دەستپێک

شارستانی ل ئامێدیێ، سولتان حسێن بنگەهـ دانان
ئاڤاکرن منارە و برج، خاندنگەهـ و پر و ئەیوان
خەملاندن ئاکرێ و زاخۆ، دگەل دهۆکا داسنیان
حەمیدی ب شیعرێن کوردی، عیسێ دەلا پەند و عیرفان

بەراهی

بەهدینان دیرۆک دێرینێ
میرگەهـ ل ١٣ێ زایینێ
ئامێدیێ وارێ میدیان
قوبا زانکۆ یا زانینێ

ئەرزێ و بامەڕنێ و چەلکی
سێ کەلهێن مەتینی و لینکی
پارێزڤانێن پایتەختی بوون
هەردوو سپنە تا سەرسنکی

بەندا ١ێ

عیسێ دەلا باخچێ گۆلان
مێڤانێ ناڤ هەموو دلان
وەزیرێ میرێ بەهدینان
تاجا سەرێ تەڤ عاقلان

سەربەند

هۆستایێ ئاش و پڕان بوو
بۆ میر بەهرام وەک بران بوو
ژ دەلاڤا ژێریا گێرگاش
ل مالا شێخێ چرا بوو

سێ جهـ عیسێ سپارتن میری
بوون هێزەک خورتا لەشکری
دەشتازێ یە و بەرێگارێ
نهێلێ کانیا هونەری

بەندا ٢ێ

ژ خەو ڕابوو ل سویلاڤێ
دیت خەنجەرا ل هنداڤێ
میر گۆت: چ بوو؟ گۆت: میرم چوو!
عیسێ بارکر هەر وێ گاڤێ

عیسێ دوورکەفت، خۆ جوداکر
ل دۆر زاخۆ خۆ ونداکر
میر ب ژیری ل پەی گەڕیا
گیسکێ عیسێ، عیس پەیداکر

بەندا ٣ێ

ل سەرێ دیوانا میری
هەبوو باگوڕدانەک زێڕی
میری گۆت: ما تشتەک هەیە
چێتر بیت ژ ڤی گەوهەری؟

بەندا ٤ێ

عیسێ گۆت: تاڤیەک بارانێ
ل ناڤ نیسانێ و گولانێ
ژ وی گەوهەری چێترە
بهێت ل دەشتا دوبانێ
بباریت ل کوردستانێ