سڕبوونا هەست و سۆزان

تو دێ بینی كو تو وەكی بەرێ نە دشی کەیفخوش بی و نەژی وەكی بەرێ دشێی ب هیڤی بی. روودان ل بەر چاڤێن تە دەرباز دبن و وەكی نەبنە پشكەك ژ تە. تو پەیڤێن جوان دبیژی، لێ ناگەهنە دلێ تە. تو لێبورینێ دبیژی، لێ چ تشت دناڤ تەدا ناگوهۆریت. ئەڤە نە ژبەر وێ چەندێ یە كو تە نەڤیت هەست پێ بكەی، بەلكو ژ بەر وێ چەندێ یە، كو هەستێن تە ماندی بوینە وەكی هەمی وزا خۆ مەزێخیت.

لێ كێشە ل ڤێرێ یە؛ سڕبوونا هەست و سۆزان نە بتنێ تە ژ ئازارێ دپارێزیت، بەلكو خولەکێن شادبوونێ ژی ژ تە د دزیت. تو دێ وەسا ژیانێ دەربازكەی وەكی بتنێ رۆژ دەرباز دبن، بێی كو ب راستی خوشیێ ژێ وەرگری. تو دێ ب لەشێ خۆ ئامادەبی، لێ ب دلێ خۆ ئامادە نینی راستی ئەوە كو چارەسەری نە ب وێ چەندێ یە تو خۆ ب زۆری بێخی ل سەر هەستكرنێ، و نە ب وێ چەندێ یە تو خۆ گونەهبار بكەی ژبەر كو تو هاتیە گوهۆڕین. چارەسەری وی دەمی دەستپێدكەت، دەمێ تو دانپێدانێ بكەی كو تو ماندووی و پێدڤی ب دەمی و ب كەسانێن دی یێن ئارامیێ ددەنە تە، نە ترسێ. ئەو كەسێن تە نەچار ناكەن بهایێ خۆ بسەلمینی، بەلكو بهای ددەنە تە هەست بكەی تو د وی ئاستی دا یێ تژی یی كو دڤێت

هەردەم ب بیر بینە ئەو دلێ ماندی بووی دشیێت ڤەگەریت و چێبیت، و ئەو هەستێن تە ڤەشارتین نامرن، بەلكو ل هیڤیا جهەكێ ئارام دمینن داكو جارەك دی ڤەگەڕن. نەهێلە ئەزموونێن دوهی حوكمی ل سەر هەمی تشتێن داهاتی بكەن. چنكو كەسەكی خەیانەت ل تە كری، رامانا وێ نینە هەمی دێ خەیانەتێ ل تە كەن. و ئەوا روودانەكێ تو ئازار دای، رامانا وێ نینە ژیان ل ڤێرێ ب دویماهی هاتیە.