زەمـــرۆ

هەروەسا نابیت کەس دەنگێ خوە ژی بلندکەت، داکو ئەو بشێت باش گوهێ خوە بدەتە نوچەیێن سەرێ هەمی دەمژمێرا و خەلەکێن دبلاژکری و بەرێ وی ڕکوڕک یێ ل شاشەیا تەلەڤزیۆنێ، ئەز د مینمە حێبەتی ئەرێ ما ستۆیێ وی ڕەق نابیت؟ ما ناوەستیت؟ و هەر نابەین نابەین ژی یێ گازی دکەت و دبێژیت: کچێ چ ل وێ چایێ هات؟ ما نەکەلی؟ هشیاربە... تۆڤێ عەسلی نەبیت نەکەیێ، بلا ژ ئەوێ عێراقی بیت هااا.. و بۆمە گویزا ژی دگەل بینە، بەلێ بالا ژ ئەوێن کوردی بن، باشە... ! بالا... !

گاڤا کابرای سێ چار کۆپێت چایێ ژی ڤەخوارن، دەست هاڤێتە جگارا خوە و کڕ و ئاگر بەردایێ و جار یێ فڕەکێ ل چایێ ددەت، جار ژی یێ قورمەکا وەسا ل جگارێ ددەت و د هەلمریسیت هەما دێ بێژی شەکر و گەزۆیێت پێڤە و یێ ئالەکێن خوە ژ دویکێلی پف دکەت و وی دویکێلی هەمیێ بەرددەتە د ژۆرڤە و دکەتە تەمەدوی و تمبلخانە، دێ بێژی ئەڤە تەیارا دویکێلی یە و تو بەرو بەرسنگێت وی ببینی دێ بێژی ئەڤە سەڕادە ژ کونا ژ بەر چریسکێن جگارا.

گاڤا مێهڤانەک ژی هات، یا ستار، ڤێجا دێ گەرم بیت و دێ هندەک قاپا بەردەت و دێ پڕچک ژ دەڤێ وی دەرکەڤن و دێ ئاخڤیت و هەر تەڤرەکی ل جهەکی دەت، ڤێجا ب وی دەنگێ بلند و نەخوەش و بێ بێهنڤەدان و بێ مۆلەت و راوەستیان دێ بێژی: ئەڤە ئاشێ ئاڤێ یە! یان ژی دێ هزرکەی هەر دوو لاچلاچکێن وی لاستیکن، نە جارەکێ هزار جارا حەراما ڕەش بیت کو ئەڤ کە سە خۆلەکەکێ بتنێ نەبابۆ خۆلەکا چ؟ حالێ چ؟ چرکەکێ ژی دەڤێ خوە دانیتە سەر ئێک یان دەلیڤەی بدەتە ئێکی کو پەیڤەک ژ دەڤی دەرکەڤیت، ئەو تشت هەمی نینە و خودێ هار یکار بیت! قازیێ سەرپشتێ یە و کەس ژی نەشێت بێژیتێ: موییەکێ خواهرێ ل پشتا چاڤێن تە.

گاڤا دەنگێ ئامانێن دانێن خوارنێ ژی دهێت ب سەرخوەڤە دهێت و ڕادبیتەڤە و مێهڤانکا خوە ڤەددەت و هند خوارنێ دخۆت، دێ بێژی یێ ژگێرێ بەردای، لێ گاڤا خوارنا خوەژی تـێرخوار جارەکا دی دێ شپ و خوە ب عەردی دادەت و درێژکەتەڤە و ڤێجا د سەر وان حالاڕا ئەفەندی سەروک خێزانە و خودێ ژیێ وان درێژکەت کۆسکەکا عەیالی ژی یا هەی، بەلێ مال کمباخی خوە تلا بڕی خوێ ناکەت و شەڤ و روژا کارەکێ هەمبەر بهایێ عانەکی بتنێ ژی ناکەت.