دەنگێ تە بێهنا بەهارێ

وەک شنەبای
دەنگێ تە ئارام د هاتە من
هەستێن من گشت سەروبنن
وەک هوڕەبای
ئارهان بەر بوو ئاراما من
مینا گورگەک د هاتە من
نە ژ ترسێ
بەلێ ژ فویریانا ڤینێ
ئومێدێن من مینا دجلەی، هندی دچن
هەر تم رۆبارەک مەزنن
دزانی نێر، دەما ژ ئەشقێ تژی دبن
کڕنۆش دبن بەر پێن یارێ
تەڤدا گەردوون
د ناخ و هەستێن واندایە
دبنە مێرگەکا ئارام
تنێ دیدار دبتە پەیام
هەبوون تەڤدا دبت حەزکرن
د ئارامگەها جانێ خوە دا بێ دوژمنن.

ئەوا هەر تم خەونا من بوو
وێ ب خاپان بلند دستراند
ئاوازەک بوو، گۆتن نە تێ
ژ دارەکا بەر وەشیایی، نە هات چنین
وەک بارانێ بیرییا تە دکم
ل ئەڤان رۆژێن گەرما دژوار
گیایەکی بەهاری مە
کوژەکێ من د رێدایە
یا دهێت پووشبەر
پۆڕا من پتر یا پووشبووی
هەستی یێ من یێ خورۆشبووی
د چاڤێن من دا نێڕین کزە
جوانییەک ناهێت پێشبەر
لێ هەستێن من هێشتا ب چاڤێ دلی دبینن
ئەڤ هەبوونە
هەما ب تنێ ئەز و تونە
هەر ئێک ژ مە ل دووری یێ
گەردوونەکا سەرنخوونە
ژ جان و جەستێن خوە ڤەدەر.