۆلکلۆری ژی بزانیت، چونکی ئەڤە دێ هاریکاریا وی کەن تشتەکێ جوان، خۆش و باڵکێش پێشکێش بکەت.

ئالاڤێن سەرکەفتنا سترانبێژی و پەیاما وەلاتپارێزیێ

پەیڤێن خۆش، سڤک و جوان، دگەل ئاوازەکا خۆش و دەنگەکێ خۆش و ب هەست گۆتن، دێ بنە ئالاڤێن سەرکەفتنا سترانبێژی. سترانگۆتن یان سترانبێژی نە هەما یاریەکەکە دێ کەت؛ دڤێت بزانیت ستران گۆتن، ستران-نامە و پەیامێن گەل و مللەتانە و گەل و مللەت پێ دهێنە نیاسین و دبنە سەفیرێن گەلێ خۆ.