کورد و دەردێ وەڵاتێن بەلقان

١- بەلقانکرنا زمانی: گوهارتنا دەڤوکان بو نەتەوين جودا، یا دیارە نەتەوا کورد ب گەلەک دەڤوکان د پەیڤت نمونا ( کورمانجیا خوارێ و یا ناڤەراست و یا سەری، زازاکی ، لوری ، لەکی ، گوران … ) ل رۆژهەلاتێ حکومەتا ئیرانێ ژ بو بچویککرنا جوگرفیا کوردی هەردوو کورمانجی جوداکرینە ژ لور و لەک و فەیلییان، ژبەر جوداهییا مەزهەبی شیایە پتر وان ژ کوردێن دی ڤەبقەتینت لەورا ئەڤرۆ ب ساناهی ب رێیا دام و دەزگەهێن خۆ هزرا نەتەوا جودا (ئەم نە کوردن) د هزرا وان دا چاندیە، ب هەمان ڕەنگی کوردێن زازا ل باکور، و ل باشور ژی شەبەک و فەیلی و ئێزدی ژبەر جوداهیا دەڤوکان خۆ ب زمانەکێ جودا و نەتەوەکا جودا د بینن.

٢- بەلقانکرنا ئاینی: گوهارتنا جێوازیا ئاینی بو نەتەوەکا جودا، رێژەیا هەرە مەزن ژ کوردان موسلمانێن سونەنە ل باکور هژمارەکا ژ کوردان عەلەوینە و ل رۆژهەلات و باشور رێژەیەکا مەزن شیعەیان هەیە ل باشور شەبەک ژی هەنە، ژ ئاینان ژی پشتی موسلمانان ئاینێ ئێزدی مەزنترین ئاینە ژ بلی رۆژهەلاتی ل هەرسێن پارچێن دی هەنە و ل ئەرمینیا و دویڤدا یارسان.
دوژمنێن کوردان جێوازیا بیروباوەران دژی کوردا بکاردئینن، دا کو ئاین و مەزهەبێن جێواز خۆ ب نەتەوەیەکا جودا ژ کوردا ب هەژمێرن د هەمان دەمدا دژایەتیا کوردان ژی پێ بکەن!

یا چاڤەرێکریە بەلقانکرنا عەشیرەتان ژی رویبدەت ئەگەر هات و کوردا نەشیا ل هەمبەر ڤی پرۆژەی ب راوەستت.

زیانێن بەلقانکرنا کوردان :

١- لاوازکرنا خەونا دەولەتا نەتەوی یا مەزن، ب بەلقانبونێ هەر لایەنەک جودا کار دکەت و بەروڤاژی بەرژەوەندیێن نەتەوی و رێکێ نادەنە پرۆژێ مەزن یێ نەتەوا کوردی بجهبئێت.

٢- ب سانەهی لێدانا نەتەوەی، نەتەوێن دەستکرد ئامیرەکێ ب سانەهینە ددەست دوژمنی دا، رێکخوشکەرە بو شەرێن ناڤخۆ و هەڤرکیان.

٣- دروستکرنا دیروکەکا سەختە و شێلیکرنا دیروکا نەتەوی یا کوردی.

٤- پرت پرتبونا جوگرافیا کوردی دبیتە ئەگەرێ لاوازبونا داخوازێن نەتەوی ل سەر نەخشەیێ سیاسی.